Mateo 22 - Tosi Tapu

Folafola o le kai o le faiavaga

¹ Na toe masau loa Sesu kia latou i ni folafola fakatata, o pati :

² E fakatatau le puleaga o le atu lagi ki se sau leia na fai ia se kaitasi ki le avaga o lona vosa.

³ Na kakau loa e ia ana tagata fakasausau ke ano o kalagai latou ala na fakaafe ki le kaitasi ; kae na leaise lotou fia au.

⁴ Na toe kakau loa e ia ni iki ake tagata fakasausau, o pati : Kotou pati ki le kau fakaafe : Ko leinei kua kau teuteui laku kaitasi ; kua tamate aku pipi tagata mo aku manu pepeti, ti kua tokamalie a nea fuli, kotou au ki le kaitasi.

⁵ Kae na leaise tuatua fua le kau fakaafe ki le fakaafe, ti na lotou tasi ano loa, ko leia ki lona faisaga, ti ko leia ake ki lona koloa ;

⁶ ti na too loa e iki ni tagata fakasausau, o fakavelivelii mo tamate latou.

⁷ Na ita lasi ai le sau ; ti na kakau loa e ia lana kau solia ke ano o tamate le kau tukipo lena, ti mo tutu lolatou kolo.

⁸ Ti na pati loa a ia ki ana tagata fakasausau : Kua tokamalie le kaitasi ; kae e leaise gali le kau fakaafe mo le kaitasi.

⁹ Kotou ano loa ki ala lalasi, ti kotou fakaafe mai ki le kaitasi latou fuli ala e kotou maua ia loa.

¹⁰ Na ano loa a tagata fakasausau ki ala, o lotou tae latou fuli ala na lotou maua loa i ai, le kau agaveli mo le kau agamalie, ti na apele loa le kogafale o le kaitasi i le kau fakaafe.

¹¹ Na ulu loa le sau o tio kia latou ala na eke i le laupapa kai, ti na fakatokagai loa e ia se tagata leia na leaise kofu ki se kofu o le faiavaga.

¹² Na pati loa le sau kiate ia : Ei loku kaukau nea, na feaki lau ulu mai ki leinei kae e leaise ke maua le kofu o le faiavaga ? Na leaise gu loa le tagata lena.

¹³ Ti na pati loa le sau ki ana tagata fakasausau : Kotou sai ona vae mo ona lima, ti kotou ti a ia ki le fakapouli i fafo, leia e logo ai loa ki ni tagi mo ni fetati o nifo.

¹⁴ Talie e toka api le kau kalagai, kae e toka teiki fua le kau filifilia.

Le tukusau kia Sesale

¹⁵ Na ano loa le kau faliseo o fonofono ki se puleaki leia ke maua ai se sala ma Sesu i ana masau totonu.

¹⁶ Na lotou kakau loa kiate ia alatou tisipulo mo le kau Elote, o pati : Pule, e motou iloa e ke maoki, ti e ke ako le ala o le Atua o mulimuli ki le maoki, ti e leaise ke tuatua fua ki se tasi, talie e leaise ke tio ki le nea leia e sa i tafa o tagata.

¹⁷ Koia fakasa mai ai mua lau manatu : Pe taga, pe leai, ke tuku le tukusau kia Sesale ?

¹⁸ I le iloa e Sesu lalatou agaveli, na tali loa a ia : Kolea e kotou asiasii ai au, kau malualoi ?

¹⁹ Fakasa mai ake le fa piesi o le tukusau. Ti na lotou fakasa ake loa kiate ia se fa tenalio.

²⁰ Na vesili loa a ia kia latou : O ai le paaki mo le igoa leia e tuu i ai ?

²¹ Ti na lotou tali loa kiate ia : O Sesale. Ti na pati loa Sesu kia latou : Kotou tuku kia Sesale le nea a Sesale, ti e ki le Atua le nea a le Atua.

