Mateo 8 - Tosi Tapu

Fakamauli o se tagata kilia

¹ I le ifo a Sesu mei le mauga, na muli loa iate ia se kakai toka api.

² Ti ko leinei, na fakafeofi ake loa se tagata kilia o tulolo i ona mua, o pati : Aliki, kapau e ke loto ki ai, e mafai ke ke fakamea au.

³ Na falo loa e Sesu lona lima, o fafa kiate ia, o pati : E kau loto ki ai, ke ke mea. I le lakaga fai lena na mea loa a ia i lona kilia.

⁴ Na pati loa Sesu kiate ia : Tokaga ke aua na ke fakasa a ia ki se tasi ; kae ke ano, o fakasa a koe ki le tagata faisakilifisio, ti mo ke ave le moliga leia na tosi e Moisese, ke fakamaoki ai kia latou.

Fakamauli o le tagata fakasausau a le setulio

⁵ I le ulu a Sesu ki le kolo ko Kafanaume, na fakatuu loa a ia e se setulio,

⁶ o kolekole kiate ia, o pati : Aliki, ko laku tagata fakasausau e moe i fale, e palalisia ti e mamae lasi ai.

⁷ Na pati loa Sesu kiate ia : E kau ano loa, ti e kau fakamauli loa a ia.

⁸ Na tali loa le setulio : Aliki, e leaise aoga ke ke ulu mai ki loku loto fale, kae ke pati mai fua se folafola, ti e mauli loa laku tagata fakasausau.

⁹ Talie, ko au leinei e maua ke fakalogo ki oku pule, e kau pule ki ni tagata solia ; ti e kau pati ki se tasi : Ano !, ti e ano a ia ; ki leia ake : Au !, ti e au a ia ; ti ki laku tagata fakasausau : Fai le nea lena !, ti e fai e ia a ia.

¹⁰ I lana logo ki lana masau, na ofolele Sesu, ti na pati loa a ia kia latou ala na muli iate ia : E kau pati maoki atu kia koutou, i Iselaele foki, e leikiaise kau maua se tui makeke feneeki.

¹¹ Ti e kau fakasa atu kia koutou, e au loa se toka api mei le sopoaga o le laa mo le viloaga o le laa, ti e lotou eke loa i le laupapa mo Apalaamo, mo Isaake, ti mo Sakopo i le Puleaga o Selo.

¹² Kae e ti loa a vosa o le Puleaga ki le fakapouli o fafo, ki le ganea leia e logo ai loa ni tagi mo ni fetati o nifo.

¹³ Ti na pati loa Sesu ki le setulio : Ano, ti ke fai kiate koe, ofaipe lau tui. Ti na mauli loa le tagata fakasausau i le ola totonu lena.

Fakamauli o le tinana o le avaga a Petelo

¹⁴ Na ano loa Sesu ki le fale o Petelo, ti na tio loa a ia ki le tinana o lona avaga e moemoe, kua maua a ia e le fiva.

¹⁵ Na fafa loa Sesu ki lona lima, ti na mavae loa le fiva iate ia ; ti na tuu ake loa a ia ki aluga, o fakasausau kia Sesu.

¹⁶ I le afiafi, na aumai loa kia Sesu ni tagata avagaia e toka api ai. Na kapu loa e ia a laumalie veli ki lana folafola, ti na fakamauli loa e ia le kau masaki fuli,

¹⁷ o tupu ke fakasoko le nea leia na fakasa fakatomua e le polofeta ko Isaia : Na too e ia otou maimoa, ti na amo e ia otou masaki.

Asiasii o le kau tisipulo

¹⁸ Ko Sesu, i lana tio ki se kakai toka api leia na takatakai ia a ia, na fakatotonu loa ke fakalaka ki leia ake kauvai.

¹⁹ Na fakafeofi ake loa se sekelipa kiate ia, o pati : Pule, e kau muli atu loa iate koe i ganea fuli ala ka ke ano ai loa.

²⁰ Na tali loa Sesu kiate ia : E maua e lenato ni olatou nofoaga, ti e maua e manu lele o le lagi ni olatou ofaga ; kae e leaise maua e le Vosa o le tagata se ganea leia ke fakamalolo ai lona ulu.

²¹ Na pati loa se tasi i le kau tisipulo kiate ia : Aliki, fakataga mai mua ke kau ano o tanu loku tamana.

²² Kae na tali loa Sesu kiate ia : Muli mai iate au, ti tuku le kau mate ke tanu ia olatou mate.

Taofi e Sesu o le afaa

²³ Na sopo loa a ia ki le vaka, ti na muli loa ana tisipulo iate ia.

²⁴ Ti ko leinei, na to loa se afaa lasi i le tai, ti kua ta fakaveliveli loa le vaka e galu. Kae ko ia, na moe mate a ia.

²⁵ Na fakafeofi ake loa le kau tisipulo, o fafagu a ia, o pati : Aliki, saofaki tatou na tou mamate !

²⁶ Na pati loa a ia kia latou : Kolea e kotou i ai, kakai tui gaegae ? Na tuu loa a ia ki aluga, o feau le matagi mo le tai, ti na tokamalie lasi loa.

²⁷ Na ofolele loa a tagata ana, o lotou pati : Ko ai le tagata leinei, ke fakalogo foki ki ai le matagi mo le tai ?

Kapu e Sesu o temonio i Katala

²⁸ I le kaku a Sesu ki leia ake fetuu tai, ki le fenua o le kau Katala, na ulu mai loa ni tagata e toka lua mei ni tanuma, o au ki ona mua. Na fakamamae a tagata ana e se kau temonio. Na la itaita veli ai, o leaise feala ke fakalaka se tasi i le ala lena.

²⁹ Ti ko leinei, na la kalaga loa kiate ia : Kolea le nea leia e ke loto kia matou, Sesu, Alo o le Atua ? Pe na ke au ki leinei o fakamamae matou i mua o le temi ?

³⁰ Na i ai se kau puaka lasi leia na kai o mamao meia laua.

³¹ Na kole loa e le kau temonio kia Sesu, o pati : Kapau e ke kapu matou, kakau matou ki le kau puaka leinei.

³² Na pati loa a ia kia latou : Kotou ano ! Na lotou mavae loa, ti na lotou ulu loa ki le kau puaka. Ti ko leinei, na maluluku loa le kau puaka katoa mei le fakamakilakila ki le tai, ti na lotou mamate loa i ai.

³³ Ko latou ala na fagai ia le kau puaka na sosola loa, ti na lotou ano loa ki le kolo o fakamatala i ai a nea fuli ala na soko ki le kau puaka, ti mo le nea leia na soko ki le sa tagata avagaia.

³⁴ Na au loa le kolo katoa o fakafelavei kia Sesu ; i lalatou tio kiate ia, na lotou kolekole loa kiate ia ke mavae a ia i lolatou fenua.