Neemia 12 - Tosi Tapu

Tosi o le kau faisakilifisio mo le kau Levi

¹ Ko nei le kau faisakilifisio mo le kau Levi leia na toe liliu mai mei le popula mo Solopapele, vosa o Saletiele, mo Sosue : ko Selasa, mo Selemia, mo Esetalasi,

² Mo Amalia, mo Maluke, mo Atuse,

³ Mo Sekania, mo Leume, mo Melemote,

⁴ Mo Ito, mo Kinetoi, mo Apisa,

⁵ Mo Misamine, mo Maatia, mo Pileka,

⁶ Mo Semaesa, mo Sosalipe, mo Setaesa,

⁷ Mo Salu, mo Amoke, mo Ilekisa, mo Setaesa. Ko pule ana o le kau faisakilifisio mo olatou fetaina i le temi o Sosue.

⁸ Ko le kau Levi : ko Sosue, mo Pinui, mo Katemiele, mo Selepia, mo Suta, mo Matania, leia na takitaki ia mo ona fetaina a sua o le fakafetai ;

⁹ mo Pakepukia mo Uni ala na gaoi i tafa o ola fetaina.

¹⁰ Na tupu loa meia Sosue a Sosakimi, ti na tupu loa meia Sosakimi a Eliasipe, ti na tupu loa meia Eliasipe a Sosata,

¹¹ ti na tupu loa meia Sosata a Sonatane, ti na tupu loa meia Sonatane a Satua.

¹² Ko leinei, i le temi o Sosakimi, le kau tagata faisakilifisio, pule o famili : ki le famili o Selasa ko Melasa ; ki le famili o Selemia ko Anania ;

¹³ ki le famili o Esetalasi ko Mesulame ; ki le famili o Amalia ko Sokanane ;

¹⁴ ki le famili o Meluki ko Sonatane ; ki le famili o Sepania ko Sosefo ;

¹⁵ ki le famili o Alime ko Atena, ki le famili o Melasote ko Elekai ;

¹⁶ ki le famili o Ito ko Sakalia, ki le famili o Kinetone ko Mesulame ;

¹⁷ ki le famili o Apisa ko Sikeli ; ki le famili o Minesamino mo Moatia ko Piletai ;

¹⁸ ki le famili o Pileka ko Samua ; ki le famili o Semaesa ko Sonatane ;

¹⁹ ki le famili o Sosalipe ko Matenai ; ki le famili o Setaesa ko Usi ;

²⁰ ki le famili o Salai ko Kalai, ki le famili o Amoke ko Epele ;

²¹ ki le famili o Ilekisa ko Asapia ; ki le famili o Setaesa ko Netaneele.

²² I le temi o Eliasipe, mo Sosata, mo Sokanane ti mo Satua, na tosi loa le kau Levi pule famili mo le kau tagata faisakilifisio i le sau o Taliusi, le tagata Pelesi.

²³ Na tosi loa a vosa o Levi, pule famili, i le tosi o Koloniko, o kaku ki le temi o Sokanane, vosa o Eliasipe.

²⁴ Ko pule o le kau Levi : ko Asapia, mo Selepia, mo Sosue, vosa o Katemiele, ti mo olatou fetaina, o mulimuli ki le fakatotonu a Tavite, tagata a le Atua, ke lotou feagaaki ki loto, o sua a fakavikiviki mo fakafetai ki le Eteleno.

²⁵ Ko Matania, mo Pakepukia, mo Apetiasi, mo Mesulame, mo Talemone, mo Akupe, ko le kau tagata leo latou o matapa.

²⁶ Na lotou mauli i le temi o Sosakimi, vosa o Sosue, vosa o Sotesatake, ti mo le temi o le kovana ko Neemia mo le tagata faisakilifisio mo sekelipa ko Esetalasi.

Fakatapu o le paa takai o Selusalemi

²⁷ I le aso na fakatapui ai a paa fatu o Selusalemi, na kalagai loa le kau Levi mei potu fuli ala na lotou nonofo ai, ti na aumai loa latou ki Selusalemi ki le fakatapu o le paa fatu, o tupu ke lotou fai le fakatapu o le paa fatu i se fiafia lasi, mo ni sua fakafetai, mo ni katiko, mo ni musika, mo ni sapale, mo ni lute mo ni alepe.

²⁸ Ti na fakatasi mai loa a vosa o le kau sua mei tafatafa o Selusalemi, mo kolo o Netofa,

²⁹ mo Pete-Kilekale, mo le fenua o Kepa ti mo Asimavete ; talie na fakatuu e le kau sua ni kolo liliki kia latou i tafatafa o Selusalemi.

