Mikea 6 - Tosi Tapu

Fakamaau a le Eteleno mo lona kakai

¹ Ke kotou fakalogo mai ki le nea leia e fakasa e le Eteleno : Ke ke tuu ki aluga, ke ke masau i mua o mauga, Ti ke logo a mauga liliki ki lou leo !…

² Kotou fakalogo, mauga, ki le fakamaau a le Eteleno, Ti mo koutou, fakatafito makeke o le kele ! Talie e ia se fakamaau a le Eteleno mo lona kakai, E loto a ia ke masau mo Iselaele.

³ Ei loku kakai, kolea le nea leia kua kau fai kiate koe ? Kolea le nea leia kua kau fakakaekae ai a koe ? Tali mai kiate au !

⁴ Talie na kau fakamavae a koe i le fenua o Esipito, Na kau saofaki a koe i le fale o le popula, Ti na kau kakau i ou mua Moisese, mo Alone mo Malia.

⁵ Ei loku kakai, manatui le nea leia na fakatuutuu e Palaki, sau o Moape, Ti mo le nea leia na tali kiate ia e Palaami, vosa o Peoli, Mei Sitime i Kilikale, O tupu ke ke iloa a tapuakina a le Eteleno.

⁶ Kolea le nea ke ano mo au ki mua o le Eteleno, Ke kau fakataulalo ai i mua o le Atua Taualuga ? Pe kau ano loa ki ona mua mo ni failaulau, Mo ni uviki pipi fetuu taki tasi ?

⁷ Pe tali loa e le Eteleno ni ovi tagata e afe mo afe, Mo ni vaitafe lolo e miliate mo miliate ? Pe kau soli loa loku vosa uluaki ki aku agatuu ? Le fua o loku manava ki le agasala o loku laumalie ?

⁸ Na fakasa kiate koe, ei tagata, le nea leia e malie ; Ti ko le nea leia e kole atu e le Eteleno kiate koe, Ke ke fai le nea leia e totonu, Ke ke alofa ki le manava alofa, Ti ke ke saele mo lou Atua i le agamalu.

⁹ E kalaga le leo o le Eteleno ki le kolo, Ti ko leia e poto e i loa ki lona suafa. Kotou logo ki le fakaaliali o le tautea ti mo leia e kakau ia a ia !

¹⁰ Pe koi maua i le fale o le tagata agaveli Ni koloa o le agasala, Ti mo se efa sala, nea fakatupu malaia ?

¹¹ Pe mea se tagata mo ni fua salasala, Ti mo ni kilo salasala i le taga ?

¹² Talie kua apele i le agamakeke le kau mou koloa o le kolo leinei, Ti kua masau loi lona kakai, Ti kua kaka olatou alelo i olatou gutu.

¹³ Koia leia e kau tautea ai loa a koe ki le mamae, E kau maumaui loa a koe o tupu ko au agasala.

¹⁴ E ke kai loa kae e leaise ke makona loa, Ti e nofo loa le fia kai iate koe ; E ke tanaki loa kae e leaise ke saofaki loa, Ti ko le nea leia e ke saofaki loa, E kau tuku loa a ia ki le seleta.

¹⁵ E ke muluki loa, kae e leaise ke tau ia loa, E ke tatau loa a fua o le oliveto, Kae e leaise ke fai loa ni pani ki le lolo ; E ke tatau loa a fua o le vite, kae e leaise ke inu loa ki se vino.

¹⁶ E tausi a agai fenua a Omeli Ti mo aga fuli o le fale o Akapo, Ti e kotou saele i alatou tokoi ; Koia leia e kau tuku ai loa a koe ki le maumau, Ti e kau fakaliliu loa lou kakai ko se nea fakakata, Ti e ke amo loa le luma o loku kakai.