Mateo 24 - Tosi Tapu

Ko le fale tapu e maumaui loa

¹ Na ulu loa Sesu mei le fale tapu, ti na fakafeofi ake loa ana tisipulo kiate ia, o fakasa kiate ia a mataga o le fale tapu.

² Kae na pati loa a ia kia latou : E kotou tio ki nea fuli ana ? E kau pati maoki atu kia koutou, e leaise toe maua loa i leinei se fatu i aluga o se fatu, leia na leikiaise ti ki lalo.

Lona temi soko mo lona fakamailoga

³ Na tonatona loa a ia i le mauga o Oliveto. Ti na au loa le kau tisipulo tefua, o fai kiate ia le vesili leinei : Fakasa mai kia matou, pe ko le temi fea leia e soko ai loa le nea lena, ti kolea le fakamailoga o lau toe liliu mai ti mo le fakaoki o le malama nei ?

Ko temi fakaoki

⁴ Na tali loa Sesu kia latou : Kotou tokaga ai na kakaai koutou e se tasi.

⁵ Talie e au loa se toka api i loku suafa, o pati : Ko au ko Kilisito. Ti e lotou fakasesei loa ni kakai toka api ai.

⁶ E kotou logo loa ki le masaui o ni tau ka soko mai ti mo le fakamatala o ni tau na soko i mua : Aua na kotou i, talie e tonu ke soko a nea ana. Kae e leaise ko le aso fakamuli loa a ia.

⁷ E tau loa se kakai ki se tasi kakai, ti e tau loa se puleaga ki se tasi puleaga ; ti e i ai loa, i ganea kesekese, ni oge mo ni mafuike.

⁸ Ko nea fuli ana ko le kamataaga a ia o mamae.

⁹ Ti e tuku loa koutou ke tautea, mo tamate, ti e vesiainai loa koutou e puleaga fuli, o tupu ko loku suafa.

¹⁰ I temi ana e tiaki loa e le toka api le tui, ti e lotou fefolafolaaki loa mo fevesiaaki loa ia latou.

¹¹ E mafuta loa se kau polofeta loi toka api, ti e lotou fakasesei loa ni kakai toka api ai.

¹² Ti e momoko loa le alofa o le toka api, o tupu ko le lasi o le agasala.

¹³ Kae ko leia e kataki fualoa loa o kaku ki le fakaoki, e saofaki loa.

¹⁴ E fakamafola loa le logo malie leinei o le puleaga i le malama nei katoa, ke fakamaoki ki puleaga fuli. Ti o soko mai loa le aso fakamuli.

Le mamae lasi

¹⁵ Koia ka kotou tio loa kua tuu i le potu taputapu leia e igoa ko le fakalialia o le malaia, leia na pati ki ai le polofeta ko Taniela, ke tokaga loa leia e lautosi !

¹⁶ Ti ko latou ala e nonofo loa i Sutea ke fesolaki ki mauga ;

¹⁷ ko leia e nofo loa i le taufufu ke aua na ifo loa a ia, o too se nea i le loto fale ;

¹⁸ ti ko leia e nofo loa i faisaga ke aua na toe liliu loa a ia ki muli, o too lona taupulupulu.

¹⁹ Malaia ki fafine ala e tinanae loa ti mo latou ala e fakau toe i aso ana !

²⁰ Kotou faikole ke aua na soko lakoutou fesolaki i le temi momoko pe ko se aso sapato.

²¹ Talie, i aso ana, e soko loa se mamae lasi, leia e leai sona tatau talu mei le kamataaga o le malama nei o kaku mai ki le aso nei, ti e leaise toe maua foki sona tasi ake tatau i se aso.

²² Ti kana leaise fakateiki a aso ana, e leaise sao loa se tasi ; kae o tupu ko le kau filifiliia e fakateiki loa a aso ana.

²³ Kapau e pati atu loa se tasi kia koutou : E nofo Kilisito i leinei, pe : E nofo a ia i leia, aua na kotou tui ki ai.

²⁴ Talie e mafuta loa ni kilisito loi mo ni polofeta loi ; ti e lotou fai loa ni nea fakamanamana lalasi mo ni milakulo ke fakasesei ai, mo ka na feala, latou foki ala kua filifili.

²⁵ Ko leinei, kua kau fakasa fakatomua a ia kia koutou.

²⁶ Kapau e pati atu loa kia koutou : Ko leinei, e nofo a ia i le toafa, aua na kotou ano ki ai ; ko leinei e nofo a ia i se kogafale, aua na kotou tui ki ai.

