Neemia 13 - Tosi Tapu

Fakatuutuu na fai e Neemia kia latou ala e maumaui ia le lao

¹ I le temi lena, na lau loa le tosi a Moisese i mua o le kakai, ti na maua loa kua tosi i ai e leaise tonu ke ulu le kau Moape mo le kau Amone ki le fakatasiga o fanau a le Atua i se aso,

² o tupu na leaise lotou au ki mua o fanau a Iselaele mo se pane ti mo se vai, kae na lotou totogi ki le paaga a Palaami ke au o tutuku latou ; kae na fetogi loa e lomatou Atua le tutuku ki le tapuaki.

³ I le logo a le kakai ki le lao, na lotou fakamavae loa le kau matapule mei Iselaele.

⁴ I mua o le nea lena, ko le tagata faisakilifisio ko Eliasipe, leia na fakanofo ke tokaga ki kogafale o le fale o lomatou Atua, ti na famili mo Topisa,

⁵ na soli ia kia Topisa se kogafale lasi, leia na tanaki ai a moliga i mua, mo le iseso, mo ipu, mo le vaega kau agafulu o le fulumeto, mo le vino, mo le lolo, io, le nea leia na fakatotonu ke soli ki le kau Levi, mo le kau sua, ti mo le kau tuu matapa, ti mo le nea leia na vaei ki le kau tagata faisakilifisio.

⁶ Na leaise kau nofo i Selusalemi i le temi leia na soko ai a nea fuli ana, talie na kau toe liliu ki le sau, i le kau tolu tupu lua fetuu o le sau o Aletasese, sau o Papilone.

⁷ I le fakaoki o le fetuu, na kau maua loa mei le sau le fakataga ke toe liliu ki Selusalemi, o kau tio loa ki le veli o le nea leia na fai e Eliasipe, i lana soli se kogafale kia Topisa i lotoa o le fale o le Atua.

⁸ Na kau mamae lasi ai i le nea lena, ti na kau laku loa ki fafo o le kogafale a nea fuli ala na maua e Topisa ;

⁹ ti na kau fakatotonu loa ke fakamea a kogafale, ti na kau toe tanaki loa ki ai a ipu o le fale o le Atua, mo moliga, mo le iseso.

¹⁰ Na kau logo foki na leaise soli a vaega o le kau Levi, ti kua sosola le kau Levi mo le kau sua, ala na tokaga ki le tausi, ki lona fenua.

¹¹ Na kau fai loa ni valoki ki le kau pule, o pati : Kolea kua tiaki ai le fale o le Atua ? Ti na kau tanaki loa le kau Levi mo le kau sua, o toe fakanofo latou ki lolatou tuulaga.

¹² Ti na toe aumai loa e Suta katoa ki fale tanaki koloa le vaega kau agafulu o le fulumeto, mo le vino, mo le lolo.

¹³ Na kau tuku loa kia Selemia, le tagata faisakilifisio, mo Satoke, le sekelipa, ti mo Petasa, ko se tasi o le kau Levi, ke lotou leoleo ki fale koloa, ti na kau tuku loa ke tokoi kia latou a Anane, vosa o Sakule, vosa o Matania, talie kua iloa latou ko ni tagata agatonu. Na lotou tokaga loa ki le vaevae o koloa ki olatou fetaina.

¹⁴ Ei loku Atua, ke ke manatui au, o tupu ko le nea lena, ti ke aua na galo iate koe a gaoi malilie ala na kau fai ki le fale o loku Atua, ti mo nea ala e tonu ke taupau !

¹⁵ I le temi lena, na kau tio loa i Suta ki ni iki na takatakafi i tatauaga vite i le aso o le sapato, ti mo ni iki na fakaulu ia le fulumeto ki fale, ti mo ni iki na fetuku ia i ni asino ni vino, mo ni fuai vite, mo ni fuai fiki, ti mo nea kesekese, o aumai ki Selusalemi i le aso o le sapato ; ti na kau fai loa kia latou ni valoki i aso ala na lotou fakatau ai alatou nea kai.

