Mateo 26 - Tosi Tapu

Fono o pule sutea ke tamate Sesu

¹ I le oki o akonaki fuli ana, na pati loa Sesu ki ana tisipulo :

² E kotou iloa koi toe fai ni ga aso e lua ki le Pasikate, ti e tuku loa le Vosa o le tagata ke tutuki i le koluse.

³ Ti na fakatasi loa le kau pule faisakilifisio mo le kau fakamatuatua o le kakai i le malae o le pule faisakilifisio ko Kaifa ;

⁴ ti na lotou fono loa ke too fakapikoi Sesu o tamate.

⁵ Kae na lotou pati loa : Ke aua na soko i le lolotoga o le aso lasi, o tupu ke aua na soko se maveuveu i le kakai.

Malia na takai kaloni ia Sesu

⁶ Na nofo loa Sesu i Petania, i le fale o Simone, le tagata kilia.

⁷ Na fakafeofi ake loa se fafine kiate ia, mo se fagu alepate, leia na apele i se kaloni mauiga lasi ai. Ti na liligi loa e ia le kaloni ki le ulu o Sesu, kae nofo a ia i le laupapa.

⁸ I le tio a le kau tisipulo ki le nea lena, na lotou masau fakaita loa, o pati : Kolea le aoga o le maumau lena ?

⁹ Na feala ke fakatau le kaloni lena ki se paaga lasi, ti ke soli loa a ia ki le kau mativa.

¹⁰ Na iloa loa e Sesu le nea lena, ti na pati loa a ia kia latou : Kolea e kotou fakamamae ai le fafine leinei ? Kua fai e ia se gaoi malie kiate au ;

¹¹ talie e kotou maua tuumau le kau mativa, kae e leaise kotou maua tuumau au.

¹² I lana liligi le kaloni ki loku tino, na fai e ia a ia ki loku aveifo.

¹³ E kau pati maoki atu kia koutou, ko ganea fuli ala e fakasa ai loa le logo malie leinei, i le malama nei katoa, e toe fakamatala loa i ai le nea leia kua fai e le fafine leinei, o fakamanatu a ia.

Fakatotonu e Sutasi ke kakaai Sesu

¹⁴ Ti ko se tasi o le tino agafulu tupu lua, leia na igoa ko Sutasi Isekaliote, na ano ki le kau pule faisakilifisio,

¹⁵ o pati : Kolea e kotou loto ke soli mai kiate au, ti e kau tuku atu loa Sesu kia koutou ? Ti na lotou totogi loa a ia ki ni fa piesi paaga e kau tolu.

¹⁶ Ti na afa loa e ia se faigamalie ke fakatau ai Sesu kia latou.

Teuteu o le Pasikate

¹⁷ I le uluaki aso o pane sala fakatupu, na masau loa le kau tisipulo kia Sesu, o pati kiate ia : Ko le ganea fea leia e ke loto ke motou teuteui ai kiate koe le kai o le Pasikate ?

¹⁸ Na tali loa a ia : Kotou ano ki le tagata leia i le kolo, ti kotou pati kiate ia : E pati mai le pule : Kua ofi mai loku temi ; e kau fai loa i lou fale le kai o le Pasikate mo aku tisipulo.

¹⁹ Na fai loa e le kau tisipulo le nea leia na fakatotonu ake e Sesu kia latou, ti na lotou teuteui loa le Pasikate.

Pasikate fakaoki

²⁰ I le afiafi, na eke loa a ia ki le laupapa mo le tino agafulu tupu lua.

²¹ I le lolotoga o le kai, na pati loa Sesu : E kau pati maoki atu kia koutou, e fakatau loa au e se tasi o koutou.

²² Na lotou mamae lasi ai, ti na lotou tasi vesili kiate ia : Pe ko au, Aliki ?

²³ Na tali loa a ia : Ko leia e fafa fakatasi lona lima mo au ki le pa, ko ia leia e fakatau ia loa au.

²⁴ E ano le Vosa o le tagata, o mulimuli ki le nea leia kua tosi kiate ia. Kae malaia ki le tagata leia e fakatau ia le Vosa o le tagata ! E malie ake ke aua na tupu le tagata lena.

²⁵ Na masau loa Sutasi, leia na fakatau ia a ia, o pati : Pe ko au, Lapi, pule ? Na tali loa Sesu kiate ia : Kua ke pati ki ai.

Fakatuu o le kai fakamanatu

²⁶ I le lolotoga o le kai, na too loa e Sesu le pane, o fakafetai, mo tofitofi, mo soli ki ana tisipulo, o pati : Kotou too, ti kotou kai, ko le nea leinei ko loku tino a ia.

²⁷ Na too foki e ia se ipu ; ti e i le oki o lana fakafetai, na soli loa e ia a ia kia latou, o pati : Kotou inu fuli ki ai ;

²⁸ talie ko le nea leinei ko loku toto, ko le toto o le sai foou, leia na liligi ki le toka api, ke fakamolemole ai a agasala.

