Mateo 4 - Tosi Tapu

Fakasalai o Sesu-Kilisito

¹ I le oki o le nea lena, na taki loa Sesu e le Laumalie Maokioki ki le toafa ke fakasalai ai e le Tiapolo.

² Na sesunio loa a ia i aso e kau fa mo po e kau fa, ti na fia kai loa a ia.

³ Na fakafeofi ake loa le fakasala, o pati kiate ia : Kapau ko le Alo a koe o le Atua, fakatotonu ke liliu a fatu ana ko ni pane.

⁴ Na tali loa Sesu : E tuu i le Tosi : E leaise mauli fua le tagata ki le pane, kae ki folafola fuli ala e au mei le gutu o le Atua.

⁵ Na ave loa a ia e le Tiapolo ki le kolo tapu, o fakanofo i aluga o le fale tapu,

⁶ ti na pati loa a ia kiate ia : Kapau ko le Alo a koe o le Atua, sopo ki lalo ; talie e tuu i le Tosi : E tuku loa e ia ni fakatotonu ki ana aselo o uiga mo koe ; Ti e lotou amo loa a koe i olatou lima, Ke aua na tegea lou vae ki se fa fatu.

⁷ Na pati loa Sesu kiate ia : E tuu foki i le Tosi : E leaise ke asiasii loa le Aliki lou Atua.

⁸ Na toe ave loa a ia e le Tiapolo ki se mauga taualuga ai, ti na fakasa loa e le Tiapolo kiate ia a puleaga fuli o le malama nei mo olatou kololia,

⁹ ti na pati loa a ia kiate ia : E kau soli atu loa kiate koe a nea fuli ana mo kapau e ke tulolo o atolasio mai kiate au.

¹⁰ Na pati loa Sesu kiate ia : Fakamamao atu iate au Satana ! Talie e tuu i le Tosi : E ke atolasio loa ki le Aliki, lou Atua, ti e ke tausi loa kiate ia toka tasi.

¹¹ Ti na tuku loa a ia e le Tiapolo. Ti ko leinei, na au loa se kau aselo kiate ia, ti na lotou fakasausau loa kiate ia.

Kamataaga o le gaoi a Sesu i Kafanaume

¹² Ko Sesu, i lana logo kua pilisoni Soane, na mavae loa o ano ki Kalilea.

¹³ Na leaise nofo loa a ia i Nasaleti, kae na ano loa a ia o nofo i Kafanaume, leia na tuu i le kauvai o le tai o Kalilea, i le fenua o Sapulone mo Nefetali,

¹⁴ o tupu ke fakasoko ai le folafola leia na fakasa e le polofeta ko Esaia :

¹⁵ Ko le kakai o Sapulone mo Nefetali, Mo le fenua leia e tuu i le mata tai, Ti mo le fenua leia e tuu i leia atu fetuu o le Solotane, Ti mo le Kalilea o le kau pagani,

¹⁶ Ko le kakai lena, na tonatona i le fakapouli, Kua tio ki se malama lasi ; Ti kua sopo le malama Kia latou ala na nonofo i le fenua ti mo le malu o le mate.

¹⁷ Na kamata loa mei ai le akonaki a Sesu, ti na pati loa a ia : Kotou fakasemala talie kua ofi mai le Puleaga o Selo.

Kalagai o uluaki tisipulo

¹⁸ I lana saele i le mata tai o Kalilea, na tio loa a ia ki se tautaina, ko Simone, leia na igoa ko Petelo, mo Atelea, lona taina, ala na fola ia se kupega i le tai ; talie ko ni tagata tautai laua.

¹⁹ Na pati loa a ia kia laua : Kolua muli mai iate au, ti e kau fakaliliu loa koulua ko ni tagata tautai tagata.

²⁰ I le lakaga fai lena, na la tuku loa ola kupega, ti na la muli loa iate ia.

²¹ Ti na ano loa a ia mei ai, ti na tio loa a ia ki se tasi tautaina, ko Sakopo mo lona taina ko Soane, vosa o Sepeteo, ala na nonofo i se vaka mo Sepeteo, lola tamana, ti na lotou onoono olatou kupega.

²² Na kalagai loa laua e Sesu, ti i le lakaga fai lena, na la tuku loa le vaka mo lola tamana, kae na la muli loa iate ia.

Gaoi a Sesu-Kilisito i Kalilea

²³ Na feanoaki loa Sesu i Kalilea katoa, o akonaki i sinakoka, mo fakasa ia le logo malie o le Puleaga, ti mo fakamauli a masaki mo maimoa fuli i le kakai.

²⁴ Na mafola loa lona logologona i le fenua katoa o Silia, ti na aumai loa kiate ia latou fuli ala na mamae i ni masaki ti mo mamae kesekese, mo ni kakai ala na nofo ai ni temonio, mo ni kakai ala na masaki tete, mo ni kakai palalisia, ti na fakamauli loa e ia latou.

²⁵ Na muli loa iate ia ni kakai toka api, mei Kalilea, mo Tekapole, mo Selusalemi, mo Sutea, ti mo leia atu fetuu o le Solotane.