Neemia 1 - Tosi Tapu

Kole a Neemia o uiga mo fanau a Iselaele

¹ Masau a Neemia, vosa o Akalia. I le masina o Kiseleu, i le kau lua o fetuu, na kau nofo i Suse, i le kolo mua,

² Ti na kaku mai loa mei Suta Anani, ko se tasi o oku fetaina, mo ni iki ake kau tagata. Na kau fakavesilii loa latou o uiga mo le kau Sutea na sao, ala na toe i le popula, ti mo Selusalemi.

³ Na lotou tali mai loa kiate au : Ko latou ala na toe i le popula e nonofo i le fenua, i se malaia lasi mo se luma lasi ; kua solo a paa fatu o Selusalemi, ti kua tutu ona matapa e le afi.

⁴ I laku logo ki nea ana, na kau tonatona loa ki le kele o tagi, ti na kau nofo loa i ni aso mauke ai i le mamae. Na kau sesunio loa ti na kau faikole loa ki le Atua o le atu lagi, o pati :

⁵ ti na kau pati : Ei Eteleno, Atua o le atu lagi, Atua lasi mo fakaii, leia e taupau ia lau sai ti e manava alofa kia latou ala e alofa kiate koe ti mo tausi au folafola !

⁶ Ke tokaga mai lou taliga, ti ke tio mai ou mata, o fakalogo ki le kole leia e fai atu kiate koe e lau tagata fakasausau i le lakaga nei, i le ao mo le pouli, ki au tagata fakasausau a fanau o Iselaele, o kofesio a agasala a fanau o Iselaele, amatou agasala kiate koe ; talie kua motou agasala kiate koe, a au mo le fale o loku tamana.

⁷ Na motou agasala lasi kiate koe, talie na leaise motou tausi au folafola, mo au lao, ti mo au fakatotonu ala na ke tuku ki lau tagata fakasausau ko Moisese.

⁸ Manatui le folafola leinei na ke fakatotonu kia Moisese, lau tagata fakasausau, ke fakasa e ia : Ka kotou agasala loa, e kau veteki loa koutou i lotolotoga o puleaga ;

⁹ Kae kapau e kotou toe liliu mai kiate au, ti kapau e kotou tausi loa aku folafola mo kotou fai latou, pe kotou mavetevete foki o kaku ki potupotu o le malama nei, kae kau fakatasii loa koutou ti e kau toe aumai loa koutou mei lena ki le ganea leia kua kau filifili ke agai ai loku suafa.

¹⁰ Ko au tagata fakasausau latou anei ti ko lou kakai, leia na ke totogi ki lou mafimafi ti mo lou lima makeke.

¹¹ Ei Aliki, ke tokaga mai lou taliga ki le kole a lau tagata fakasausau, ti mo le kole a au tagata fakasausau ala e loto ke i ki lou suafa ! Tapuaki i le aso nei lau tagata fakasausau, o ke tuku ke maua e ia se manava alofa i mua o le tagata leinei ! I le temi aia na kau pule ki le vino a le sau.