Neemia 2 - Tosi Tapu

Ano o Neemia ki Selusalemi

¹ I le masina o Nisane, i le kau lua fetuu o le sau o Aletasese, na tuku le vino i oku mua, ti na kau too loa le vino, ti na kau momoli loa a ia ki le sau. Na leikiaise kau tuu mata mamae i se aso i ona mua.

² Na pati mai loa le sau kiate au : Kolea e ke mata mamae ai kae leaise ke masaki ? E lagi ko se mamae i lou loto. Na kau i lasi loa.

³ Ti na kau tali loa ki le sau : Ke mauli le sau o lee gato ! Pe feaki loa ke aua se kau mata mamae kae maumau le kolo leia e tuu ai a tanuma o oku tamana, ti kua tutu o okioki ona matapa e le afi ?

⁴ Ti na pati mai loa le sau kiate au : Kolea e ke kole ? Na kau faikole i le temi lena ki le Atua o le atu lagi,

⁵ ti na kau tali loa ki le sau : Kapau e malie ki le sau, ti kapau kua maua e lau tagata fakasausau se kalasia i ou mua, kakau au ki Suta, ki le kolo o tanuma o oku tamana, ke kau toe lagai a ia.

⁶ Ti na pati loa le sau kiate au, kae na nofo ofi iate ia le fafine sau : Pe fualoa lau folau ? E ke toe liliu mai afea ? Na loto malie loa le sau ke kau ano, ti na kau fakasa loa kiate ia lona fualoa.

⁷ Ti na kau pati loa ki le sau : Kapau e loto malie ki ai le sau, ke soli mai kiate au ni tosi ki kovana o leia fetuu o le vaitafe, o tupu ke lotou tuku au ke ulu ki Suta,

⁸ ti mo se tosi kia Asafe, leia e pule ki vaomatua a le sau, o tupu ke aumai e ia se laakau ke fai ai a matapa o le fale leia e ofi ki le fale tapu, mo paa o le kolo, ti mo le fale leia e kau nofo ai loa. Na tuku mai loa e le sau a tosi ana kiate au, talie na iate au le lima malie o loku Atua.

Kaku a Neemia ki Selusalemi

⁹ Na kau ano loa ki kovana o leia fetuu o le vaitafe, ti na kau soli loa kia latou a tosi a le sau, leia na tuku ia ke ano mo au ni kau pule solia ti mo ni kau tagata ekeosi.

¹⁰ I le logo ki ai a Sanepala, le tagata Oloni, mo Topisa, lana tagata fakasausau Amone, na la veli ia ai le kaku ake o se tagata ke tokaga ki le malie o fanau a Iselaele.

¹¹ Na kau kaku loa ki Selusalemi, ti na kau nofo loa i ai i ni aso e tolu.

¹² Ti na kau tuu ake loa i le pouli mo se ga kau tagata, kae na leaise kau fakasa ki se tasi le nea leia kua tuku e le Atua ki loku loto ke fai i Selusalemi. Ti na leaise tasi ake a manu mo au i le asino leia na kau eke ai.

¹³ Na kau ulu loa ki fafo i le pouli i le matapa o le vaivailiua, ti na kau ano loa ki le matapuna vai o le Talakone, ti mo le matapa o penu, ti na kau sivisivi loa a paa fatu o Selusalemi, ala kua solo, ti na kau fakakaukau loa ki ona matapa, ala kua tutu o okioki e le afi.

¹⁴ Na kau fakalaka loa i tafa o le matapa o le matapuna vai ti mo le vai o le sau, ti na leaise maua se ganea ke ano ai le asino leia na kau eke ai.

¹⁵ Na kau pale loa, i le pouli aifai, i le vaivailiua, o toe tioi le paa. Ti na kau toe ulu loa ki le kolo i le matapa o le vaivailiua, o kau toe liliu loa i ai.

¹⁶ Na leaise iloa e kovana pe na kau ano kifea, pe kolea le nea leia na kau fai ia. O kaku mai ki le lakaga lena, na leaise kau masaui fua se nea ki le kau Sutea, pe ki le kau tagata faisakilifisio, pe ki le kau lalasi, pe ki kovana, pe ki se tasi fua ia latou ala na tokaga ki nea o le puleaga.

¹⁷ Ti na kau pati loa kia latou : E kotou tio ki le malaia kua tou nofo ai ! Kua maumaui Selusalemi ti kua tutu o okioki ona matapa e le afi ! Kotou au, tou toe lagai le paa o Selusalemi, ti e leaise tou toe nofo loa i le luma.

¹⁸ Na kau fakamatala loa kia latou le lima malie o loku Atua leia na teki kiate au, ti mo masau fuli ala na fai e le sau kiate au. Na lotou pati loa : Tou tutuu ki aluga, tou laga ! Ti na lotou fakamakeke loa olatou lima ki le gaoi malie lena.

¹⁹ I le logo ki ai a Sanepala, le tagata Oloni, mo Topisa, lona oloi, le tagata Amone, ti mo Kesemi, le tagata Alape, na lotou kata fakagologolo loa kia matou, ti na lotou vesia loa kia matou. Na lotou pati : Kolea le nea lena e kotou fai ? Pe kotou loto ke kotou agatuu ki le sau ?

²⁰ Ti na kau fai loa le tali leinei kia latou : E fakamanuia loa e le Atua o le atu lagi lamatou gaoi. Ko matou ko ana tagata fakasausau, koia e motou tutuu ai loa ki aluga, ti e motou laga loa ; kae ko koutou e leai sokoutou tofiga, e leai sokoutou vaega, ti e leai sokotou fakamanatu i Selusalemi.