Mikea 3 - Tosi Tapu

Valoki o pule o Iselaele

¹ E kau pati : Kotou fakalogo, pule o Sakopo, Ti mo aliki o le fale o Iselaele ! Pe leaise ko koutou ala e tonu ke iloa ia le faitotonu ?

² E kotou vesia ki le malie, kae e kotou alofa ki le veli ; E kotou foke le kili o le kakai ti e kotou too le kanofi i olatou ivi.

³ E lotou kai le kanofi o loku kakai, E lotou foke lona kili, Ti e lotou fatifatii ona ivi ; E lotou tuutuu latou ofaipe ni nea ke fakamoso i se kulo, Ofaipe ni inati i se kulo.

⁴ Ti e lotou kalaga loa ki le Eteleno, Kae e leaise tali loa a ia kia latou ; E fufu loa e ia kia latou ona mata i le temi lena, Talie na lotou fai ni gaoi veveli.

⁵ Koia e folafola ai le Eteleno ki le kau polofeta ala e fakasese ia loku kakai, Ala e fakasa ia le tokamalie mo kapau e maua e olatou nifo se nea ke uuti, Ala e fakasa ia le tau mo kapau e leaise soli ake se nea ki olatou gutu :

⁶ O tupu ko le nea lena, e kotou maua loa le pouli…, ti e leaise kotou toe maua loa se tio ! E kotou maua loa le fakapouli… kae leai ni folafola mei le Atua ! E to loa le laa ki polofeta ana, E fakapouli loa le malama o le ao kia latou.

⁷ E luma loa le kau kikite, ti e kukula loa le kau polofeta, E lotou uufi fuli loa olatou kaukava ; Talie e leaise tali loa le Atua.

⁸ Kae ko au, e kau apele i le makeke, i le Laumalie o le Eteleno ; E kau apele i le faitotonu ti mo le loto makeke, Ke fakasa kia Sakopo lana agaveli, Kia Iselaele lana agasala.

⁹ Koia, pule o le fale o Sakopo, mo aliki o le fale o Iselaele, Kotou fakalogo malie mai ki le nea leinei, Koutou ala e vesia ki le faitotonu, Ti e pikopikoi ia le nea leia e totonu,

¹⁰ Koutou ala e fakatuu ia Sione ki le toto, Ti mo Selusalemi ki le agaveli !

¹¹ E fakamaau ona pule ki ni nea alofa, Ona tagata faisakilifisio ki se totogi, Ti e kikite ona polofeta ki se paaga ; Ti e lotou toa i le fanaki ki le Eteleno, o pati : Pe leaise nofo le Eteleno i loto malie o tatou ? E leaise kaku mai loa le malaia kia tatou.

¹² Koia leia, o tupu ko koutou, E kenu ai loa Sione ofaipe se faisaga, E liliu ai loa Selusalemi ko se tuuga fatu, Ti mo le mauga o le fale tapu ko se tumutumu apele i le vao.