Mateo 27 - Tosi Tapu

Tuku o Sesu kia Pilato

¹ I le usu ake, na fono loa le kau pule faisakilifisio fuli mo le kau fakamatuatua o le kakai ke tamate Sesu.

² Na lotou sai loa a ia, ti na lotou ave loa a ia kia Posio Pilato, le kovana.

Fakasemala noa a Sutasi

³ Ti ko Sutasi, leia na fakatau ia Sesu, i lana tio kua tautea a ia ki le mate, na fakasemala lasi loa a ia, ti na liufaki loa e ia a fa paaga siliva e kau tolu ki le kau pule faisakilifisio ti mo le kau fakamatuatua,

⁴ o pati : Kua kau agasala i le fakatau o le toto mea. Na lotou tali loa : Kolea lona aoga mai kia matou ? Ko le nea fai lena a au toka tasi !

⁵ Na ti loa e Sutasi a fa paaga siliva ki le fale tapu, ti na mavae loa a ia o ano, o nonoa lona ua ke tautau.

⁶ Na tae loa e le kau pule faisakilifisio le paaga, o pati : E leaise taga ke tuku le paaga leinei ki le koloa tapu, talie ko le totogi a ia o le toto.

⁷ Ti na lotou fono loa ke totogi ki le paaga lena le kele o le tagata faiipu, ke tanu ai a matapule.

⁸ Koia na fakaigoa ai le kele lena, ko le kele o le toto, o kaku mai ki le aso nei.

⁹ Na fakasoko ai loa le nea leia na fakasa fakatomua e Selemia, le polofeta : Na lotou too a fa paaga siliva e kau tolu, ko le lasi o le totogi leia na lotou fakatuutuu kiate ia, ti na fakafuafua e fanau o Iselaele ;

¹⁰ ti na lotou soli le paaga lena ke totogi ai le kele o le tagata faiipu, ofaipe lona fakatotonu mai kiate au e le Aliki.

Sesu i mua o Pilato

¹¹ Na tuu loa Sesu i mua o Posio Pilato, le kovana. Ti na vesili loa le kovana kiate ia, o pati : pe ko le sau a koe o le kau Sutea ? Na tali loa Sesu kiate ia : Kua ke pati ki ai.

¹² Kae na leaise tali fua e ia se nea ki fakalakasala a le kau pule faisakilifisio mo le kau fakamatuatua.

¹³ Ti na pati loa Pilato kiate ia : Pe leaise ke logo ki le lasi o nea ala e lotou lau kiate koe ?

¹⁴ Ti na leaise tali loa Sesu ki se masau fua e tasi, ti na ofolele lasi ai le kovana i le nea lena.

Ko Sesu pe ko Palapasi

¹⁵ I aso lasi fuli, i le aga masani, e fakalauatea loa e le kovana se tagata pilisoni, leia e kole ake loa e le kakai.

¹⁶ Na i ai loa se tagata pilisoni logologona, leia na igoa ko Palapasi.

¹⁷ Na lotou fakatasi loa, ti na pati loa Pilato : Ko ai e kotou loto ke tuku atu, ko Palapasi pe ko Sesu, leia e igoa ko Kilisito ?

¹⁸ Talie na iloa e ia, na lotou fakatau Sesu i lolatou finenonofo.

¹⁹ I lana nofo i le telepinale, na fakasa loa e lona avaga kiate ia : Ke aua na i ai fua se nea i le vasa o ou mo le tagata agatonu lena ; talie i le aso nei na kau mamae lasi ai i laku moe miti o tupu ko ia.

²⁰ Na fakalotoi loa e le kau pule faisakilifisio mo le kau fakamatuatua le kakai ke lotou kole Palapasi, kae ke tamate Sesu.

²¹ Na masau loa le kovana, o pati kia latou : Ko ai ia laua e kotou loto ke kau fakalauatea atu kia koutou ? Na lotou tali loa : Ko Palapasi.

²² Na pati loa Pilato kia latou : Kolea loa le nea ke kau fai kia Sesu, leia e igoa ko Kilisito ? Na lotou tali fuli loa : Ke tutuki a ia i le koluse !

