Mikea 7 - Tosi Tapu

¹ Malaia kiate au ! talie kua kau fai pe se tagata leia e ano o afa ni fuai laakau i le oki o le tau kai, Leia e ano o afa ni fui vite i le oki o le tau o le vite : E leaise maua e ia se fui vite ke kai, pe ko se fa fiki suamalie leia e manako ki ai lona laumalie.

² Kua puli le tagata agamalie i le fenua, Ti e leaise koi i ai se tagata agatonu i lotolotoga o tagata ; Kua lotou mumuni fuli o lamalama ke liligi le toto, Kua tasi fai e le tagata se masele ki lona taina.

³ Kua poto olatou lima i le fai o le veli : Kua fakamakeke e le aliki ni nea alofa, Kua fakamaua e le tui fakamaau se totogi, Kua fakasa e le tagata lasi lona manumanu, Ti kua lotou kau fakatasi fuli latou ana.

⁴ Ko leia e malie ia latou e faipe se laakau talatala, Ko leia e faitotonu ia latou e veli ake i le vao sukisuki. Ko leinei kua ofi mai le aso leia na fakasa e au kau polofeta, le aso o lou tautea. I le aso lena e lotou nofo loa i le luma.

⁵ Aua na ke tui ki se kaukau nea, Aua na ke fanaki ki sou kaiga totonu ; Tapono matapa o lou gutu I mua o le fafine leia e malolo i lou fatafata.

⁶ Talie e lauveli le vosa ki le tamana, E malaga le taine ki lona tinana, E agatuu le fugao ki lona tinana ; Ko le fili o le tagata ko le kakai o lona fale.

Amanaki mo fakapapau ki Iselaele

⁷ Kiate au, e kau maliu loa ki le Eteleno, E kau tuku loa laku amanaki malie ki le Atua o loku fakamauli ; E tali loa loku Atua ki aku kole.

⁸ Aua na ke fakafiafia o tupu ko au, ei loku fili ! Talie kapau na kau siga, e kau toe tuuake loa ki aluga ; Kapau na kau tonatona i le fakapouli, E liliu loa le Eteleno ko loku malama.

⁹ E kau kataki loa le sausau o le Eteleno, O tupu na kau agasala kiate ia, O kaku ki le lakaga e puipui ai loa e ia au ti e fakatonu ia loa e ia au ; E taki loa e ia au ki le malama, Ti e kau tio loa ki lona faitotonu.

¹⁰ E tio loa ki ai loku fili ti e apele loa a ia i le luma, A ia leia na pati mai kiate au : Kofea le Eteleno, lou Atua ? E fiafia loa oku mata i le tio kiate ia ; Kae takatakafi loa a ia ofaipe le pela o ala.

¹¹ I le aso leia e toe laga ai loa ou kaua, I le aso lena e siki ai loa ou koiga ke mamao atu.

¹² I le aso lena, e au loa au fanau kiate koe, Mei Asilia mo kolo o Esipito, Mei laugutu o vaitafe o Esipito, Mei se tai ki se tasi a tai, mei se mauga ki se tasi mauga.

¹³ E maumaui loa le fenua o tupu ko ona kakai, O tupu ko fua o alatou gaoi.

¹⁴ Eteleno, fagai lou kakai ki lau laakau, le kau manu o lou tofiga, Leia e nofo toka tasi i le vaomatua i loto malie o le Kalemelo ! Ke lotou kai i Pasani mo Kalaate, Ofaipe aso o le temi mua.

¹⁵ Ofaipe le aso leia na ke mavae ai i le fenua o Esipito, E kau fakatio loa a koe ki ni nea fakamanamana !

¹⁶ E tio loa ki ai a atu puleaga, ti e lotou luma loa, Logo ai lolatou makeke katoa ; E lotou tapono loa olatou gutu ki olatou lima, E tulituli loa olatou taliga.

¹⁷ E lotou epo loa le efu, ofaipe le gata, Ofaipe manu totolo o le kele ; E maua loa latou e le i, i tafa olatou kolo tau ; E lotou lulu loa i mua o le Eteleno, lotatou Atua ; E lotou i loa kiate koe.

¹⁸ Ko le Atua fea leia e tatau mo koe, Leia e fakamolemole ia le agaveli, leia e galoi ia agasala O le toetoega o lou tofiga ? E leaise taupau e ia lona sausau o lee gato, Talie e fiafia a ia i le manava alofa.

¹⁹ E toe manava alofa loa a ia kia matou, E tuku loa e ia ki lalo o ona vae amatou agaveli ; E ke ti loa ki le takele o le moana alatou agasala fuli.

²⁰ E ke fakasa loa lou agatonu kia Sakopo, Mo lou agamalie kia Apalaamo, Ofaipe le nea na ke fakapapau ki omatou tamana i aso o le temi afea