³⁰ Na fakamea loa le kau tagata faisakilifisio mo le kau Levi, ti na lotou fakamea loa le kakai, mo matapa, ti mo le paa fatu.

³¹ Na kau fakatotonu loa ke pale le kau pule o Suta ki aluga o le paa fatu, ti na kau vae ia loa ni kau sua e lua. Na saele loa le uluaki kau sua i aluga o paa fatu ki le fetuu atamai, ki le matapa o penu.

³² I muli o le kau sua lena, na saele loa Ose mo le vaelua o le kau pule o Suta,

³³ mo Asalia, mo Esetalasi, mo Mesulame,

³⁴ mo Suta, mo Pesamino, mo Semaesa, mo Selemia,

³⁵ mo ni vosa o le kau tagata faisakilifisio mo olatou fakatagi pupusi : ko Sakalia, vosa o Sonatane, vosa o Semaesa, vosa o Matania, vosa o Mikea, vosa o Sakule, vosa o Asafe,

³⁶ ti mo ona fetaina ko Semaesa, mo Asaleele, mo Milalai, mo Kilalai, mo Maai, mo Netaneele, mo Suta, mo Anani, mo nea fai musika a Tavite, tagata a le Atua. Na taki latou e Esetalasi, le sekelipa.

³⁷ I le matapa o le matapuna vai, na lotou pale loa i le takakega leia e ano ki le kolo o Tavite, leia na tuu i olatou mua, i aluga o le fale o Tavite, o kaku ki le matapa o vai, i le potu esite.

³⁸ Ti na ano loa le lua kau sua i leia ake fetuu. Na kau ano loa i olatou muli mo leia ake vaelua o le kakai, i aluga o le paa. Na motou fakalaka loa i aluga o le tule o gutuumu, o motou ano o kaku ki le fatu lau lasi ;

³⁹ ti na motou soko atu loa i aluga o le matapa o Efalaimi, mo le matapa afea, mo le matapa o ika, mo le tule o Ananeele, ti mo le tule o Mea, o kaku ki le matapa o ovi. Ti na motou tutuu loa i le matapa o le pilisoni.

⁴⁰ Ti na tutuu loa a fa sua e lua i le fale o le Atua, mo au ti mo le kau pule leia na ano mo au,

⁴¹ ti mo le kau tagata faisakilifisio ko Eliakimi, mo Maasesa, mo Minesamino, mo Mikea, mo Elioenai, mo Sakalia, mo Anania, ala na pupusi fakatagi,

⁴² ti mo Maasesa, mo Semaesa, mo Eleasale, mo Usi, mo Sokanane, mo Malekisa, mo Elame, mo Etesele. Na kamata sua loa le kau sua leia na taki e Siselakesa.

⁴³ Na momoli loa i le aso lena ni sakilifisio lasi, i le fiafia, talie na tuku e le Atua se fiafia lasi ki le kakai. Na fiafia foki a fafine mo toe, ti na logo loa ki mamao a kalaga fakafiafia o Selusalemi.

Totogi o tagata fakasausau o le fale tapu

⁴⁴ I le aso lena, na fakanofo loa ni tagata ke leoleo ia a kogafale ala na tanaki ai a koloa o moliga, mo uluaki fua, mo vaega kau agafulu, ti na tuku loa kia latou ke lotou tanaki ki ai a vaega ala na fakatotonu e le lao ke soli ki le kau tagata faisakilifisio mo le kau Levi, mei kolo o le fenua. Talie na fiafia a Suta i le nofo a le kau tagata faisakilifisio mo le kau Levi i olatou tuulaga,

⁴⁵ o fai a nea fuli o uiga mo le tausi ki le Atua ti mo fakamea. Na fai foki e le kau sua mo le kau leo matapa alatou gaoi, o mulimuli ki le fakatotonu a Tavite, mo Salomone, lona vosa ;

⁴⁶ talie i mua, i le temi o Tavite mo Asafe, na maua ni pule o le kau sua, mo ni sua fakavikiviki mo fakafetai ki le Atua.

⁴⁷ I le temi o Solopapele mo Neemia, na soli e Iselaele katoa a vaega o le kau sua mo le kau tuu matapa, i aso taki tasi ; ti na soli ki le kau Levi a nea taputapu, ti na soli e le kau Levi ki vosa o Alone a nea taputapu.