Mateo 2 - Tosi Tapu

Le kau masi

¹ Na tupu Sesu i Peteleemi i Sutea, i le temi o le sau ko Elote, ti na kaku mai se kau masi mei Olieto ki Selusalemi,

² ti na lotou pati : Kofea le Sau o le kau Sutea leia nao tupu fua ? Talie kua motou tio ki lona fetuu i Olieto, ti kua motou au o atolasio kiate ia.

³ I le logo a le sau ko Elote ki le nea lena, na mamae loa lona loto, mo Selusalemi katoa.

⁴ Na fakatasii loa e ia le kau pule faisakilifisio fuli mo le kau sekelipa fuli o le kakai, ti na afaafa loa e ia kia latou o uiga mo le ga nea leia e tonu ke tupu ai le Kilisito.

⁵ Na lotou pati loa kiate ia : I Peteleemi i Sutea ; talie ko leinei le nea leia na tosi e le polofeta :

⁶ Ti ko koe, Peteleemi, kele o Suta, E leaise ko koe ai ko se kolo noa i kolo tafito o Suta, Talie e tupu loa iate koe se pule Leia e fagai ia loa Iselaele, loku kakai.

⁷ Na kalagai fakapulipuli loa e Elote le kau masi, ti na afaafa totonu loa e ia kia latou pe na talu mei nafea le mu o le fetuu.

⁸ Ti na kakau loa e ia latou ki Peteleemi, o pati : Kotou ano, ti kotou afaafa a anoaga totonu fuli o uiga mo le ga toe ; ti ka kotou maua loa a ia, kotou fakailo mai kiate au, o tupu ke kau ano foki mo au totonu o atolasio kiate ia.

⁹ I le oki o lalatou fakalogo ki le sau, na lotou ano loa. Ti ko le fetuu leia na lotou tio ki ai i Olieto na ano i mua o latou o kaku ki le lakaga leia na kaku ai loa a ia ki aluga o le ganea leia na nofo ai le ga toe, ti na tuu loa a ia.

¹⁰ I le lakaga leia na lotou tio ai ki le fetuu, na lotou apele loa i se fiafia lasi.

¹¹ Na lotou ulu loa ki le fale, ti na lotou tio loa ki le ga toe mo Malia lona tinana, ti na lotou tutuli loa ki lalo o atolasio ki le ga toe ; ti na lotou fakamavaa loa olatou koloa, ti na lotou momoli loa kiate ia alatou moliga ko le aulo, mo le iseso ti mo le mila.

¹² Ti na fakasa loa e le Atua kia latou i se moe miti ke aua na toe liliu kia Elote, ti na lotou toe liliu loa ki lolatou fenua i se tasi ake a ala.

Sola ki Esipito

¹³ I le oki o lalatou mavae, na sa loa se aselo o le Aliki kia Sosefo i se moe miti, o pati : Tuu ki aluga, too le ga toe mo lona tinana, o sola ki Esipito, ti ke nofo i ai o kaku ki laku toe masau atu loa kiate koe, talie e afa loa le ga toe e Elote ke tamate.

¹⁴ Na tuu ake loa Sosefo i le pouli, o too le ga toe mo lona tinana, ti na mavae loa a ia ki Esipito.

¹⁵ Na nofo loa Sosefo i Esipito o kaku ki le mate o Elote, talie ke fakasoko ai le nea leia na fakasa fakatomua e le Aliki i le polofeta : Na kau kalagai loku vosa ke mavae mei Esipito.

Tamate e Elote o toe liliki tagata o Peteleemi

¹⁶ Ko Elote, i lana tio kua manogii a ia e le kau masi, na itaita lasi ai, ti na fakatotonu loa e ia ke tamate a toe tagata liliki fuli kua fetuu lua o ifo ki lalo, ala na nonofo i Peteleemi ti mo fenua fuli i ona tafatafa, o mulimuli ki le aso leia na afaafa logo ai a ia ki le kau masi.

¹⁷ Ti na fakasoko loa i ai le nea leia na fakasa e le polofeta ko Selemia :

¹⁸ Na logo ki se leo i Lama, Ko ni tagi mo ni tagi vale lalasi ai : E tagi e Lasele ana fanau, Ti na leaise loto a ia ke fakapelepele, Talie kua lotou pupuli.

Toe liliu a Sosefo o nofo i Nasaleti

¹⁹ I le oki o le mate o Elote, ko leinei na sa loa se aselo o le Aliki i se moe miti kia Sosefo i Esipito,

²⁰ o pati : Tuu ki aluga, too le ga toe mo lona tinana, ti ke ano ki le fenua o Iselaele, talie kua mamate latou ala na afa ia ke tamate le ga toe.

²¹ Na tuu ake loa Sosefo ki aluga, o too le ga toe mo lona tinana, ti na ano loa a ia ki le fenua o Iselaele.

²² Kae i le logo a Sosefo e sau i Sutea a Akelausi o fetogi Elote lona tamana, na i loa a ia i le ano ki ai ; ti na fakasa loa e le Atua kiate ia i se moe miti ke afe a ia ki le fenua o Kalilea,

²³ ti na ano loa a ia o nofo i se kolo na igoa ko Nasaleti, talie ke fakasoko ai le nea leia na fakasa fakatomua e le kau polofeta : E fakaigoa loa a ia ko le Nasaleti.