Naume 1 - Tosi Tapu

Agaaga o le Atua mo lona mafimafi

¹ Masau mamafa ki Ninive. Tosi o le folafola kikite a Naume, mei Elekosi.

² Ko le Eteleno ko se Atua finenonofo, E totogi e ia ; e apele a ia i le itaita ; E totogi e le Eteleno kia latou ala e agatuu kiate ia, E taofi e ia lona ita ki ona fili.

³ E kataki fualoa e le Eteleno lona sausau, e lasi a ia i lona makeke ; E leaise tuku e ia leia e agasala sala tautea. E saele le Eteleno i le afa, mo le asesio ; Ko ao ko efu o ona vae.

⁴ E valoki e ia le tai ti e malo a ia. E fakamasa e ia a vaitafe fuli ; E gae le Pasani mo le Kalemelo, E gae a fitii laakau o Lipane.

⁵ E galulu a mauga i ona mua, Ti e liliu o vai a mauga liliki ; E tuu ki aluga le malama nei i ona mua, Le malama nei katoa mo latou fuli e nonofo i ai.

⁶ Ko ai e tuu loa i mua o lona sausau ? Ko ai e tuu loa i mua o lona sausau lasi ? E mafola lona sausau ofaipe le afi, Ti e mafaafaa a utu i ona mua.

⁷ E agamalie le Eteleno, Ko se mumuniaga a ia i le aso o le mamae ; E iloa e ia latou ala e fanaki kiate ia.

⁸ Kae e maumaui loa e ia le kolo Ki ni galu o le malaia, Ti e tuli loa e ia ona fili o kaku ki le fakapouli.

Fakasa o le maumaui o Ninive

⁹ Kolea e kotou fakakaukaui ki le Eteleno ? Ko ia leia e maumaui ia. E leaise sa tua lua loa le mamae !

¹⁰ Talie e fui loa latou ofaipe ni vao talatala, Ti e lotou konana loa i le vino, E tutu loa latou, Ofaipe le penui fulumeto malo, katoa.

¹¹ Meiate koe e ulu mai Leia na metitasio ia le veli ki le Eteleno, Leia na nofo mo ni fakatuutuu veveli.

¹² Koia e folafola ai le Eteleno : Logo ai e lotou makeke mo toka api, Kae e tuuti loa latou ti e lotou pupuli loa. E kau loto ke fakamamae a koe, Ke aua na toe fakamamae a koe…

¹³ E kau fatii loa i le aso nei lana amoga iate ia, Ti e kau motusi loa ou sai…

¹⁴ Ko leinei le nea leia na fakatotonu e le Eteleno kiate koe : E leaise ke toe maua ia loa sou sakoga ke taupau ia lou igoa ; E kau too loa i le fale o lou atua a fakatata laakau mo fakatata ukamea saka ; E kau teuteu loa lou tanuma, talie e ke maamaa ai !