Mateo 25 - Tosi Tapu

Folafola o taupoou e tino agafulu

¹ Ti e toe fakatatau loa le puleaga o le atu lagi ki ni taineliki taupoou e tino agafulu, ala na too ia olatou malama, ti na ano loa o fakafetaulaki ki le tagata avaga.

² Na valelea le toka lima o latou, ti na popoto le toka lima.

³ Na too loa e le kau valelea olatou malama, kae na leaise lotou too loa se lolo ;

⁴ Kae na too loa e le kau popoto olatou malala, mo se lolo i ni ipu.

⁵ I le tuvai mai o le tagata avaga, na lotou tule momoe fuli loa, o moe mamate.

⁶ I le vaeluapo, na kalaga loa : Ko leinei le tagata avaga, kotou ano o fakafelavei kiate ia !

⁷ Ti na ofo ake loa le kau taupoou fuli lena, o teuteui olatou malama.

⁸ Ti na pati loa le kau valelea ki le kau popoto : Soli mai mua kia matou se ga lolo mei lakoutou lolo, talie kua mamate omatou malama.

⁹ Na tali loa le kau popoto : Leai ! e leaise feauga loa kia matou mo koutou ; kotou ano ki le kau fakatau lolo, o totogi mai se lolo kia koutou.

¹⁰ I le lolotoga o lalatou ano o totogi lolo, na kaku mai loa le tagata avaga ; ko latou ala kua teuteu na ulu loa mo le tagata avaga ki le kogafale o le faiavaga, ti na tapono loa le matapa.

¹¹ Ki muli mai, na kaku ake loa le kau taupoou valelea, o pati : Aliki, Aliki, fakamavaa mai kia matou.

¹² Kae na tali loa a ia : E kau pati maoki atu kia koutou, e leaise kau iloa fua koutou.

¹³ Koia kotou alaala ai, talie e leaise kotou iloa le aso mo le ola.

Folafola o tenalio

¹⁴ E toe fakatatau loa le puleaga o le atu lagi ki se tagata leia ka folau ki se fenua mamao, ti na kalagai loa e ia ana tagata fakasausau, o tuku kia latou ona koloa ke lotou taupau.

¹⁵ Na soli loa e ia ni fa tenalio e lima ki se tasi, ti lua ki leia ake, ti tasi ki le tolu, o mulimuli ki le mafai a le tagata taki toka tasi ; ti na ano loa a ia.

¹⁶ Ko leia na tali ia a fa tenalio e lima na ano aifai a ia, o fakagaoii latou ke fua, ti na toe maua loa e ia ni iki ake fa tenalio e lima.

¹⁷ Ti na toe fenaaki mo leia na tali ia a fa tenalio e lua, na toe maua loa e ia ni iki ake fa tenalio e lua.

¹⁸ Kae ko leia na tali ia le fa tenalio e tasi, na ano loa a ia o kenu se popoko, o fufu i ai le fa tenalio o lona pule.

¹⁹ Ti fualoa, na toe liliu mai loa le pule o tagata fakasausau ana, o afa kia latou le fua o lalatou gaoi.

²⁰ Na fakafeofi ake loa leia na tali ia a fa tenalio e lima, o avake ni iki ake fa tenalio e lima, o pati : Aliki, na ke tuku mai kiate au ni fa tenalio e lima ; ko leinei kua kau toe maua ni iki ake fa tenalio e lima.

²¹ Na pati loa lona pule kiate ia : E malie ai, tagata fakasausau agamalie mo agatonu ; na ke agatonu i se ganea ikiiki fua, e kau fakanofo loa a koe ke pule ki se nea lasi ; ulu ki le fiafia o lou pule.

²² Na fakafeofi ake loa leia na tali ia a fa tenalio e lua, o pati : Aliki, na ke tuku mai kiate au ni fa tenalio e lua ; ko leinei kua kau toe maua ni iki ake fa tenalio e lua.

²³ Na pati loa lona pule kiate ia : E malie ai, tagata fakasausau agamalie mo agatonu ; na ke agatonu i se ganea ikiiki fua, e kau fakanofo loa akoe ke pule ki se nea lasi ; ulu ki le fiafia o lou pule.

²⁴ Na fakafeofi ake loa leia na tali ia le fa tenalio e tasi, o pati : Aliki, na kau iloa ko se tagata faigataa a koe, leia e utu i le ganea leia na leaise ke faisaga ai, ti e tanaki i le ganea leia na leaise ke sasa fulumeto ai ;

²⁵ na kau i loa kiate koe, ti na kau ano o fufu lau fa tenalio i le kele ; ko leinei a ia, too lau nea.