¹⁶ Na i ai foki se kau Tile, kua nofo i Selusalemi, ala na aumai ia ni ika mo koloa kesekese, o fakatau ki le kakai o Suta i le aso o le sapato, i Selusalemi.

¹⁷ Na kau fai loa ni valoki ki le kau lalasi o Suta, ti na kau pati loa kia latou : Kolea le nea veli leinei kua kotou fai, o kotou maumaui le aso o le sapato ?

¹⁸ Pe na leaise fai le nea lena e okoutou tamana, o tupu ai le tuku e le Atua o malaia fuli anei kia tatou mo le kolo leinei ? Ti ko koutou, e kotou toe aumai lona sausau ki Iselaele, i lakotou maumaui le sapato !

¹⁹ Ti na kau fakatotonu loa ke tapono a matapa o Selusalemi i mua o le aso o le sapato, i le malu o le afiafi, ti koi toe fakamavaa latou i le oki o le sapato. Ti na kau fakatutuu loa i matapa ni iki o aku tagata fakasausau, ke aua na fakaulu se amoga i le aso o le sapato ki Selusalemi.

²⁰ Koia na moe ai loa i fafo o Selusalemi le kau fai koloa mo le kau fai fakatau o nea kesekese, o tua tasi pe tua lua.

²¹ Ti na kau valoki loa latou, o pati : Kolea e kotou momoe ai i le pouli i mua o le paa o le kolo, kapau e kotou toe fai loa le nea lena, e kau fakapilisoni loa koutou. Talu mei le aso lena, na leaise lotou toe au loa i le aso o le sapato.

²² Na kau fakatotonu foki ki le kau Levi ke lotou fakamea, ti ke lotou au o leoleo a matapa, o tupu ke fakatapui le aso o le sapato. Ei loku Atua, ke ke manatui au, o tupu ko le nea lena, ti ke puipui au o tupu ko lou manava alofa lasi !

Lao ki avaga mo fafine matapule

²³ I le temi lena, na kau tio loa ki ni Sutea ala na avaga mo ni fafine o Asetoti, mo Amone, mo Moape.

²⁴ Ti na masau fakavaelua olatou fanau ki le masau o Asetoti, kae na leaise lotou poto i le masau fakaepeleo ; na lotou poto fai i masau a fenua matapule.

²⁵ Na kau fai loa ni valoki kia latou ti na kau tutuku loa latou ; na kau lalava loa ni iki, ti na kau futi loa olatou lau ulu, ti na kau fakatotonu loa ke lotou fakapapau i le suafa o le Atua, ti na kau pati loa kia latou : E leaise kotou soli loa okoutou taineliki ki olatou tamaliki, ti e leaise kotou too loa olatou taineliki ke avaga mo okoutou vosa pe ko koutou totonu.

²⁶ Pe na leaise se agasala Salomone, sau o Iselaele, i le nea lena ? Kae na leaise tatau se sau mo ia i atu puleaga lalasi, ti na alofaia a ia e lona Atua, leia na fakanofo ia a ia ke sau i Iselaele katoa ; kae na fakasalai a ia e fafine matapule.

²⁷ Koia e leaise koi motou fia logo ai ki le pati kua kotou fai se agasala lasi lena ki lotatou Atua, o avaga mo ni fafine matapule.

²⁸ Na i ai foki se tasi o vosa o Sosata, vosa o Eliasipe, le tagata faisakilifisio lasi, na liliu ko le fugao o Sanepala, le tagata Oloni. Na kau kapu loa a ia ki mamao.

²⁹ Ei loku Atua, ke ke manatui latou, talie na lotou fakakelekele le gaoi fakapelepitelo, mo le sai leia na fai e le kau tagata faisakilifisio mo le kau Levi.

³⁰ Na kau fakamea loa latou mei le kau matapule fuli, ti na kau toe fakamakeke loa a lao ala e tonu ke tausi e le kau tagata faisakilifisio mo le kau Levi i lalatou gaoi,

³¹ ti mo le nea o uiga mo le moliga fafie i lakaga kua fakatuutuu ki ai, ti mo uluaki fua. Ei loku Atua, ke ke manatui au, o agamalie mai kiate au !