Neemia 4 - Tosi Tapu

Fai o le gaoi logo ai fakafesagai

¹ I le logo a Sanepala kua motou toe lagai le paa fatu, na ita lasi loa a ia, o fakainaina kia matou.

² Na gologolo loa a ia ki le kau Sutea, o pati i mua o ona fetaina ti mo mua o le solia o Samalia : Kolea e lolotoga fai e le kau Sutea gagae lena ? Pe tou tuku loa latou ke fai ? Pe lotou momoli loa ni sakilifisio ? Pe lotou fakaoki loa ? Pe lotou toe fakamauli loa ni fatu ala kua tanumia i se kele matotolu ti kua tutu e le afi ?

³ Na nofo Topisa, le Amone, i ona tafa, ti na pati loa a ia : Ke lotou lagai fua ! Kapau e ano se lenato ki ai, e soloi loa e ia lalatou paa fatu !

⁴ Ei lomatou Atua, fakalogo mai ki lomatou fakalumai ! Fakavilo alatou lauveli ki olatou ulu, ti ke tuku latou ke ave popula ki se fenua kese.

⁵ Aua na ke fakamolemole ki alatou agaveli, ti aua na puli loa lalatou agasala i ou mua, talie kua lotou lauvelii latou ala e laga ia le paa fatu.

⁶ Na motou lagai loa le paa fatu i le takatakai katoa o le kolo, o kaku ki le vaelua o lona taualuga. Ti na too fakamalotoloto loa e le kakai le gaoi.

⁷ Kae na veli loa le ita o Sanepala, mo Topisa, mo le kau Alape, mo le kau Amone, mo le kau Asetoti, i lalatou logo ki le saele malie o le fakafoou o le paa fatu, ti kua kamata maponopono loa a pu.

⁸ Na lotou fono fakatasi fuli loa ke lotou au o taui Selusalemi, o tupu ke taofi lona toe lagai.

⁹ Na motou kole loa ki lomatou Atua, ti na motou fakatuu loa se leoleo i le ao mo le pouli, ke puipui ia matou mei alatou oso tau.

¹⁰ Kae na pati a Suta : Kua ikiiki le makeke o le kau amo, kae lasi ai a maumau ; e leaise tou mafai loa le lagai o le paa fatu.

¹¹ Kae na pati omatou fili : E leaise lotou iloa loa ti e leaise lotou tio loa ki se nea o kaku ki latatou kaku loa ki loto malie o latou, o tamate latou ti mo taofi le gaoi.

¹² Kae ko le kau Sutea, ala na nonofo i tafa o fenua ana, na au tua kau agafulu loa o fakasa mai kia matou a ganea fuli ala na feala ke lotou osoi mai ai matou.

¹³ Koia na kau fakatuu ai loa i muli o le paa fatu, i ni ganea taualuga kae na munia ki le fili, le kakai i famili ; ti na lotou tasi nonofo mo lana seleta, mo lana tao, ti mo lana kalolo.

¹⁴ Na kau tio loa kia latou, ti na kau pati loa ki le kau lalasi, mo le kau pule, ti mo le toega o le kakai : Aua na kotou i kia latou ! Kotou manatui le Aliki lasi mo fakaii, ti kotou tau o tupu ko okoutou fetaina, mo okoutou vosa, mo okoutou taineliki, mo okoutou avaga, ti mo okoutou fale !

¹⁵ I le logo a le fili kua motou iloa alatou fakatuutuu, na fakanoai loa e le Atua alatou fakatuutuu. Ti na motou toe liliu fuli loa ki le paa fatu o tasi tuu ki lona tuulaga.

¹⁶ Talu mei le aso lena na gaoi loa le tasi vaelua o aku tagata fakasausau, kae tuu loa leia ake vaelua mo ni tao, mo ni paletau, mo ni kalolo, ti mo ni kofu tau. Na leoleo le kau pule ki le kakai katoa o Suta.

¹⁷ Ko latou ala na laga ia le paa fatu, mo latou ala na amo ia mo siki ia a kavega, na gaoi ki le lima e tasi ti na too ia se masafu ki leia ake a lima ;

¹⁸ ti na lotou gaoi fuli mo lana seleta i lona vakavaka. Ko leia na pupusi ia le fakatagi pupusi na tuu i oku tafa.

¹⁹ Na kau pati loa ki le kau lalasi, mo le kau pule, ti mo le toega o le kakai : E lasi ai le gaoi ti e lau lasi, ti kua tou mavetevete i le paa fatu, ti e mamao ala mei la.

²⁰ I le tagi a le fakatagi pupusi, kotou maopo mai kiate au, ki le ganea leia e kotou logo e pupusi ai le fakatagi : E tau loa lotatou Atua kia tatou.

²¹ Koia na soko atu ai loa le gaoi, o tuu loa le vaelua o matou mo le masafu i le tasi a lima, mei le mafoa o le ao o kaku ki le sa o fetuu.

²² I le temi foki lena na kau toe pati foki ki le kakai, ke lotou tasi moe mo lana kau gaoi i Selusalemi, o tupu ke lotou leoleo kia matou i le pouli, ti ke lotou gaoi i le ao.

²³ Koia na leaise motou toe too loa omatou teu gaoi, a au, mo oku fetaina, mo aku tagata fakasausau, ti mo le kau leo leia na mulimuli iate au, gato fua ki le maanu.