Mateo 21 - Tosi Tapu

Ulu o Sesu-Kilisito ki Selusalemi

¹ I lalatou fakafeofi ki Selusalemi, na lotou kaku loa ki Petefase, i le mauga o Oliveto, ti na kakau loa e Sesu ni tisipulo e toka lua,

² o pati kia laua : Kolua ano ki le kolo leia e tuu i okoulua mua ; e kolua maua loa i ai se asino fafine leia e sisi, mo se uviki asino ; kolua tatala laua o aumai kiate au.

³ Ka pati atu loa se tasi ki se nea, kolua tali : E aoga laua ki le Aliki. Ti e tuku loa e ia laua ke ano i le temi fai lena.

⁴ Kae na soko le nea leinei ke fakasoko ai le nea leia na fakasa e le polofeta :

⁵ Pati ki le taine o Sione : Ko leinei, e au lou sau kiate koe, Apele i le agamalu, ti e eke i se asino, I se uviki asino, le uviki o se asino fafine.

⁶ Na ano loa a tisipulo, ti na la fai le nea leia na fakatotonu ake e Sesu kia laua.

⁷ Na la taki mai loa le matua asino fafine mo le uviki asino, ti na la teki loa kia laua ola kofu, ti na la fakaeke loa Sesu ki aluga.

⁸ Na folasi loa e le toka api o le kakai olatou kofu i le ala ; ti na tuuti loa e ni iki ni laai laakau, o tofaki i le ala.

⁹ Ko latou ala na ano i mua ti mo latou na muli ia Sesu na kalaga : Osana ki le Vosa o Tavite ! Tapusa leia e saele mai i le suafa o le Aliki ! Osana i ganea taualuga ai !

¹⁰ I lana ulu ki Selusalemi, na gatuu loa le kolo katoa, o pati : Ko ai leinei ?

¹¹ Na tali loa le kakai : Ko Sesu, le polofeta, mei Nasaleti i Kalilea.

Kapu o le kau faikoloa i le fale tapu

¹² Na ulu loa Sesu ki le fale tapu o le Atua. Na kapu loa e ia latou fuli ala na fai fakatau ti mo totogi koloa i le fale tapu ; na tekai loa e ia a laupapa o le kau fetogi paaga, ti mo ekeekeaga o le kau fakatau lupe.

¹³ Ti na pati loa Sesu kia latou : E tuu i le tosi : E fakaigoa loa loku fale ko se fale faikole. Kae ko kotou, kua kotou fakaliliu a ia ko se ana o tagata kaia.

¹⁴ Na fakafeofi ake loa kiate ia ni kivi mo ni kito i le fale tapu. Ti na fakamauli loa e ia latou.

¹⁵ Kae na loto veli loa le kau pule faisakilifisio mo le kau sekelipa, i lalatou tio ki nea fakamanamana ala na fai e ia, ti mo toe liliki ala kua kalaga i le loto fale tapu : Osana ki le Vosa o Tavite !

¹⁶ Ti na lotou pati loa kiate ia : Pe ke logo ki le nea leia e lotou pati ki ai ? Na tali loa Sesu kia latou : E io. Pe na leaise kotou lau ia folafola anei : Na ke maua ni fakavikiviki mei gutu o fanau liliki, ti mo latou ala koi u ?

¹⁷ Ti na tuku loa e ia latou, kae na mavae loa a ia mei le kolo o ano ki Petania, o nofo ai i le pouli.

Le tafito fiki sala fua

¹⁸ I le usu, i lana toe liliu ki le kolo, na fia kai loa a ia.

¹⁹ Ti na tio loa a ia ki se fiki i le ala, ti na fakafeofi loa a ia ki ai ; kae na maua loa e ia ni lau ata, ti na pati loa a ia ki le fiki : Ke aua na toe tupu loa se fua iate koe ! Ti na malo loa le fiki i le temi fai lena.

²⁰ Ko le kau tisipulo, ala na tio ki le nea lena, na ofolele loa, o pati : Pe na feaki le liliu o le fiki leinei o malo i se ga temi toetoe fua ?

²¹ Na tali loa Sesu kia latou : E kau pati maoki atu kia koutou, kapau e kotou maua le tui ti e leaise kotou toe lotolotolua fua, e leaise kotou fai fua le nea leinei kua fai ki le fiki nei, kae ka kotou pati loa ki le mauga leinei : Mavae i lena, o ano ki le tai, ti e soko loa le nea a ia.

²² Ko nea fuli ala e kotou kole loa i le tui i le faikole, e kotou maua loa a ia.

Lotolotolua ki le pule a Sesu-Kilisito

²³ Na ano loa Sesu ki le fale tapu, i le lolotoga o lana akonaki, na au loa le kau pule faisakilifisio mo le kau fakamatuatua o le kakai, o pati kiate ia : Ko le pule fea leia e ke fai ai a nea ana, ti ko ai leia na soli atu ia kiate koe le pule lena ?

