Mateo 20 - Tosi Tapu

Folafola o tagata gaoi

¹ Talie e fakatatau le puleaga o le atu lagi ki se tagata pule kaiga leia na usuusu o afa ni tagata gaoi ki lana vite.

² Na tuku loa a ia mo latou ki se fa tenalio e tasi i le aso, ti na kakau loa e ia latou ki lana vite.

³ Na toe ano loa a ia i le ola iva usu, ti na tio loa a ia ki ni iki ala na nonofo noa i le lapalasi.

⁴ Na pati loa a ia kia latou : Kotou ano foki ki laku vite, ti e kau soli atu loa kia kotou le nea leia e totonu.

⁵ Ti na lotou ano loa ki ai. Na toe ano loa a ia i le lalatea, ti mo le ola tolu sili lalatea, o fai fenaaki.

⁶ I le fakaoki na toe ano loa a ia i le ola lima afiafi, ti na maua loa e ia ni iki ala e nonofo i le lapalasi, ti na pati loa a ia kia latou : Kolea e kotou nonofo noa ai i leinei i le aso katoa ?

⁷ Na lotou tali loa kiate ia : Talie na leaise fakagaoii matou e se tasi. Na pati loa a ia kia latou : Kotou ano mo kotou foki ki laku vite.

⁸ I le afiafi, na pati loa le pule o le vite ki lana tagata pule koloa : Kalagai le kau gaoi, ti ke totogi latou, o kamata meia latou ala na muli o fai kia latou ala na mua.

⁹ Na au loa latou ala o le ola lima afiafi, ti na soli loa kia latou taki toka tasi se fa tenalio e tasi.

¹⁰ Na au loa latou ala na mua i le fakaoki, o lotou pati e lotou maua loa o lasi ake ; kae na lotou toe maua foki taki toka tasi se fa tenalio e tasi.

¹¹ I lalatou tali a ia, na lotou gugu loa ki le pule o le fale,

¹² o pati : Ko latou ala na muli na gaoi fai i le ola e tasi, ti na ke fakatatau latou mo matou, ala na tali ia le mafaia o le aso mo le vevela.

¹³ Na tali loa a ia ki se tasi o latou : Ei loku kaukau nea, e leaise kau sala kiate koe ; pe na leaise ke tuku mo au ki se fa tenalio e tasi ?

¹⁴ Too le nea leia e tonu ke ke maua, ti ke ano. E kau fia soli ki leia e muli o tatau mo koe.

¹⁵ Pe se taga kiate au ke kau fai ki loku koloa o mulimuli ki le nea leia e kau loto ki ai ? Pe ke tio fakaveli ki loku agamalie ?

¹⁶ Koia ko latou ala na mulimuli e muamua loa, kae ko latou ala na muamua e mulimuli loa.

Fakasa o lona mate mo lona toe tuuake

¹⁷ I le pale a Sesu ki Selusalemi, na vaei loa e ia a tisipulo e tino agafulu tupu lua, ti na pati loa a ia kia latou i le ala :

¹⁸ Ko leinei, e tou pale ki Selusalemi, ti e tuku loa le Vosa o le tagata ki le kau pule faisakilifisio ti mo le kau sekelipa. E lotou fakatuaa loa a ia ki le mate,

¹⁹ ti e lotou tuku loa a ia ki le kau pagani, ke lotou gologolo kiate ia, mo sasa a ia ki laakau, ti mo tutuki a ia i le koluse ; ti e toe tuuake loa a ia i le tolu o aso.

Tali a Kilisito ki le kole a le tinana o Sakopo mo Soane

²⁰ Na fakafeofi ake loa le tinana o vosa o Sepeteo kia Sesu mo ona tamaliki, ti na tulolo a ia, o fai kia Sesu se kole.

²¹ Na pati loa Sesu kiate ia : kolea e ke loto ki ai ? Na pati loa a ia kia Sesu : Fakatotonu ki oku tamaliki anei e toka lua, ke la tonatona, i lou puleaga, ko se tasi i lou fetuu atamai ti ko se tasi i lou fetuu sema.

²² Na tali loa Sesu : E leaise kotou iloa le nea leia e kotou kole. Pe feala ke kotou inu le ipu leia e tonu ke kau inu ? Na lotou pati loa : E motou mafai a ia.

²³ Na tali loa Sesu kia latou : E maoki e kotou inu loa loku ipu ; kae ki le tonatona i loku fetuu atamai mo loku fetuu sema, e leaise fakalogo a ia kiate au, ti e tuku a ia e loku Tamana kia latou fai ala kua taofi ki ai.

²⁴ Ko le tino agafulu, i lalatou logo ki le nea lena, na itaita loa ki le tautaina.

²⁵ Na kalagai loa latou e Sesu, o pati : E kotou iloa e taki fakamakeke a puleaga e le kau pule o puleaga, ti e fakapopulai latou e le kau lalasi.

²⁶ E leaise fenaaki loa i lotolotoga o koutou. Kae ko leia e loto ke lasi ia koutou, ke liliu a ia ko lakoutou tagata fakasausau.

²⁷ Ti ko leia e loto ke uluaki ia koutou, ke liliu a ia ko lakoutou tagata popula.

²⁸ Na fenaaki le au o le Vosa o le tagata, talie na leaise au a ia ke fakasausau ake kiate ia, kae na au a ia o fakasausau mo soli lona mauli ke totogi ai le toka api.

Fakamauli o kivi e toka lua

²⁹ I lalatou mavae i Seliko, na muli loa se kakai toka api ia Sesu.

³⁰ Ti ko leinei, na tonatona ni kivi e toka lua i tafa o le ala, ti na la logo loa ki le fakalaka a Sesu, ti na la kalaga loa : Alofa mai kia maua, Aliki, Vosa o Tavite !

³¹ Na feau loa laua e le kakai ke fakalologo ; kae na la asilisili kalaga leo lasi : Alofa mai kia maua, Aliki, Vosa o Tavite !

³² Na tuu loa Sesu, o kalagai laua, o pati : Kolea e kolua loto ke kau fai kia koulua ?

³³ Na la pati loa kiate ia : Aliki, ke mavaa oma mata.

³⁴ Na aloalofa loa Sesu kia laua, ti na fafa loa a ia ki ola mata ; ti na la tio loa i le lakaga fai lena, ti na la muli loa iate ia.