Neemia 5 - Tosi Tapu

Alofa o Neemia ki le kau mativa, mo lana valoki le manumanu koloa o le kau lalasi

¹ I se aso na malaga loa i le kakai o le fenua mo alatou avaga ni fakameomeo ki olatou fetaina Sutea.

² Na pati a iki : Ko matou, mo omatou vosa ti mo omatou taineliki, e motou toka api ai ; ke soli mai kia matou se fulumeto ke motou kai, ti e motou mauli loa.

³ Ti na pati ni iki : E tonu ke motou fakamaoki ki amatou faisaga, mo amatou vite, mo omatou fale, o tupu ke totogi ai se fulumeto i le oge.

⁴ Ti na pati ni iki : E tonu ke motou too ni maua i amatou faisaga mo amatou vite ke ui ai le tukusau ki le sau.

⁵ Kae ko leinei e tatau lomatou kanofi mo le kanofi o omatou fetaina, ti e tatau amatou fanau mo alatou fanau ; ti ko leinei e tonu ke motou tuku amatou fanau ke fakapopulai, ti kua toka api i omatou taineliki kua fakapopulai ; e leaise tasi ake puleaki e motou maua, talie kua maua amatou faisaga mo omatou vite e latou ala e motou tuu maua ki ai.

⁶ Na kau ita lasi ai i laku logo ki alatou tagi mo masau ana.

⁷ Na kau fakapapau loa ke kau fai ni valoki ki le kau lalasi mo le kau pule, ti na kau pati loa kia latou : Kolea e kotou tuku ai ni maua mamafa ki okoutou fetaina ! Ti na kau fakatasii loa le kakai toka api kia latou,

⁸ ti na kau pati loa kia latou : Na tou totogi o mulimuli ki le nea leia na tou mafai otou fetaina, le kau Sutea, ala na popula ki atu puleaga, ti e kotou toe fakatau loa, e koutou totonu, okoutou fetaina, ti e kotou fakatau latou kia tatou ! Na lotou fakalologo loa, talie na leaise lotou maua loa se tali.

⁹ Ti na kau pati loa : Ko le nea leia e kotou fai e leaise malie. Pe na leaise tonu ke kotou saele i le i ki lotatou Atua, o tupu ke aua na lauvelii tatou e puleaga ala e fili mai kia tatou ?

¹⁰ Ko au foki, mo oku fetaina, mo aku tagata fakasausau, na motou soli kia latou ni maua paaga mo ni maua fulumeto. Ke tou fakafiti ki le toe ui mai o olatou maua !

¹¹ Ke tou liufaki kia latou i le aso nei, alatou faisaga fulumeto, mo alatou faisaga vite, mo alatou faisaga oliveto, mo olatou fale, ti mo le tupu o olatou maua, ala na tou fakamaua kia latou, i le paaga, mo le fulumeto, mo le vino, ti mo le lolo.

¹² Na lotou tali loa : E motou liufaki loa a nea ana, ti e leaise motou toe afa loa kia latou se nea, e motou fai loa ki le nea leia kua ke pati ki ai. Ti na kau kalagai loa le kau tagata faisakilifisio, ti na tuku loa ke lotou fakapapau i mua o le kau tagata faisakilifisio, ke lotou fai loa le nea leia kua lotou pati ki ai.

¹³ Ti na kau tutuui loa loku taupulupulu, o pati : Ke tuui feneeki loa e le Atua a tagata fuli mei lona fale mo ona koloa, leia e leaise fai loa ki le nea kua pati ki ai, ke tuui feneeki a ia, ti ke nofo mativa a ia ! Ti na pati loa le fakatasiga katoa : Amene ! Na lotou fakafetai loa ki le Eteleno, ti na fai loa e le kakai o mulimuli ki lalatou fakapapau.

Faifaitakiaga o le gaoi noa a Neemia

¹⁴ Talu mei le aso leia na fakanofo ai au e le sau ko le kovana o le kau Sutea i le fenua o Suta, mei le fetuu kau lua o kaku ki le fetuu kau tolu tupu lua o le sau o Aletasese, i lolotoga o fetuu e kau agafulu tupu lua, na leaise motou mauli, a au mo oku fetaina, ki le tukusau leia na tonu ke totogi ki le sau ti na fakatotonu ke totogi mai kiate au.

¹⁵ Kae ko kovana ala na muamua iate au na fakamamae ia le kakai ki le tukusau lena, o lotou tali mei le kakai le pane, mo le vino ti mo fa sikele paaga e kau fa ; io, na fakavelivelii e alatou tagata fakasausau le kakai. Na leaise kau fai fua le nea lena, talie na kau i ki le Atua.

¹⁶ Kae na kau toe gaoi totonu foki ki le fakafoou o le paa fatu o le kolo, ti na leaise motou totogi fua se faisaga, ti na kau aku tagata fakasausau fuli i le gaoi.

¹⁷ Na kai foki i loku laupapa le tino lelau tino lima, Sutea mo kovana, kae na leaise lau latou ala na au mei atu puleaga i tafatafa.

¹⁸ I aso fuli na teuteui ki le kai se pipi tagata e tasi, mo ni akeno e ono, ti mo ni kau moa ; ti tua tasi i aso e kau agafulu na teuteui loa le vino katoa leia na aoga ki le kai, kae na logo ai le lasi o le nea kai mo le vino leia na tonu ke teuteui, na leaise kau afa fua ki le kakai le tukusau leia na tonu ke soli ki le kovana, talie na vilo le mamafa o le gaoi ki le kakai.

¹⁹ Ei loku Atua, ke ke manatui au, o tapuaki kiate au o mulimuli ki nea fuli ala na kau fai ki le kakai leinei !