²⁹ E kau pati atu kia koutou, e leaise kau toe inu loa ki le fua o le vite, o kaku ki le aso leia e kau toe inu ai loa se vino foou mo koutou i le puleaga o loku Tamana.

Fakasa e Sesu kia Petelo lana fakafiti

³⁰ I le oki o le sua katiko, na lotou ano loa ki le mauga o Oliveto.

³¹ Ti na pati loa Sesu kia latou : I le po leinei e kotou tiaki fuli loa au ; talie e tuu i le tosi : E kau taai loa le tausi ovi, ti e mavetevete loa le kau ovi.

³² Kae i laku toe tuuake, e kau muamua loa ia koutou ki Kalilea.

³³ Na masau loa Petelo, o pati kiate ia : Kapau e lotou tiaki fuli loa a koe, kae ko au, e leaise kau tiaki loa a koe i se aso.

³⁴ Na pati loa Sesu kiate ia : E kau pati maoki atu kiate koe, i le po fai leinei, i mua o le koukoua o le moatoa, kua ke fakafiti tua tolu kiate au.

³⁵ Na tali loa Petelo kiate ia : Kapau e tonu foki ke kau mate mo koe, e leaise kau fakafiti aifuai kiate koe. Ti na masau fenaaki fuli loa le kau tisipulo.

Sesu i le oloto o Setesemani

³⁶ I ai, na ano loa Sesu mo latou ki se ganea leia na igoa ko Setesemani, ti na pati loa a ia ki le kau tisipulo : Kotou nonofo i leinei, kae kau ano mua ki leia o faikole.

³⁷ Na too loa e Sesu a Petelo mo vosa e lua o Sepeteo, ti na kamata logoi loa e ia se mamae mo ni mafaia veli.

³⁸ Na pati loa a ia kia latou : E mamae lasi loku laumalie o kaku ki le mate ; kotou nonofo i leinei, ti kotou alaala mo au.

Uluaki kole a Sesu

³⁹ Ti oki, na fai loa e ia ni fa sake ki mua, ti na fakapulou loa a ia ki le kele, o faikole feneeki : Loku Tamana, kapau e feala ke mamao atu le ipu nei iate au ! Kae ke aua na fai ki loku loto, kae ke fai fua ki lou finegalo.

Tulemoe o le kau tisipulo

⁴⁰ Ti na au loa a ia ki le kau tisipulo, o maua mai kua lotou momoe, ti na pati loa a ia kia Petelo : Na leaise kotou mafai foki ke alaala mo au i se ga ola fua e tasi.

⁴¹ Kotou alaala ti kotou faikole, ke aua na kotou siga ki le fakasala ; e makeke le laumalie kae gaegae le tino.

Lua kole

⁴² Na toe fakamamao loa a ia i le tua lua, o faikole feneeki : Loku Tamana, kapau e leaise feala ke mamao le ipu nei kae e leaise kau inu a ia, ke fai ki lou finegalo !

⁴³ Na toe liliu mai loa a ia, o maua latou kua toe momoe ; talie kua mamafa ai olatou mata i le fia moe.

Tolu kole

⁴⁴ Ti na tuku loa e ia latou, kae toe ano loa a ia o faikole, ko lona tua tolu a ia, o toe liuga a kupu ana.

⁴⁵ Ti na toe liliu mai loa a ia ki ana tisipulo, o pati kia latou : Kotou momoe la i le lakaga nei, ti kotou malolo ! Ko leinei, kua ofi mai le ola leia e tuku ai le Vosa o le tagata ki lima o le kau agasala.

⁴⁶ Kotou tutuu la ki aluga, ko leinei, ko leia e fakatau ia au e fakaofi mai.

Too o Sesu

⁴⁷ Koi lolotoga lana masau, ko leinei Sutasi, ko se tasi o le tino agafulu tupu lua, na kaku mai loa, ti mo se kakai toka api ai, mo ni seleta ti mo ni laakau, na kakau mai latou e le kau pule faisakilifisio ti mo le kau fakamatuatua o le kakai.

⁴⁸ Ko leia na fakatau ia Sesu kia latou na tuku ia kia latou le fakamailoga leinei : Ko leia e kau sogi loa ki ai, ko ia ; kotou too a ia.

⁴⁹ I le lakaga lena, na fakafeofi mai loa Sutasi kia Sesu, o pati : Malo, Lapi ! pule. Ti na sogi loa a ia kiate ia.

⁵⁰ Na pati loa Sesu kiate ia : Ei loku kaukau nea, ko le nea leia na ke au o fai, fai a ia. Ti na fakafeofi ake loa le kakai kia Sesu, o too lima a ia.

⁵¹ Ti ko leinei, ko se tasi o latou ala na nonofo mo Sesu, na fa loa lona lima ki lana seleta o tosoi, ti na taai loa e ia le tagata fakasausau a le pule faisakilifisio, o motu ai lona taliga.

