Mateo 23 - Tosi Tapu

mo le kau faliseo

¹ Ti na masau loa Sesu ki le kakai ti mo ana tisipulo, o pati :

² E ekeeke le kau sekelipa mo le kau faliseo i le nofoaga o Moisese.

³ Koia ke kotou fai ti mo kotou taupau a nea fuli ala e lotou pati atu ki ai ; kae aua na kotou mulimuli ki alatou gaoi. Talie e lotou pati, kae e leaise lotou fai.

⁴ E lotou sai ni kavega mamafa, o teki ki tuauma o tagata, kae e leaise lotou loto ke fafa fua ki ai olatou maikao.

⁵ E lotou fai alatou gaoi fuli ke tioi e tagata. Koia e lotou ave ai ni tukuaga tosi laulalasi, ti mo ni tapai kie loloa i olatou kofu.

⁶ E lotou manako ki le uluaki nofoaga i kaitasi, ti mo uluaki ekeekeaga i sinakoka ;

⁷ e lotou loto ke fakamalo ake kia latou i ganea apiapi, ti ke too e tagata kia latou le igoa ko Lapi, pule.

⁸ Kae ko koutou, aua na fakaigoa koutou ko Lapi, talie ko se fa toka tasi ko lokoutou Pule, ti ko fetaina fuli koutou.

⁹ Ti aua na kotou fakaigoa fua se tasi i le kele ko lokoutou tamana ; talie ko se fa toka tasi ko lokoutou Tamana, leia e nofo i le atu lagi.

¹⁰ Aua na fakaigoa koutou ko ni takitaki ; talie ko se toka tasi ko lokoutou takitaki, ko Kilisito.

¹¹ Ko leia e lasi oki ia koutou e liliu loa ko lakoutou tagata fakasausau.

¹² Ko leia e fia malaga loa ki aluga e tuku loa a ia ki lalo, ti ko leia e fakataulalo loa e siki loa a ia ki aluga.

Malaia o kau sekelipa mo kau faliseo

¹³ Malaia kia koutou, kau sekelipa mo kau faliseo malualoi ! Talie e kotou tapono ki le tagata le puleaga o le atu lagi ; e leaise kotou ulu ki ai koutou totonu, ti e leaise kotou tuku ke ulu ki ai latou ala e fia ulu.

¹⁴ Malaia kia koutou, kau sekelipa mo kau faliseo malualoi ! Talie e kotou foloako a fale o fafine lokonui, ti e kotou fai i tafa ni kole loloa ; koia e fakamaui loa koutou o toe mamafa ake.

¹⁵ Malaia kia koutou, kau sekelipa mo kau faliseo malualoi ! Talie e kotou makape saele i le tai mo le kele o afa se tasi ke tafoki atu kia koutou ; ti ka tafoki loa se tasi, e kotou fakaliliu loa a ia ko se vosa o Ifeli o tua lua ake lona veli ia koutou.

¹⁶ Malaia kia koutou, kau takitaki o kivi, ala e pati : E nea noa mo kapau e fakapapau se tasi i le fale tapu. Kae kapau e fakapapau loa se tasi i le aulo o le fale tapu, e maua loa a ia.

¹⁷ Kau vale ti mo kau kivi ! Kofea le nea leia e mauiga ake, ko le aulo pe ko le fale tapu leia e fakatapu ia le aulo.

¹⁸ E kotou toe pati foki, e leaise lau mo kapau e fakapapau se tasi i le aletale ; kae kapau e fakapapau se tasi i le moliga leia e tuku i aluga o le aletale, ti e maua a ia.

¹⁹ Kau kivi ! Kofea le nea leia e mauiga ake, ko le moliga pe ko le aletale leia e fakatapui ia le moliga ?

²⁰ Ko leia e fakapapau i le aletale e fakapapau a ia i le aletale ti mo nea fuli ala e teki i aluga ;

²¹ ko leia e fakapapau i le fale tapu e fakapapau a ia i le fale tapu ti mo leia e nofo i ai ;

²² Ti ko leia e fakapapau i le lagi e fakapapau i le ekeekeaga fakasau o le Atua ti mo leia e ekeeke i ai.

²³ Malaia kia koutou, kau sekelipa mo kau faliseo malualoi ! Talie e kotou totogi le vaega kau agafulu o le menete, mo le aneti, mo le kumini, kae e kotou tuku kese a nea mauiga o le lao, le faitotonu, mo le manavaalofa, ti mo le maokioki : Ko na a nea ala e tonu ke fai, ti e leaise fakanoai foki mo la ake a nea.

²⁴ Kau takitaki kivi ! E kotou sau le nono kae kotou folo le kamelo.

²⁵ Malaia kia koutou, kau sekelipa mo kau faliseo malualoi ! Talie e kotou fufulu a tafa o le ipu mo le pa, kae i loto e lotou apele i kaia mo agaveli.

²⁶ Kau faliseo kivi, uluaki fufulu mua a loto o le ipu mo le pa, o tupu ke liliu loa a tafa o mea.

²⁷ Malaia kia koutou, kau sekelipa mo kau faliseo malualoi ! Talie e kotou faipe ni tanuma tetea, ala e sa mai i tafa e fulumalie, kae i loto, e kotou apele ko ivi mate ti mo kelekele fuli.

²⁸ E toe fenaaki foki mo koutou, i tafa e kotou mata agatonu ki tagata, kae i loto e kotou apele i le malualoi mo le aga fakalialia.

²⁹ Malaia kia koutou, kau sekelipa mo kau faliseo malualoi ! Talie e kotou fau a tanuma o le kau polofeta, ti e kotou teuteui a tanuma o le kau agatonu,

³⁰ ti e kotou pati : Ka na motou mauli i le temi o omatou tamana, na leaise motou kau loa i le liligi o le toto o le kau polofeta.

³¹ E kotou fakamaoki i lena kia koutou totonu, ko koutou ko vosa o latou ala na tamate ia le kau polofeta.

³² Koia e kotou fakaapele ai le ipu o okoutou tamana.

³³ Kau gata, lanu o gata velo, e feaki loa lakotou sao mei le tua o Ifeli ?

³⁴ Koia loa, ko leinei, e kau kakau atu loa kia koutou ni polofeta, ni tagata poto ti mo ni sekelipa. E kotou tamate loa ni iki, ti e kotou kulusifiko loa ni iki, ti e kotou sasa loa ki laakau ni iki i okoutou sinakoka, ti e kotou fakavelivelii loa latou mei leia a kolo ki leia a kolo,

³⁵ o tupu ke toe vilo kia koutou le toto mea katoa leia kua liligi i le malama nei, kamata mei le toto o Apele ko le tagata agatonu o kaku ki le toto o Sakalia, vosa o Palakia, leia na kotou tamate i le vasa o le fale tapu mo le aletale.

³⁶ E kau pati maoki atu kia koutou, e vilo loa a nea fuli ana ki le tautupu leinei.

Tagi a Sesu ki Selusalemi

³⁷ Selusalemi, Selusalemi, leia e tamate ia le kau polofeta ti mo tuki fatui ia latou ala na kakau atu kiate koe, kua tua fia loku loto ke kau fakatasii au fanau ofaipe se ufa leia e fakatasii ia ona uviki i lalo o ona kapakau, kae na leaise kotou loto ki ai !

³⁸ Ko leinei, e tuku lavaki loa lokoutou fale kia koutou ;

³⁹ talie, e kau pati atu kia koutou, e leaise kotou toe tio loa kiate au, o kaku ki lakotou pati : Tapusa leia e au i le suafa o le Aliki !