Mateo 28 - Tosi Tapu

Toe tuuake o Kilisito mo nea na soko

¹ I le oki o le sapato, i le mafoata o le uluaki aso o le vasaa, na ano loa Malia mei Maketala, mo leia ake Malia, o tio ki le tanuma.

² Ti ko leinei, na to loa se mafuike lasi ; talie na ifo mai se aselo o le Aliki mei lagi, o fulusi le fatu, ti na ekeeke loa a ia i ona aluga.

³ Na fai ona mata pe se uila, ti na tea lona kofu ofaipe le nive.

⁴ Na lulu loa le kau tagata leo i le i, ti na lotou liliu loa ofaipe ni mate.

⁵ Kae na masau loa le aselo, o pati ki fafine : Kia koulua, aua na kolua i ; talie e kau iloa e kolua afa Sesu leia na tutuki i le koluse.

⁶ E leaise nofo a ia i leinei ; kua toe tuuake a ia ofaipe lana fakasa ia. Kolua au o tio ki le ganea leia na moe ai a ia,

⁷ ti kolua ano vave o fakasa ki ana tisipulo kua toe tuuake a ia mei le kau mate. Ti ko leinei, kua muamua a ia ia koutou ki Kalilea : I ai e kotou tio loa kiate ia. Ko leinei, kua kau fakasa atu a ia kia koulua.

⁸ Na la fakamamao fakatavili loa mei le tanuma, i se i ti mo se fiafia lasi, ti na la makape loa, o ave le logo ki le kau tisipulo.

⁹ Ti ko leinei, na au loa Sesu o fakafelavei kia laua, o pati : E kau fakaalofa atu kia koulua. Na la fakafeofi ake loa o too ona vae, ti na la atolasio loa kiate ia.

¹⁰ Ti na pati loa Sesu kia laua : Aua na kolua i ; kolua ano o pati ki oku fetaina ke lotou ano ki Kalilea : I ai e lotou tio loa kiate au.

Totogi paaga o le kau solia

¹¹ I le lolotoga o lala ano i le ala, na ulu loa ni tagata o le kau leo ki le loto kolo, o fakasa ki le kau pule faisakilifisio a nea fuli ala na soko.

¹² Na fakatasi loa le kau pule faisakilifisio mo le kau fakamatuatua, ti na lotou loto tasi loa ke soli se paaga lasi ki le kau solia,

¹³ o pati : Kotou pati : Na au ana tisipulo i le pouli o kaia a ia, kae motou momoe.

¹⁴ Ti kapau e logo loa le kovana ki le nea lena, e motou fakamalu ia loa lona loto, kae motou saofaki loa koutou.

¹⁵ Na too loa e le kau solia le paaga, o mulimuli ki le fakatuutuu leia kua tuku ake kia latou. Ti na mafola loa le logo lena i le kau Sutea, o kaku mai ki le aso nei.

Tuku o se gaoi foou ki tisipulo i Kalilea

¹⁶ Na ano loa le kau tisipulo e tino agafulu tupu tasi ki Kalilea, ki le mauga leia na fakatotonu e Sesu kia latou.

¹⁷ I lalatou tio kiate ia, na lotou atolasio loa kiate ia. Kae na lotolotolua loa ni iki.

¹⁸ Na fakafeofi ake loa Sesu o masau kia latou, o pati : Kua tuku mai kiate au a pule fuli i le lagi mo le kele.

¹⁹ Kotou ano, kotou fai ni tisipulo i puleaga fuli, o papitema latou i le suafa o le Tamana, mo le Alo mo le Laumalie Maokioki,

²⁰ ti kotou ako latou ke lotou fai a nea fuli ala na kau fakatotonu atu kia koutou. Ti ko leinei, e kau nofo mo koutou i aso fuli, o kaku ki le fakaoki o le malama nei.