Mateo 19 - Tosi Tapu

Le mavete avaga mo le selipatea

¹ I le oki o akonaki ana, na mavae loa Sesu i Kalilea, o ano ki le fenua o Sutea, i leia atu fetuu o le Solotane.

² Na muli loa se kakai toka api iate ia, ti na fakamauli loa e ia le kau masaki.

³ Na nake loa le kau faliseo kiate ia, ti na lotou pati loa kiate ia ke asiasii ai a ia : Pe taga ke kapu e se tagata lona avaga i se nea ?

⁴ Na tali loa a ia : Pe na leaise kotou lau na fakatupu e le Atua i le kamataaga le tagata mo le fafine

⁵ ti na pati loa a ia : Koia e mavae ai loa le tagata i lona tamana mo lona tinana, ti e pipiki loa a ia ki lona avaga, ti e la liliu loa ko se tino e tasi ?

⁶ Koia e leaise koi la toka lua ai, kae kua la liliu ko se tino e tasi. Koia ke aua na veteki ai e le tagata le nea leia kua sai e le Atua.

⁷ Na lotou pati loa kiate ia : Kolea loa na tosi ai e Moisese ke tuku ki le fafine se tosi mavete ti ke kapu a ia ?

⁸ Na tali loa Sesu kia latou : E tupu ko le fefeka o okoutou loto, lena na tuku ai e Moisese kia koutou se fakataga ke kapu okoutou avaga. Kae i le kamataaga, na leaise fenaaki.

⁹ Kae e kau pati atu kia koutou : ko leia e kapu ia lona avaga, gato fai ki le tono mo se tasi ake tagata, ti toe avaga a ia mo se tasi ake fafine, e fai e ia se tono fafine.

¹⁰ Na pati loa ana tisipulo kiate ia : Kapau ko lena le anoaga o le tagata ki le fafine, ti e leaise aoga o le avaga.

¹¹ Na tali loa Sesu kia latou : E leaise matala tagata fuli ki le folafola lena, kae gato fai kia latou ala kua tuku ki ai le nea lena.

¹² Talie e i ai ni enuke ala na tupu fenaaki i le manava o olatou tinana ; ti e i ai ni iki ala na fakaliliu o fenaaki e ni tagata ; ti e i ai ni iki ala na fakaliliu o fenaaki e latou totonu, o tupu ko le puleaga o le atu lagi. Ko leia e feala lana matala ke matala.

Tapuaki e Sesu a toe liliki

¹³ Ti na aumai loa e ni kakai ni toe liliki kiate ia, o tupu ke teki e ia ona lima kia latou ti mo faikole a ia kia latou. Kae na tekei latou e le kau tisipulo.

¹⁴ Ti na pati loa Sesu : Tuku a toe liliki, aua na kotou taofi latou ke au kiate au ; talie e fakalogo le puleaga o le atu lagi kia latou ala e faipe ni toe liliki.

¹⁵ Na teki loa e ia ona lima kia latou, ti na mavae loa a ia i lena.

Le tagata tupulaga mou koloa

¹⁶ Ti ko leinei, na fakafeofi ake loa se tagata, o pati kia Sesu : Pule, kolea le nea leia e tonu kau fai o malie ke maua ai le mauli lee gato ?

¹⁷ Na tali loa Sesu kiate ia : Kolea e ke vesili mai ai kiate au o uiga mo le nea e malie ? Ko se toka tasi e malie ko le Atua. Kapau e ke fia ulu ki le mauli, tausi a fakatotonu. Na pati loa a ia kia Sesu : A fakatotonu fea ?

¹⁸ Ti na tali loa Sesu : Aua na ke tukipo ; aua na ke tono ; aua na ke kaia ; aua na ke fakamaoki loi ; fakaapaapa ki lou tamana mo lou tinana ;

¹⁹ ti e ke alofa loa ki lou oloi ofaipe kiate koe totonu.

²⁰ Na pati loa le tagata tupulaga kiate ia : Kua kau fai a nea fuli ana ; kolea koi puli kiate au ?

²¹ Na pati loa Sesu kiate ia : Kapau e ke loto ke ke malie tukupau, ano o fakatau le nea leia e ke maua, soli a ia ki le kau mativa, ti e ke maua loa se koloa i le lagi. Ti ke au, o muli mai iate au.

²² I lana logo ki folafola ana, na ano loa le tagata tupulaga i le loto mamae ; talie na lasi ai ona koloa.

²³ Na pati loa Sesu ki ana tisipulo : E kau pati maoki atu kia koutou, e faigataa ai ke ulu se tagata mou koloa ki le puleaga o le atu lagi.

²⁴ E kau toe pati atu kia koutou, e faigaofie ake ke ulu se kamelo i le pu o se tui i le ulu a se tagata mou koloa ki le puleaga o le Atua.

²⁵ I le logo a le kau tisipulo ki le nea lena, na lotou ofolele lasi ai, o pati : Ko ai loa e feala ke saofaki ?

²⁶ Na tio loa Sesu kia latou, o pati : E leaise feala le nea lena ki tagata, kae e feala a nea fuli ki le Atua.

Fakapale o le kau apositolo i le temi nei mo le puleaga ka au

²⁷ Na masau loa Petelo, o pati kiate ia : Ko leinei, kua motou tuku a nea fuli, ti kua motou muli iate koe ; kolea loa ka soko kia matou ?

²⁸ Na tali loa Sesu kia latou : E kau pati maoki atu kia koutou, i le aso leia e eke ai loa le Vosa o le tagata ki le ekeekeaga fakasau o lona kololia, i le fakafoou o nea fuli, ko kotou ala na muli mai iate au e kotou ekeeke loa i ni ekeekeaga fakasau e kau agafulu tupu lua, ti e kotou fakamaui loa a faasiga e kau agafulu tupu lua o Iselaele.

²⁹ Ti ko leia e tuku ia loa, o tupu ko loku suafa, ona fetaina, mo ona tuagaane, mo lona tamana, mo lona tinana, mo lona avaga, mo ana fanau, mo ona kele, mo ona fale, e maua loa e ia o liuga kau lelau, ti e maua tofiga loa e ia le mauli lee gato.

³⁰ Kae toka api o latou ala na muamua e liliu loa o mulimuli, ti toka api o latou ala na mulimuli e liliu loa o muamua.