Mateo 6 - Tosi Tapu

Valoki o le tausi ki le Atua i tafa

¹ Kotou tokaga ki le fai o lokoutou agatonu, ke aua na kotou fai a ia i mua o tagata, o tupu ke tioi koutou : talie kapau ko ia, ti e leaise kotou maua loa se fakapale i tafa o lokoutou Tamana leia e nofo i le lagi.

² Koia ka ke soli ia se nea, aua na ke pupusi le fakatagi i ou mua, ofaipe le fai e le kau malualoi i sinakoka ti mo ala, o tupu ke viki ai latou e tagata. E kau pati maokioki atu kia koutou, kua lotou maua lolatou fakapale.

³ Kae ka ke soli ia se nea alofa, ke aua na iloa e lou lima sema le nea leia e fai e lou lima atamai,

⁴ o tupu ke fai fakafufu lou nea alofa ; ti e toe liufaki atu loa a ia kiate koe e lou Tamana leia e tio i le ganea fakapulipuli.

Akonaki ki le faikole

⁵ Ka kotou faikole, aua na kotou faipe le kau malualoi, ala e fia faikole tutuu i sinakoka ti mo magai ala, o tupu ke tioi latou e tagata. E kau pati maoki atu kia koutou, kua lotou maua lolatou fakapale.

⁶ Kae ka ke faikole, ulu ki lou kogafale, tapono lou matapa, ti ke faikole ki lou Tamana leia e nofo i ai i le ganea fakapulipuli ; ti ko lou Tamana, leia e tio i le ganea fakapulipuli, e toe liufaki ia atu loa a ia kiate koe.

⁷ Ka kotou faikole, aua na kotou liuliuga ni kupu noa ofaipe le kau pagani, ala e manatu e tali loa alatou kole i le mauke o alatou masau.

⁸ Aua na kotou fakatatau kia latou talie e iloa e lokoutou Tamana le nea leia e aoga kia koutou, i mua o lakotou kole kiate ia.

⁹ Koia e tonu ai ke kotou faikole feneeki : Lomatou Tamana leia e nofo i le atu lagi ! Ke tapusa lou suafa ;

¹⁰ ke aumai lou pule ; ke fai lou finegalo i le kele ofaipe i Selo.

¹¹ Soli mai kia matou i le aso nei le pane o aso taki tasi ;

¹² fakamolemole mai ki amatou agasala, ofaipe lamatou fakamolemole foki kia latou ala e agasala mai kia matou ;

¹³ aua na ke tuku matou ki le fakasala, kae fakamauli matou mei le pule veli. Talie a au le pule, mo le mafimafi ti mo le kololia i sekulo fuli. Amene !

¹⁴ Kapau e kotou fakamolemole ki tagata alatou agasala, e toe fakamolemole loa e lokoutou Tamana i Selo kia koutou foki ;

¹⁵ kae kapau e leaise kotou loto fakamolemole ki tagata, e leaise fakamolemole foki e lokoutou Tamana akoutou agasala.

Sesunio

¹⁶ Ka kotou sesunio, aua na kotou mata mamae, ofaipe le kau malualoi, ala e fetogi olatou mata talie ke fakasa ai ki tagata e lotou sesunio. E kau pati maoki atu kia koutou, kua lotou maua lolatou fakapale.

¹⁷ Kae kapau e ke sesunio, fakamanogi lou ulu ti fufulu ou mata,

¹⁸ ke aua na sa ki tagata e ke sesunio, kae ke sa ki lou Tamana leia e nofo i lena i le ganea fakapulipuli ; ti ko lou Tamana, leia e tio i le ganea fakapulipuli, e liufaki ia atu loa a ia kiate koe.

Se koloa fufu i Selo

¹⁹ Aua na kotou tanaki ni koloa i le kele leinei, talie ko le ganea lena e maumau ai le ugogo mo le kelemea, ti ko le ganea foki lena e puui ai ti mo kaia ai le tagata kaia ;

²⁰ kae ke kotou tanaki ni koloa i Selo, talie ko le ganea lena e leaise maumau ai le ugogo mo le kelemea, ti e leaise puui ai mo kaia ai le tagata kaia.

²¹ Talie ko le ganea leia e tuku ai lou koloa, e tuku ai foki lou loto.

²² Ko le fa mata ko le malama a ia o le tino. Kapau e malie lou fa mata, e malama loa lou tino katoa ;

²³ kae kapau e veli lou fa mata, e fakapouli loa lou tino katoa. Kapau loa ko le malama leia e maua iate koe e fakapouli, e feaki loa le lasi o le fakapouli lena !

²⁴ E leaise mafai e se tasi ke tausi ki ni pule e toka lua. Talie, pe vesia loa a ia ki le tasi, kae e alofa loa a ia ki le tasi ; pe pipiki loa a ia ki le tasi, kae tiaki loa e ia le tasi. E leaise mafai ke kotou tausi ki le Atua mo Mamone.

Tuania mo i

²⁵ Koia e kau pati atu kia koutou : Aua na kotou tuania ki lokoutou mauli ki le nea leia e kotou kai loa, pe ki lokoutou tino ki le nea leia e kotou lava loa. Pe leaise mauiga ake le mauli i le nea kai, pe leaise mauiga ake le tino i le nea lava ?

²⁶ Kotou tio ki manu lele o le lagi : E leaise lotou to magiti pe lotou utu, ti e leaise lotou tanaki fua se nea i ni fale tanaki magiti ; kae e fagai latou e lokoutou Tamana i Selo. Pe leaise kotou mauiga lasi ake ia latou ?

²⁷ Ko ai leia ia koutou e mafai ke fakaloaloa ia lona mauli i se tukilima e tasi ki ona tuania ?

²⁸ Ti kolea e kotou tuania ai ki le nea lava ? Kotou tio mua pe feaki le tutupu ake o se o le vao : E leaise lotou gaoi pe lalaga ;

²⁹ Kae e kau pati atu kia koutou ko Salomone foki, i lona kololia katoa, na leaise teuteu ofaipe se tasi ia latou.

³⁰ Kapau kua teuteui fenaaki e le Atua le mutie o le vao, leia e mauli i le aso nei, kae e tiaki loa apogipogi ki le afi, pe leaise lasi ake le fia fakalava loa e ia koutou, kakai tui gaegae ?

³¹ Aua na kotou tuania fua, ti aua na kotou pati : Kolea loa ka tou kai ? Pe : Kolea loa ka tou inu ? Pe : Kolea loa ka tou lava ?

³² Talie ko nea fuli ana e afa e le kau pagani, kae e iloa e lokoutou Tamana i Selo e lotou aoga kia koutou.

³³ Kotou afa mua le Puleaga mo le faitotonu a le Atua, ti e fakalasi atu loa a nea fuli ana kia koutou.

³⁴ Aua na kotou tuania loa le apogipogi, talie e tokaga le apogipogi kiate ia totonu. Ki aso taki tasi e feauga lona mamae.