Mikea 1 - Tosi Tapu

Ita o le Eteleno ki Iselaele mo Suta

¹ Na fakasa le folafola a le Eteleno kia Mikea, mei Moleseti, i le temi o Sotame, mo Akase, mo Esekiasi, sau o Suta, kikite ki Samalia mo Selusalemi.

² Kotou fakalogo, koutou fuli, atu kakai ! Tokaga, kele, mo nea fuli iate koe ! Ke fakamaoki kia koutou le Aliki, le Eteleno, Le Aliki leia e nofo i le fale sau o lona maokioki !

³ Talie ko leinei, e ulu mai le Eteleno mei lona nofoaga, E ifo mai a ia, e saele a ia i potu taualuga o le kele.

⁴ I ona vae e susua a mauga, E mafaafaa a vaivailiua, Ofaipe le silo i le afi, Ofaipe le vai leia e sali mei se mauga.

⁵ Ti ko nea fuli ana o tupu ko le agaveli a Sakopo, O tupu ko agasala o le fale o Iselaele ! Kolea le agaveli a Sakopo ? Pe leaise ko Samalia ? Koa ganea taualuga o Suta ? Pe leaise ko Selusalemi ?…

⁶ E kau fakaliliu loa Samalia ko se tuuga fatu i faisaga, Ko se ganea ke to ai le vite ; E kau laku loa ona fatu ki le vaivailiua, E kau tuku loa ke telefua ona fakavae.

⁷ E fatifatii loa ona fakatata togi fuli, E tutu loa i le afi ona totogi kelekele fuli, Ti e kau maumaui loa ona taulaatua fuli, Ala na maua ki le totogi o le faiaga, E lotou liliu loa ko se totogi o le faiaga…

⁸ Koia leia e kau tagi ai loa, e kau tagi laulau loa, E kau saele kilii vae loa mo fakatekateka loa, E kau kalaga loa ofaipe se kuli vao, Ti e kau tagi loa ofaipe le otulusi.

⁹ Talie e mamae lona lavea, E mafola a ia o kaku ki Suta, E ulu a ia o kaku ki le matapa o loku kakai, O kaku ki Selusalemi.

¹⁰ Aua na kotou fakasa a ia i Kate, Aua na kotou tagi i Ako ! E kau fuliteka i le efu i Pete-Leafala.

¹¹ Fakalaka, a koe leia e nofo i Safili, i le telefua mo le luma ! E leaise koi toa leia e nofo i Tesanani i le ulu ki fafo. E tagi laulau leia e nofo i Pete-Aetesele, Ti e leaise koi feala ke sola ki ai.

¹² E lulu le kakai o Maloti o tupu ko lona mauli, Talie kua vilo le malaia mei le Eteleno O kaku ki le matapa o Selusalemi.

¹³ Kakai o Lakisi, sai ni osi gasolo ki lau saliote ! Na ke liliu ki le taine o Sione ko se uluaki tupuaga o le agasala, Talie iate koe na maua ai a agasala a Iselaele.

¹⁴ Koia leia e ke fakafiti ai loa kia Moleseti-Kate ; E liliu loa a fale o Akesipe ko se matapuna kaka ki sau o Iselaele.

¹⁵ Kakai o Malesa, e kau aumai loa kiate koe se pule foou ; E ano loa le kololia o Iselaele o kaku ki Atulami.

¹⁶ Kakai o Selusalemi, tele okoutou gutu, koti okoutou ulu, O tupu ko au fanau alofaina ! Tele okoutou ulu ofaipe le akuila, Talie kua lotou ano popula o mamao meia koutou !