Naume 3 - Tosi Tapu

Tupuaga o le maumaui o Ninive

¹ Malaia ki le kolo pani toto, Leia kua apele i le loi, kua apele i le agamakeke, Leia e leaise toe gato lana kaia !…

² E logo ki le patato o le suipi, Ki le gugulu o teka o saliote, Ki le patatu o le makape o osi, Ki le gugulu o saliote tau.

³ Kua oso a tagata eke osi, kua tapa le seleta, kua masika gigila le tao ofaipe se uila… Kua se ma lau a mate !… Kua saele i aluga o mate !…

⁴ Se tupu ko le lasi o faiaga a le fafine faiaga, Leia na poto i lona teuteu ke fulumalie, Leia na fakapopula ia a atu puleaga ki ana faiaga Ti mo atu kakai ki ana kaka.

⁵ Ko leinei, e kau mamafa kiate koe, e folafola le Eteleno o kau tau, E kau sufei loa ou tapai kofu o kaku ki ou mata, E kau fakasa loa lou telefua ki atu puleaga, Ti mo lotou luma atu puleaga sau.

⁶ E kau laku loa kiate koe ni kelekele, E kau fakakelekele loa a koe, Ti e kau fakatuu loa a koe ko se nea ke tioi.

⁷ Ko latou fuli ala e tio loa kiate koe e sosola loa o mamao iate koe. Ti e pati loa : Kua maumau Ninive ! Ko ai e tagi loa kiate ia ? E maua loa ifea ni iki ke fakapelepele ia a koe ?

⁸ Ninive, pe ke malie ake i No-Amoni, Leia na ekeeke i loto malie o vaitafe, Leia na takatakai e atu vai, Leia na puipui e le tai, Leia na kaua makeke ki le tai ?

⁹ Na fai lona makeke e Etiopia mo Esipito ala na api ola kakai, Ti na tokoi kiate ia a Puti mo le kau Lipia.

¹⁰ Kae logo ai le nea lena, kua ano a ia ki se fenua kese, Kua ave a ia ki le popula ; Kua laliki ana fanau i poko o ala fuli ; Kua vae ona aliki, Kua sai ona pule tau fuli ki ni tini.

¹¹ Ko koe foki, Ninive, e ke kona loa, e ke mumuni loa ; Ko koe foki, e ke afa loa se mumuniaga i le fili.

¹² Ko ou kolo tau fuli e tatau Mo ni tafito fiki mo ni fua kua leleu ; Ka luui latou, E lotou maluluku ki le gutu o leia e fia kai kia latou.

¹³ Ko leinei, ko lou kakai, ko ni fafine i loto malie o ou ; Kua mavaa a matapa o lou fenua ki ou fili ; Kua tutu e le afi a ukamea fakamau o ou matapa.

¹⁴ Asu se vai ki le tau ! Fakamakeke ou kolo tau ! Ulu ki le pela, takatakafi le kele pupulu ! Toe fakatuu le gutuumu fau piliki !

¹⁵ I lena, e kai loa a koe e le afi, E tuuti loa a koe e le seleta, E kai loa e ia a koe ofaipe ni seseivaka. Ke ke fakatuuga ofaipe ni seseivaka ! Ke ke fakatuuga ofaipe ni seseivaka !

¹⁶ Ko au tagata fai koloa, ala e api ake I fetuu o le lagi, E faipe le seseivaka leia e fakamavaa ia ona kapakau o lele.

¹⁷ E fai ou aliki pe seseivaka, E fai ou pule tau pe se ao seseivaka, leia e ifo ki a laakau i le temi o le momoko : Ka sa le laa, e lotou felelei, Ti e leaise toe iloa le ganea leia na lotou nofo ai.

¹⁸ E tulemomoe au tagata tausi manu ; E malolo au tagata tau makeke ; Kua mavete lou kakai i atu mauga, Ti e leaise tasi e fakatasi ia a ia.

¹⁹ E leai se faitoo ki lou lavea, E mateia lou lavea. Ko latou fuli ala e logo loa ki le masau kiate koe E pasipasi loa olatou lima kiate koe ; Talie ko ai leia na leaise kaku ki ai lou agaveli ?