⁵² Na pati loa Sesu kiate ia : Toe velo lau seleta ki lona tukuaga, talie ko latou fuli ala e too ia loa le seleta e toe mamate loa i le seleta.

⁵³ Pe ke pati e leaise mafai ke kau kole ki loku Tamana, ke tuku mai e ia i le lakaga nei fai ni fa solia aselo e tino agafulu tupu lua pe lasi atu ?

⁵⁴ Ti e fakasoko feaki loa a folafola o le Tosi, ala e fakasa ia e tonu ke fai feneeki ?

⁵⁵ I le temi lena, na pati loa Sesu ki le kakai : Kua kotou au kiate au ofaipe se tagata agaveli, mo ni seleta ti mo ni laakau, ke kotou too fakamakeke au. Na kau tonatona i aso fuli i lotolotoga o koutou, o akonaki i le fale tapu, ti na leaise kotou too fua au.

⁵⁶ Kae kua soko a nea fuli ana ke fakasoko ai a folafola ala na tosi e le kau polofeta. Ti na tiaki loa a ia e le kau tisipulo fuli, kae lotou fesolaki.

Sesu i mua o Kaifa mo le fono lasi

⁵⁷ Na lotou too loa Sesu, ti na lotou ave loa a ia ki le fale o le pule faisakilifisio ko Kaifa, leia na fakatasi ai le kau sekelipa mo le kau fakamatuatua.

⁵⁸ Na muli loa Petelo iate ia mei mamao, o kaku ki le malae o le pule faisakilifisio, ti na ulu loa a ia ki ai, o tonatona mo le kau tagata fakasausau, ke tio pe feaki le fakaoki o le nea lena.

⁵⁹ Na afa loa e le kau pule faisakilifisio mo le fono lasi katoa ni fakamaoki loi kia Sesu, ke tamate ai.

⁶⁰ Kae na leaise lotou maua fua se nea, logo ai le api o tagata fakamaoki loi ala na nake. I le fakaoki, na au loa se toka lua, o pati :

⁶¹ Na pati a ia leinei : E kau mafai ia le maumaui le fale tapu o le Atua, ti mo toe fakatuu a ia i ni aso e tolu.

⁶² Na tuu ake loa ki aluga le pule faisakilifisio, o pati kiate ia : Pe leaise ke tali fua ki se nea ? Kolea le nea leia e tuku e tagata ana kiate koe ?

⁶³ Na fakalologo loa Sesu. Ti na masau loa le pule faisakilifisio, o pati kiate ia : E kau fakapapau atu i mua o le Atua mauli, fakasa mai kia matou pe ko Kilisito a koe, ko le Alo o le Atua.

⁶⁴ Na tali loa Sesu kiate ia : Kua ke pati ki ai. Ti e tasi foki, e kau fakasa kia koutou, e kotou tio loa ki le Vosa o le tagata e nofo i le fetuu atamai o le mafimafi o le Atua, ti e au i ao o le lagi.

⁶⁵ Ti na sae loa e le pule faisakilifisio ona kofu, o pati : Kua fatituu a ia ki le Atua ! Kolea koi aoga mai ai ni tagata fakamaoki ? Ko leinei kua kotou logo ki lana fatituu ki le Atua.

⁶⁶ Kolea lakoutou manatu ? Na lotou tali loa : E tonu ke mate a ia.

⁶⁷ I le nea lena, na lotou anuanusi loa ona mata, mo soka loa a ia, ti mo fepataki loa a ia, o pati :

⁶⁸ Kilisito, kikite ; fakasa mai kia matou pe ko ai leia na paai ia a koe.

Fakafiti tua tolu a Petelo

⁶⁹ Kae na tonatona loa Petelo i fafo i le malae. Na fakafeofi ake loa se fafine fakasausau kiate ia, o pati : Ko koe foki, na ke nofo mo Sesu, le Kalilea.

⁷⁰ Kae na fakafiti loa a ia kia Sesu i mua o latou fuli, o pati : E leaise kau iloa le nea leia e ke masau ki ai.

⁷¹ I lana ano ki le matapa, na tio loa se tasi fafine fakasausau kiate ia, ti na pati loa a ia kia latou ala na nonofo i ai : Ko ia foki leinei na nofo mo Sesu mei Nasaleti.

⁷² Na toe fakafiti loa Petelo kiate ia, o fakapapau : E leaise kau iloa le tagata lena.

⁷³ I le sili o se ga temi noa fua, ko latou ala na nonofo i ai, na fakafeofi ake loa o pati kia Petelo : E maoki, e ke kau foki ki lana kakai, talie e mailoga i lau masau.

⁷⁴ Ti na kamata fai loa e Petelo ni lauveli, o fakapapau : E leaise kau iloa le tagata lena. I le temi fai lena na koukoua loa le moatoa.

⁷⁵ Ti na manatui loa e Petelo le masau leia na fai e Sesu : I mua o le koukoua o le moatoa, kua ke fakafiti tua tolu kiate au. Ti na ulu loa a ia ki fafo, o tagi mamae ai.