²³ Ti na pati loa le kovana : Kae kolea le nea veli leia kua fai e ia ? Ti na lotou toe kalaga leo lasi oki loa : Ke tutuki a ia i le koluse !

²⁴ I le tio a Pilato e leaise malo a ia i se nea fua, kae kua asilisili le maveuveu, na too loa e ia se vai, ti na fanofano loa e ia ona lima i mua o le kakai, o pati : E kau mea i le toto o le tagata agatonu lena. Ko le nea lena a koutou fai a ia.

²⁵ Ti na tali loa le kakai katoa : Ke vilo lona toto kia matou mo amatou fanau !

²⁶ Ti na tuku loa e Pilato kia latou Palapasi ; kae na taofi loa e ia Sesu ke sasa ki ni laakau, mo tuku loa a ia ke tutuki i le koluse.

Pala talatala o Sesu ; taki ki Kolokota.

²⁷ Na taki loa Sesu e le kau solia a le kovana ki le peletolio, ti na lotou fakatasii loa ki ona tafa le kau solia katoa.

²⁸ Ti na lotou too loa ona kofu, kae lotou fakakofu loa a ia ki se taupulupulu kula malie.

²⁹ Ti na lotou fili loa se pala talatala, o teki ki lona ulu, ti na lotou fakatoo loa ki lona lima atamai se fa u ; ti oki, na lotou tutuli loa i ona mua, ti na lotou nukinuki loa kiate ia, o pati : Malo, sau o le kau Sutea !

³⁰ Ti na lotou anuanusi loa a ia, ti na lotou too loa le fa u, o sasa ai lona ulu.

³¹ I le oki o lalatou gologolo kiate ia, na lotou too loa iate ia le taupulupulu, kae lotou toe fakatui loa kiate ia ona kofu, ti na lotou ave loa a ia ke tutuki i le koluse.

Tutuki o Sesu ki le koluse

³² I lalatou mavae mai, na lotou felavei loa mo se tagata mei Silene, leia na igoa ko Simone, ti na lotou fakamakeke loa a ia ke amo le koluse o Sesu.

³³ Na lotou kaku loa ki le ganea leia na igoa ko Kolokota, ko lona uiga ganea o le ulupoko,

³⁴ ti na lotou fakainu loa kiate ia se vino kua sui ki le au kona, kae, i lana asiasii a ai, na leaise inu loa e ia.

³⁵ Ti na lotou tutuki loa a ia ki le koluse, ti na lotou vae loa ona kofu, o toso, ke fakasoko ai le folafola a le polofeta : Na lotou vae oku kofu, ti na lotou toso, pe ko ai ka maua ia loku taupulupulu.

³⁶ Ti na lotou tonatona loa, o leo a ia.

³⁷ Na tosi i aluga o lona ulu le tupuaga o lona mate : Ko ia leinei ko Sesu, ko le sau o le kau Sutea.

³⁸ Na latou tutuki loa a ia i le koluse o fakatasi mo ni tagata kaia e toka lua, ko le tasi i lona fetuu atamai, ti ko leia ake i lona fetuu sema.

³⁹ Ko latou ala na fakalaka i ai na nukinuki loa kiate ia, ti na lotou kalo loa olatou ulu,

⁴⁰ o pati : A koe leia e maumaui ia le fale tapu, ti e toe fakatuu ia a ia i ni aso e tolu, saofaki a koe totonu ! Ti kapau ko le Alo a koe o le Atua, ifo mai mei le koluse ki lalo !

⁴¹ Ti na gologolo foki le kau pule faisakilifisio, mo le kau sekelipa ti mo le kau fakamatuatua, kiate ia, o pati :

⁴² Na saofaki e ia ala, kae e leaise mafai e ia ke saofaki a ia totonu ! Kapau ko le sau a ia o Iselaele, ke ifo a ia mei le koluse, ti e motou tui loa kiate ia !

⁴³ Na fanaki a ia ki le Atua, ke saofaki a ia e le Atua i le lakaga nei, mo kapau e alofa le Atua kiate ia. Talie na pati a ia : Ko le Alo au o le Atua !

