Mateo 3 - Tosi Tapu

Soane-Patita

¹ I le temi lena na sa loa Soane-Patita o akonaki i le toafa o Sutea.

² Na pati a ia : Kotou fakasemala, talie kua ofi mai le Puleaga o le atu lagi.

³ Ko Soane ko ia leia na pati ki ai le polofeta ko Isaia, i lana pati : Ko leinei le leo o leia e kalaga i le toafa : Kotou teuteu le ala o le Aliki, Kotou fakasakosako ona ala liliki.

⁴ Na kofu Soane ki ni fului kamelo, ti na toi e ia se kilipipi i lona sulugalava. Na kai a ia ki ni seseivaka ti mo le meli vao.

⁵ Na au kiate ia a kakai mei Selusalemi, mo Sutea katoa ti mo le fenua katoa o Solotane ;

⁶ ti na lotou kofesio fakalauatea alatou agasala, ti na papitema latou e Soane i le vai o Solotane.

⁷ Kae, i lana tio ki le au o ni faliseo mo ni Satuseo toka api ki lana papitema, na pati loa a ia kia latou : Lanu o gata velo, ko ai leia na ako atu ia kia koutou ke sola i le sausau leia ka vilo mai ?

⁸ Kotou fakatupu mua se fua leia e gali ti mo feauga mo le fakasemala,

⁹ ti aua na kotou pati i okoutou loto : Ko Apalaamo ko lomatou tamana ! Talie e kau fakasa kia koutou, mei fatu anei, e mafai ke fakatupu e le Atua ni fanau kia Apalaamo.

¹⁰ Kua tuu foki le toki i le aka o laakau : ko laakau fuli e leaise fua ki ni fua malilie e tuuti loa o ti ki le afi.

¹¹ Ko au, e kau papitema koutou ki le vai o uiga mo le fakasemala, kae ko ia loa leia e olo mai kiate au e makeke ake iate au, ti e leaise kau gali ke kapa ki ona taka. Ko ia leia e papitema ia loa koutou ki le Laumalie Maokioki ti mo le afi.

¹² E too e ia i lona lima lana laakau sasa fulumeto, ti e fakamea loa e ia lona sasaaga fulumeto, ti e tanaki loa e ia lana fulumeto ki le fale tanaki magiti, kae e tutu loa e ia a kaui fulumeto i se afi leia e leaise toe mate.

Papitema o Sesu-Kilisito

¹³ Ti na au loa Sesu mei Kalilea ki le Solotane kia Soane, ke papitema a ia e Soane.

¹⁴ Kae na taofi loa a ia e Soane, o pati : Ko au leia e aoga ke ke papitemai, kae e ke au kiate au !

¹⁵ Na tali loa Sesu kiate ia : Tuku ke fai i le lakaga nei, talie e malie ake ke ta fakasoko i ai a nea fuli ala e totonu. Ti na leaise toe taofi loa a ia e Soane.

¹⁶ I le oki o lona papitema, na mavae loa Sesu mei le vai. Ti ko leinei, na mavaa loa le atu lagi, ti na tio loa a ia ki le Laumalie o le Atua e ifo mai ofaipe se lupe tea, o au kiate ia.

¹⁷ Ti ko leinei, na kalaga loa se leo mei le lagi, o fakasa a masau anei : Ko ia leinei ko loku Alo alofaina, leia kua kau tuku ki ai loku alofa katoa.