²⁶ Na tali loa lona pule kiate ia : Tagata fakasausau agaveli mo gasueveli, na ke iloa malie e kau utu i le ganea leia na leaise kau faisaga ai, ti e kau tanaki i le ganea leia na leaise kau sasa fulumeto ai ;

²⁷ koia na tonu ai ke ke tuku laku paaga ki le kau tagata faipaaga, o tupu ke kau too loa, i laku toe liliu mai, laku nea mo sona tupu.

²⁸ Koia kotou too meiate ia le fa tenalio, o soli a ia ki leia e nofo mo fa tenalio e kau agafulu.

²⁹ Talie e soli loa ki leia e maua ana nea, ti e nofo loa a ia i le mou, kae ki leia e leaise maua sana nea, e toe too loa meiate ia mo le nea leia e maua e ia.

³⁰ Kotou ti le tagata fakasausau lee aoga, ki le fakapouli i fafo, leia e maua ai loa ni tagi mo ni fetati o nifo.

Fakamaau o atu puleaga

³¹ Ka au loa le Vosa o le tagata i lona kololia, mo le kau aselo fuli, e ekeeke loa a ia i le ekeekeaga fakasau o lona kololia.

³² E fakatasi loa a atu puleaga fuli i ona mua. E vaei kese loa e ia ala mei la, ofaipe le vaei kese e le tagata tausi ovi o ovi mei koti ;

³³ ti e tuku loa e ia a ovi ki lona fetuu atamai, ti ko koti ki lona fetuu sema.

³⁴ Ti e pati loa le sau kia latou ala e tutuu loa i lona fetuu atamai : Kotou au, koutou ala na tapuaki e loku Tamana ; kotou maua le puleaga leia na teuteui atu kia koutou talu mei le kamataaga o le malama nei.

³⁵ Talie na kau fia kai, ti na kotou soli mai kiate au se nea ke kai ; na kau fia inu, ti na kotou soli mai kiate au se nea ke inu ; na kau matapule ti na kotou tali au ;

³⁶ na kau telefua ti na kotou fakalava au, na kau masaki ti na kotou fakatele mai kiate au ; na kau pilisoni, ti na kotou au kiate au.

³⁷ E tali loa le kau agatonu kiate ia : Aliki, ko nafea leia na motou tio ai kiate koe na fia kai, ti na motou soli atu ai kiate koe se nea ke kai ; pe na fia inu ti na motou soli atu kiate koe se nea ke inu ?

³⁸ Ko nafea leia na motou tio ai kiate koe e matapule, ti na motou tali a koe ; pe telefua, ti na motou fakalava a koe ?

³⁹ Ko nafea leia na motou tio ai kiate koe e masaki pe pilisoni, ti na motou natu kiate koe ?

⁴⁰ Na tali loa le sau kia latou : E kau pati maoki atu kia koutou, ko faiaga fuli ala na kotou fai ai a nea ana ki se tasi o oku fetaina liliki oki, ko au leia na kotou fai ki ai.

⁴¹ Ti oki, ti e pati loa a ia kia latou ala e tutuu loa i lona fetuu sema : Kotou fakamamao atu iate au, kau malaia ; kotou ano ki le afi lee gato leia na teuteui ki le Tiapolo mo ana aselo.

⁴² Talie na kau fia kai, ti na leaise kotou soli mai kiate au se nea ke kai ; na kau fia inu, ti na leaise kotou soli mai kiate au se nea ke inu ;

⁴³ na kau matapule ti na leaise kotou tali au ; na kau telefua, ti na leaise kotou fakalava au ; na kau masaki mo pilisoni, ti na leaise kotou au o fakatele mai kiate au ;

⁴⁴ E lotou toe tali loa : Aliki, ko nafea leia na motou tio ai kiate koe e fia kai, pe fia inu, pe matapule, pe telefua, pe masaki, pe pilisoni, ti na leaise motou tokaga kiate koe ?

⁴⁵ Ti e tali loa a ia kia latou : E kau pati maoki atu kia koutou, ko faiaga fuli ala na leaise kotou fai ai a nea ana ki se tasi o toe liliki oki ana, ko au leia na leaise kotou fai ki ai.

⁴⁶ Ti e ano loa latou anei ki le tautea lee gato, kae e ano loa le kau agatonu ki le mauli lee gato.