⁴⁴ Ti na toe pati veli fenaaki kiate ia a tagata kaia e toka lua, ala na tutuki i ni koluse o fakatasi mo ia.

Mate o Sesu

⁴⁵ I le lalatea na fakapouli loa le malama nei katoa o kaku ki le ola tolu sili lalatea.

⁴⁶ Ti i le ola tolu, na kalaga loa Sesu o leo lasi : Eli, Eli, Lama Sabachthani ! Ko lona uiga : Ei loku Atua, ei loku Atua, kolea kua ke tiaki ai au ?

⁴⁷ Ko iki ia latou ala na tutuu i ai, i lalatou logo kiate ia, na pati loa : E kalaga a ia kia Elia !

⁴⁸ I le lakaga lena, na makape loa se tasi o latou o too se fa unu, o fakasusu a ia ki le vinika, o tuii a ia ki se fa u, o soli a ia kiate ia ke inu.

⁴⁹ Kae na pati ni iki : Tuku mua ke tou tio pe au loa Elia o saofaki a ia.

⁵⁰ Na toe kalaga leo lasi loa Sesu, o tuku lona laumalie.

⁵¹ Ti ko leinei, na masae loa le kie o le fale tapu mei aluga ki lalo, ti na galulu loa le kele, ti na mafaafaa loa a utu,

⁵² ti na mavaa loa a tanuma, ti na toe tuuake loa a tino o ni kau sagato toka api.

⁵³ Na lotou mavae loa mei tanuma, ti na lotou ulu loa ki le kolo tapu, i le oki o le toe tuuake o Sesu, ti na lotou sa loa ki ni kakai toka api.

⁵⁴ Ko le setulio mo latou ala na nonofo mo ia o leo Sesu, na tio loa ki le mafuike ti mo nea fuli ala na soko, na i lasi loa, o pati : E maoki ai, ko le tagata leinei ko le Alo a ia o le Atua.

⁵⁵ Na i ai i lena ni fafine toka api ala na tutuu mei mamao, o tio. Na lotou mulimuli ia Sesu mei Kalilea, o tausi kiate ia.

⁵⁶ Na kau i fafine ana Malia mei Maketala, mo Malia, tinana o Sakopo mo Sosefo, ti mo le tinana o vosa o Sepeteo.

Tanu o Sesu

⁵⁷ I le afiafi, na tau mai loa se tagata mou koloa mei Alimatea, leia na igoa ko Sosefo, ko se tisipulo foki a Sesu.

⁵⁸ Na ano loa a ia kia Pilato, o kole le tino o Sesu. Ti na fakatotonu loa e Pilato ke soli ake kiate ia le tino o Sesu.

⁵⁹ Na too loa e Sosefo le tino, o kofu a ia ki se kie tea,

⁶⁰ ti na tuku loa e ia a ia ki se tanuma foou leia na kenu i le utu. Ti na fuli loa e ia se fa fatu fualasi ki mua o le tanuma, ti na ano loa a ia.

⁶¹ Na nonofo i ai Malia mei Maketala mo leia ake Malia, o tio ki le tanuma.

Fakamaumau mo le leo o le tanuma

⁶² I le pogipogi ake, ko le aso leia e olo ki le teuteu o le sapato, na ano loa le kau pule faisakilifisio mo le kau faliseo kia Pilato,

⁶³ o pati : Aliki, e motou manatui na pati le tagata kaka lena ka koi mauli : I le oki o aso e tolu, e kau toe tuuake loa.

⁶⁴ Koia ke ke fakatotonu ke leo le tanuma o kaku ki le tolu o aso, o tupu ke aua na au ana tisipulo o kaia le tino, ti ke aua na lotou pati loa ki le kakai : Kua toe tuuake a ia mei le kau mate. E veli ake loa le kaka lena i le uluaki.

⁶⁵ Na pati loa Pilato kia latou : E i ai lakoutou kau tagata leo, kotou ano o leo a ia ofaipe le nea leia e kotou loto ki ai.

⁶⁶ Na lotou ano loa, o leo le tanuma : na lotou fakamaumau loa ki le sima le fatu tapono o le tanuma, ti na lotou fakanofo loa i mua le kau solia ke leo ia a ia.