Mateo 18 - Tosi Tapu

Tui a toe ikiiki

¹ I le temi a ia, na fakafeofi ake loa le kau tisipulo kia Sesu, o pati : Ko ai loa e lasi oki i le puleaga o le atu lagi ?

² Ti na kalagai loa e Sesu se ga toe ikiiki, ti na fakatuu loa e ia a ia i loto malie o latou,

³ o pati : E kau pati maoki atu kia koutou, kapau e leaise kotou tafoki ti mo kotou liliu ofaipe ni toe liliki, e leaise kotou ulu loa ki le puleaga o le atu lagi.

⁴ Koia, ko leia ka fakataulalo loa ofaipe le ga toe ikiiki leinei ko ia leia ka liliu loa o lasi oki i le puleaga o le atu lagi.

⁵ Ti ko leia e tali ia i loku suafa se ga toe ikiiki ofaipe ia leinei e tali ia au totonu.

⁶ Kae kapau e fakasalai e se tasi se tasi o toe liliki ana e tui kiate au, e malie ake kiate ia ke tau ki lona ua se fa fatu, ti ke ti a ia ki le takele o le moana.

Nea fakatupu veli mo nea fakatupu siga

⁷ Malaia ki le malama nei o tupu ko fakasala ! Talie e aoga ke soko ni fakasala ; kae malaia ki le tagata leia e tupu mei ai le fakasala !

⁸ Kapau e fakasala kiate koe lou lima pe ko lou vae, tuuti laua o ti fakamamao meiate koe ; e malie ake lau ulu kito pe lima mutu ki le mauli, i lau maua a lima e lua mo vae e lua kae ti a koe ki le afi lee gato.

⁹ Ti kapau e fakasala kiate koe lou mata, kapei a ia o ti fakamamao meiate koe ; e malie ake lau ulu ki le mauli mo se fa mata e tasi, i lau maua a fa mata e lua kae ti a koe ki le afi o Ifeli.

¹⁰ Kotou tokaga na kotou nukinuki ki se tasi fua o toe liliki anei ; talie e kau pati atu kia koutou e tio tuumau olatou aselo i le atu lagi ki mata o loku Tamana leia e nofo i le atu lagi.

¹¹ Talie na au le Vosa o le tagata o saofaki le nea leia kua puli.

¹² Kolea lakoutou manatu ? Kapau e maua e se tagata ni ovi e kau lelau, ti e puli loa se ovi e tasi o latou, pe se tuku loa e ia le kau iva tupu iva i le mauga, kae ano loa a ia o afa leia kua puli ?

¹³ Ti kapau e maua e ia a ia, e kau pati maoki atu kia koutou, e lasi ake lona fiafia i le ovi lena e tasi i le kau iva tupu iva leia na leaise sese.

¹⁴ Koia e leaise ko le finegalo ai o lokoutou Tamana i le atu lagi ke puli se toka tasi o toe liliki ana.

Lekula i le Ekelesia ; loto tasi i le faikole

¹⁵ Kapau na agasala lou taina kiate koe, ano o fakasa kiate ia lana agasala, a koe toka tasi mo ia. Kapau e fakalogo a ia kiate koe, ti kua ke fakalauatea lou taina.

¹⁶ Kae kapau e leaise fakalogo a ia kiate koe, too mo koe se toka tasi pe ko se toka lua, talie ke fakatokatoka a nea fuli i le fakamaoki a se toka lua pe ko se toka tolu.

¹⁷ Kapau e leaise fia fakalogo a ia kia latou, fakasa a ia ki le Ekelesia ; ti kapau e leaise fia fakalogo a ia ki le Ekelesia, ke fai a ia kiate koe pe se tagata pagani, pe ko se popelikano.

¹⁸ E kau pati maoki atu kia koutou, ko nea fuli ala e kotou sai loa i le kele e sai loa i le lagi, ti ko nea fuli ala e kotou tatala loa i le kele e tatala loa i le lagi.

¹⁹ E kau toe pati atu foki kia koutou, kapau e loto tasi se toka lua ia koutou i le kele o kole se nea fua, e tuku loa a ia kia laua e loku Tamana leia e nofo i le atu lagi.

²⁰ Talie ko le ganea leia e fakatasi ai i loku suafa se toka lua pe ko se toka tolu, e kau nofo i loto malie o latou.

²¹ Ti na fakafeofi ake loa Petelo kiate ia, o pati : Aliki e tua fia loa laku fakamolemole ki loku taina, mo ka agasala mai a ia kiate au ? Pe kaku loa ki le tua fitu ?

²² Na pati loa Sesu kiate ia : E leaise kau pati atu kiate koe e kaku ki le tua fitu, kae e kaku ki le tua kau fitu tupu fitu liuga fitu.

²³ Koia e fakatatau loa le puleaga o le atu lagi ki se sau leia kua loto ke fakamaui a gaoi o ana tagata fakasausau.

²⁴ I lana kamata lau, na aumai loa kiate ia se tasi leia na tuu maua ki ni fa taimane e kau agafulu afe.

²⁵ Na leaise maua e ia se nea leia ke ui ai lona maua, ti na fakatotonu loa e lona pule ke fakatau a ia, mo lona avaga, mo ana fanau, mo nea fuli ala na maua e ia, ke ui ai le maua.

²⁶ Na tulolo loa le tagata fakasausau ki le kele i ona mua, o pati : Aliki kataki fualoa mai kiate au, ti e kau ui atu loa a nea fuli kiate koe.

²⁷ Na aloalofa loa le pule o le tagata fakasausau kiate ia, o tuku a ia ke ano, ti na fakamolemole e ia lona maua kiate ia.

²⁸ I lana ulu ki fafo, na felavei loa le tagata fakasausau lena mo se tasi i ona kaukau nea leia na tuu maua kiate ia ko le kau lelau tenalio. Na tapo loa e ia a ia, o kukumi lona ua, o pati : Ui mai lou maua kiate au.

²⁹ Na tulolo loa lona kaukau nea ki le kele, o kolekole kiate ia, o pati : Kataki mai kiate au, ti e kau ui atu loa kiate koe.

³⁰ Kae na leaise loto loa leia ake tagata fakasausau, ti na ano loa a ia o ti a ia ki le pilisoni, o kaku ki le oki o le ui o lona maua.

³¹ Na tio loa ona kaukau nea ki le nea leia na soko, ti na lotou loto mamae lasi ai, ti na lotou ano loa o fakamatala ki lolatou pule a nea fuli kua soko.

³² Ti na kalagai loa e le pule lana tagata fakasausau, o pati kiate ia : Tagata fakasausau agaveli, na kau fakamolemole katoa lou maua kiate koe, talie na ke kolekole mai kiate au ;

³³ pe na se tonu foki ke ke alofa ki lou kaukau nea, ofaipe loku alofa kiate koe ?

³⁴ Ti na ita lasi ai lona pule, ti na ave loa e ia a ia ki le pilisoni ke mamae i ai, o kaku ki lana ui katoa lona maua.

³⁵ Ti e fai fenaaki loa kia koutou e loku Tamana leia e nofo i le atu lagi, mo kapau e leaise kotou tasi fakamolemole ki lona taina i le loto katoa.