²⁷ Talie, ofaipe le tapa o le uila mei le sopoaga o le laa o sa i le viloaga o le laa, e fenaaki loa le toe liliu mai o le Vosa o le tagata.

²⁸ I se ganea fua leia e maua ai se tino mate, i lena e tanaki ai a votu.

Toe liliu mai o le Sau ki le malama nei i le oki o le tautea

²⁹ I le oki fai o aso mamae ana, e fakapouli loa le laa, ti e leaise toe malama loa le masina, ti e vivilo loa a fetuu mei lagi, ti e galulu loa a makeke o le atu lagi.

³⁰ Ti e sa mai loa le fakamailoga o le Vosa o le tagata i le lagi, ti e fetagisi loa a faasiga fuli o le malama nei, ti e lotou tio loa ki le Vosa o le tagata e au i ao o le lagi mo se makeke ti mo se kololia lasi.

³¹ Ti e kakau loa e ia ana aselo mo le fakatagipupusi makeke, ti e lotou tanaki loa lana kau filifiliia mei fetuu matagi e fa, mei leia potupotu o le lagi ki leia potupotu.

Folafola o le fiki

³² Kotou tokaga ki le folafola fakatata o le fiki. Ka malulu ona laa, ti mo sosomo ona lau, e kotou iloa loa kua ofi mai le temi vevela.

³³ Ti e fenaaki foki, ka kotou tio loa ki nea fuli ana, kotou iloa kua ofi mai le Vosa o le tagata, i le matapa.

³⁴ E kau pati maoki atu kia koutou, e leaise puli loa le tautupu nei, kae e leikiaise soko a nea fuli ana.

³⁵ E puli loa le lagi mo le kele, kae e leaise toe puli loa aku folafola.

Ke alaala

³⁶ Kae ki le aso ti mo le ola, e leaise iloa e se tasi fua, pe ko le kau aselo i le atu lagi, pe ko le Alo, kae ko le Tamana toka tasi.

³⁷ Ko le nea leia na soko i le temi o Noe e toe soko loa i le toe liliu mai o le Vosa o le tagata.

³⁸ Talie, i aso i mua o le lomaki, na kai a tagata mo inu, ti na lotou avaga mo fakaavaga olatou fanau, o kaku ki le aso leia na ulu ai loa a Noe ki le aleka ;

³⁹ ti na leaise lotou amanaki fua ki se nea, o kaku ki le to o le lomaki, o ave ai latou fuli : E toe fenaaki loa i le toe liliu mai o le Vosa o le tagata.

⁴⁰ Koia loa, i tagata e toka lua e nonofo loa i se faisaga, e too loa le tasi kae tuku loa le tasi ;

⁴¹ i fafine e toka lua ala e fakamalu ia le fulumeto i le fatu, e too loa le tasi kae tuku loa le tasi.

⁴² Kotou alaala, talie e leaise kotou iloa le aso leia e au ai loa lokoutou Aliki.

⁴³ Ke kotou iloa le nea lena, kapau na iloa e le pule o le kaiga le ola o le pouli leia e tonu ke au ai le tagata kaia, e alaala loa a ia ti e leaise tuku loa e ia ke ului lona fale.

⁴⁴ Ti ko koutou foki, ke kotou nonofo teuteu, talie e au loa le Vosa o le tagata i le ola leia e leaise kotou talitali ki ai.

⁴⁵ Ko ai loa le tagata fakasausau agatonu mo poto, leia kua fakanofo e lona aliki ke pule ki ana kakai, mo tufa ia kia latou le nea kai i lona temi totonu.

⁴⁶ Manuia le tagata fakasausau lena, mo ka kaku mai lona pule, o maua a ia e fai fenaaki !

⁴⁷ E kau pati maoki atu kia koutou, e fakanofo loa e ia a ia ke pule ki ona koloa fuli.

⁴⁸ Kae kapau ko se tagata fakasausau agaveli a ia, leia e pati i lona loto : E tuvai mai loku pule,

⁴⁹ ti e sasa loa e ia ona kaukau nea, ti e kai loa a ia mo inu mo le kau konana,

⁵⁰ e au loa le pule o le tagata fakasausau lena i le aso leia e leaise amanaki a ia ki ai ti mo le ola leia e leaise iloa e ia.

⁵¹ Ti e tautea fakaveliveli loa e ia le tagata fakasausau lena, o soli kiate ia lona vaega mo le kau malualoi : Ko lena le ganea leia e maua ai loa ni tagi mo ni fetati o nifo.