²⁴ Na tali loa Sesu kia latou : E kau fai foki kia koutou se vesili ; kapau e kotou tali mai a ia kiate au, ti e kau fakasa atu loa kia koutou pe ko le pule fea leia e kau fai ai a nea anei.

²⁵ Pe au meifea le papitema a Soane ? Mei lagi, pe mei tagata ? Kae na lotou manatu loa ia latou : Kapau e tou tali : Mei lagi, e pati mai loa a ia kia tatou : Kolea loa na leaise kotou tui ai kiate ia ?

²⁶ Ti kapau e tou tali : Mei tagata, e tonu ke tou i loa ki le kakai, talie e lotou taofi fuli ko Soane ko se polofeta.

²⁷ Koia na lotou tali ai loa kia Sesu : E leaise motou iloa. Ti na pati loa Sesu kia latou : Mo au foki, e leaise kau fakasa atu loa pe ko le pule fea leia e kau fai ai a nea anei.

Folafola o vosa e lua

²⁸ Kolea lakoutou manatu ? Na maua e se tagata ni vosa e toka lua ; ti na masau loa a ia ki le uluaki, o pati : Ei loku fanau, ano o gaoi i le aso nei i laku vite.

²⁹ Na tali loa a ia : E leaise kau loto ki ai. Ti oki, na fakasemala loa a ia, ti na ano loa a ia ki ai.

³⁰ Ti na masau loa a ia ki leia ake, o toe pati fenaaki. Ti na tali loa le vosa lena : E kau loto malie ai, aliki. Ti na leaise ano a ia.

³¹ Ko ai ia laua na fai ia le finegalo o le tamana ? Na lotou tali loa : Ko le uluaki. Ti na pati loa Sesu kia latou : E kau pati maoki atu kia koutou, e muamua loa le kau popelikano mo fafine faiaga ki le puleaga o le Atua ia koutou.

³² Talie na au Soane kia koutou i le ala o le faitotonu, ti na leaise kotou tui kiate ia. Kae na tui kiate ia le kau popelikano mo fafine faiaga ; ti ko koutou, ala na tio ki le nea lena, na leaise kotou fakasemala o tui kiate ia.

Folafola o tagata faivite

³³ Kotou fakalogo mai ki se tasi folafola fakatata. Na i ai se tagata, ko se pule kaiga, leia na to ia loa se vite. Na a takatakai loa e ia le vite, ti na kenu loa e ia se nea tatau vite, ti na fakatuu loa e ia se tule ; ti oki, ti na lue loa e ia lana vite ki ni tagata faivite, ti na mavae loa a ia i le fenua.

³⁴ I le temi o le fuata, na kakau loa e ia ana tagata fakasausau ke ano ki le kau tagata faivite, o afa le fua o lana vite.

³⁵ Kae na too loa e le kau tagata faivite a tagata fakasausau, ti na lotou sasa loa le tasi, ti tukipooi le lua, ti tuki fatui le tolu.

³⁶ Na toe kakau loa e ia ni iki ake tagata fakasausau, o toka api ake ia latou ala na mua ; ti na toe fai fenaaki latou e le kau tagata faivite.

³⁷ I le fakaoki, na kakau loa e ia kia latou lona vosa, o pati feneeki : E lotou fakaapaapa loa ki loku vosa.

³⁸ Kae i le tio a le kau tagata faivite ki le vosa, na lotou pati loa : Ko leinei le vosa leia e tonu ke maua ia le tofiga ; kotou au, tou tamate a ia, kae tou maua loa lona tofiga.

³⁹ Ti na lotou too loa a ia, o ti kese mei le vite, ti na lotou tamate loa a ia.

⁴⁰ I le lakaga nei, ka au loa le pule o le vite, kolea loa ka fai e ia ki tagata faivite ana ?

⁴¹ Na lotou tali loa kia Sesu : E tamate fakaveliveli loa e ia a tagata itaita ana, kae toe lue loa e ia le vite ki ni iki ake tagata faivite, ala e soli ia loa kiate ia le fua o le vite i le temi o le fuata.

⁴² Na pati loa Sesu kia latou : Pe na leaise kotou lau i le Tosi : Ko le fa fatu leia na tiaki e le kau tufuga Kua liliu ko le fatu tafito o le agele ; Ko le nea lena e au mei le Aliki, Ti ko se nea fakaofolele ki otatou mata ?

⁴³ Koia, e kau pati atu kia koutou, e too loa le puleaga o le Atua meia koutou, o tuku ki se puleaga leia e fakatupu ia loa ni fua.

⁴⁴ Ko leia e vilo loa ki le fa fatu lena e fatifati loa i ai, ti ko leia e vilo loa ki ai le fa fatu lena e lailai loa.

⁴⁵ I le oki o lalatou fakalogo ki folafola fakatata ana, na matala loa le kau pule faisakilifisio mo le kau faliseo na masau Sesu kia latou,

⁴⁶ ti na lotou faiga loa ke too a ia ; kae na lotou tuania ia le kakai, talie na taofi a ia kiate ia ko se polofeta.