Neemia 3 - Tosi Tapu

Toe fakatuu o le paa fatu mo matapa

¹ Na tuu ake loa Eliasipe, le tagata faisakilifisio lasi mo ona fetaina, a kau tagata faisakilifisio, ti na lotou fau loa le matapa o ovi. Na lotou fakatapui loa a ia ti na lotou fakapiki loa a kau matapa ; na lotou fakatapui a ia mei le fa tule o Mea o kaku ki le fa tule o Ananeele.

² I tafa o Eliasipe na soko atu loa le laga e le kau tagata o Seliko, ti na toe laga atu foki i ona tafa a Sakule, vosa o Imeli.

³ Na lagai e le kakai o Sena le matapa o Ika. Na lotou fau loa a ia o kaku ki le ato, o lotou fakapipiki loa ona kau matapa, mo ona loka, ti mo ona laakau fakamaumau.

⁴ I olatou tafa na gaoi loa ki le fakafoou a Melemote, vosa o Uli, vosa o Akote ; i olatou tafa na gaoi loa a Mesulame, vosa o Pelekia, vosa o Mesesapeele ; i olatou tafa na gaoi loa a Satoke, vosa o Paana ;

⁵ i olatou tafa na gaoi loa le kakai o Tekoa, kae na leaise fakalogo loa olatou pule ki le gaoi a lolatou Atua.

⁶ Na fakafoou loa e Sosata, vosa o Peseake, mo Mesulame, vosa o Pesotia, le matapa mago. Na la ato loa a ia ti na la fakapipiki loa ona kau matapa mo ona laakau fakamaumau.

⁷ I olatou tafa na gaoi loa a Melatia, le tagata Kapaone, mo Satone, le tagata Melonote, mo tagata o Kapaone mo Misipa, ala na fakalogo ki le kovana o le fetuu lena o le vaitafe.

⁸ Na gaoi loa i olatou tafa a Usiele, vosa o Alasa, tagata tufuga aulo, ti na gaoi loa i ona tafa Anania, tagata fai kaloni. Na lotou fakafoou le paa o Selusalemi o kaku ki le fatu lau lasi.

⁹ Na gaoi loa i olatou tafa a Lefasa, vosa o Ulu, pule o le vaelua o le kolo o Selusalemi.

¹⁰ Na gaoi loa i olatou tafa a Setasa, vosa o Alumafe, i mua o lona fale, ti na gaoi loa i ona tafa a Atuse, vosa o Asapenia.

¹¹ Na laga fakafoou loa le tasi a koga o le paa takatakai o le kolo ti mo le tule o gutuumu e Malekisa, vosa o Alime, ti mo Asupe, vosa o Pakate-Moape.

¹² I olatou tafa na gaoi ai a Salume, vosa o Alosese, ko le pule o le tasi vaelua o Selusalemi, a ia mo ona taine.

¹³ Na fakafoou loa e Anune mo le kakai o Sanoake le matapa o le vaivailiua. Na lotou lagai a ia, o fakapipiki ona matapa, mo ona loka, ti mo ona laakau fakamaumau. Na lotou toe fai foki mo ni meta e kau lelau lima o le paa o kaku ki le matapa o penu.

¹⁴ Na fakafoou e Malekisa, vosa o Lekape, pule o le kolo ko Pete-Akelemi, le matapa o penu. Na lagai e ia a ia, o fakapikipiki e ia ona matapa, mo ona loka, ti mo ona laakau fakamaumau.

¹⁵ Na fakafoou e Salune, vosa o Kole-Ose, pule o le kolo o Misipa, le matapa o le matapuna vai. Na laga e ia a ia, o ato, ti mo fakapipiki ona matapa, mo ona loka, ti mo ona laakau fakamaumau. Na toe lagai e ia mo le paa o le vai o Siloe, i tafa o le oloto a le sau, o kaku ki le kakega leia e ifo mei le kolo o Tavite.

¹⁶ Na olo mai loa kiate ia Neemia, vosa o Asepuke, pule o le vaelua o le fenua o Pete-Tesuli, leia na laga ia le paa o kaku ki le potu leia na agatonu mo le tano o Tavite, i le tanakiaga vai leia na fau, ti mo le fale o le kau toa.

¹⁷ Na olo mai loa kiate ia le kau Levi : Na fai loa le gaoi e Leume, vosa o Pani, ti mo Asapia, pule o le vaelua o le kolo ko Keila, ki lona kolo.

¹⁸ Na olo mai loa kia latou olatou fetaina, ko Pavai, vosa o Enatate, pule o le tasi vaelua o Keila ;

¹⁹ ti na olo mai kiate ia a Etesele, vosa o Sosue, pule o Misipa, leia na lagai ia loa le tasi potu paa o le kolo, leia e tautonu mo le paleaga ki le fale o masafu tau, i le tifi.

²⁰ Na olo mai loa kiate ia a Paluke, vosa o Sapai, leia na lagai ia loa i lona makeke katoa se tasi a koga o le paa, mei le tifi o kaku ki le matapa o le fale o Eliasipe, le tagata faisakilifisio lasi.

²¹ Na olo mai loa kiate ia a Melemote, vosa o Uli, vosa o Akote, leia na lagai ia le tasi a koga o le paa, mei le matapa o le fale o Eliasipe o kaku ki le potupotu o le fale o Eliasipe.

²² Na olo mai loa kia Melemote a tagata faisakilifisio ala na au mei tafatafa o Selusalemi.

²³ Na olo mai loa ki tagata faisakilifisio a Pesamino mo Asupe, ala na gaoi loa i mua o ola fale.

²⁴ Na olo mai loa kia laua a Pinui, vosa o Enatate, leia na lagai ia loa le tasi a koga o le paa fatu, mei le fale o Asalia o kaku ki le pikoga o le paa fatu, i le tuliki.

²⁵ Na gaoi loa a Palale, vosa o Usai, i le vasa o le tuliki mo le tule lasi, leia na tuu i mua o le fale sau, o ofi ki le malae o le pilisoni. Na olo mai loa kiate ia a Petasa, vosa o Paleoke.

²⁶ Ko le kau Netinia ala na nonofo i le mauga na gaoi loa o kaku ki le matapa o atu vai, i le potu esite, i le tule leia na tuu i fafo.

²⁷ Na olo mai loa kia latou le kakai o Tekoa, ala na lagai fakafoou ia loa se tasi a koga o le paa fatu, leia na tautonu mo le tule lasi i fafo, o kaku ki le paa o le mauga ikiiki.

²⁸ I tafa o le matapa o osi, na gaoi loa le kau tagata faisakilifisio i mua o lona fale.

²⁹ I olatou tafa na gaoi loa Satoke, vosa o Imele, i mua o lona fale. Na olo mai loa kiate ia a Semaesa, vosa o Sekania, le tagata leo o le matapa esite.

³⁰ Na olo mai loa kia latou a Anania, vosa o Selemia, mo Anune, le ono o vosa o Tesalafe, ala na lagai ia loa le tasi a koga o le paa fatu. Na olo mai loa kia laua a Mesulame, vosa o Pelekia, leia na gaoi loa i mua o lona kogafale.

³¹ Na olo mai loa kiate ia a Malekisa, tagata tufuga aulo, leia na gaoi loa o kaku ki fale o le kau Netinia, ti mo le kau fai koloa, i mua o le matapa o Mifekate, o kaku ki le kogafale taualuga o le tuliki.

³² Na gaoi loa le kau tufuga aulo mo le kau fai koloa i le vasa o le kogafale taualuga o le tuliki ti mo le matapa o ovi.