²² Na lotou ofolele loa i le nea leia na lotou logo ki ai, ti na lotou tuku loa a ia, kae lotou ano loa.

Fakamaoki o le toe tuuake

²³ I le aso lena, na au loa kia Sesu le kau Satuseo, ala e pati e leaise toe tuuake, o fai le vesili leinei :

²⁴ Pule, na pati Moisese : Kapau e mate se tasi kae sala fanau, e tonu loa ke avaga lona taina mo lana avaga, ke fakatupu ai se sakoga ki lona taina.

²⁵ Kae na i ai i lotolotoga o matou ni fetaina e toka fitu. Na avaga loa le uluaki, ti na mate loa a ia ; kae o tupu na leaise maua e ia sana fanau, na tuku loa e ia lona avaga ki lona taina.

²⁶ Na toe fenaaki loa ki le lua, mo le tolu, o kaku ki le fitu.

²⁷ I le oki o latou fuli, na mate loa le fafine.

²⁸ I le toe tuuake, ko ai i le toka fitu lena e avaga loa mo le fafine ? Talie na lotou avaga fuli mo ia.

²⁹ Na tali loa Sesu kia latou : E kotou nofo i le faisala, talie e leaise kotou matala fua ki le tosi ti mo le mafimafi o le Atua.

³⁰ Talie, i le toe tuuake, e leaise toe too loa e tagata ni fafine, ti e leaise toe too loa e fafine ni tagata, kae e lotou liliu loa ofaipe le kau aselo o le Atua i le lagi.

³¹ O uiga mo le toe tuuake o le kau mate, pe na leaise kotou lau le nea leia na fakasa e le Atua kia koutou :

³² Ko le Atua au o Apalaamo, le Atua o Isaake, le Atua o Sakopo ? Ko le Atua e leaise ko le Atua a ia o le kau mate, kae ko le Atua a ia o le kau mauli.

³³ Ko le kakai leia na fakalogo na ofolele ai i le akonaki a Sesu.

Le fakatotonu lasi oki

³⁴ I le logo a le kau faliseo kua tapono e Sesu a gutu o le kau Satuseo, na lotou fakatasi loa,

³⁵ ti na fai loa e se tasi o latou, ko se toketa poto, le vesili leinei kia Sesu, ke asiasii ai a ia :

³⁶ Pule, kolea le fakatotonu o le lao e lasi oki ?

³⁷ Na tali loa Sesu kiate ia : E ke alofa loa ki le Aliki, lou Atua, i lou loto katoa, mo lou laumalie katoa, ti mo lau manatu katoa.

³⁸ Ko lena le uluaki ti mo le fakatotonu lasi oki.

³⁹ Ti ko leinei le lua, leia e tatau mo ia : E ke alofa loa ki lou oloi ofaipe lou alofa kiate koe totonu.

⁴⁰ E fakasoko e fakatotonu ana e lua le lao katoa ti mo le kau polofeta.

Fakavesili o le kau faliseo ki le Mesia

⁴¹ I le koi fakatasi a le kau faliseo, na vesili loa Sesu kia latou, o pati :

⁴² Kolea lakoutou manatu kia Kilisito ? Pe ko le vosa a ia o ai ? Na lotou tali loa kiate ia : O Tavite.

⁴³ Ti na tali loa Sesu kia latou : Ti kolea na pati ai Tavite i le Laumalie Maokioki kiate ia : Aliki ! i lana pati :

⁴⁴ Na pati le Aliki ki loku Aliki : Ke ke ekeeke i loku fetuu atamai, O kaku ke kau fakaliliu ou fili ko lou tekiaga vae ?

⁴⁵ Kapau na pati Tavite kia Kilisito ko le Aliki, e feaki loa lana liliu ko lona vosa ?

⁴⁶ Na leaise mafai ke tali se tasi kiate ia i se kupu fua e tasi. Talu mei le aso lena, na leaise toe toa loa se tasi o fai ni vesili kiate ia.