Mateo 17 - Tosi Tapu

Fetogi o Sesu ; tio o le puleaga ka au

¹ Na sili loa ki ai ni aso e ono, ti na vaei loa e Sesu a Petelo, mo Sakopo, mo Soane, lona taina, ti na ave loa e ia latou ki se mauga taualuga.

² Na fetogi loa a ia i olatou mua ; na gigila loa ona mata ofaipe le laa, ti na tetea loa ona kofu ofaipe le malama.

³ Ti ko leinei, na sa loa Moisese mo Elia kia latou, e masau mo Sesu.

⁴ Na masau loa Petelo, o pati kia Sesu : Aliki, e malie ke tou nonofo i leinei ; kapau e ke loto ki ai, e kau fakatuu loa i leinei ni falela e tolu, ko se tasi mo ou, ko se tasi mo Moisese, ti ko se tasi mo Elia.

⁵ I le lolotoga o lana masau, na uufi loa latou e se ao gigila. Ti ko leinei, na fakasa loa e se leo mei le ao a folafola anei : Ko ia leinei ko loku Alo alofaina, leia kua kau tuku ki ai loku alofa : Kotou fakalogo kiate ia !

⁶ I lalatou logo ki le leo lena, na sisiga loa le kau tisipulo o fakapulou ki le kele, ti na lotou i lasi ai.

⁷ Kae na fakafeofi ake loa Sesu, o fafa kia latou, o pati : Kotou tutuu ki aluga, aua na kotou i !

⁸ Na tagaki ake loa olatou mata ki aluga, ti na lotou tio loa kia Sesu toka tasi.

⁹ I le lolotoga o lalatou ifo mei le mauga, na tuku loa e Sesu kia latou le fakatotonu leinei : Aua na kotou masau ki se tasi o uiga mo le nea leia na kotou tio ki ai, o kaku ki le toe tuuake o le Vosa o le tagata mei le kau mate.

¹⁰ Na vesili loa le kau tisipulo kiate ia : Kolea e pati ai le kau sekelipa e tonu ke uluaki au Elia ?

¹¹ Na tali loa Sesu : E maoki e tonu ke au mua Elia, o fakatuutuu a nea fuli.

¹² Kae e kau pati atu kia koutou kua au Elia, ti na leaise lotou iloa a ia, kae na lotou fai kiate ia o mulimuli ki olatou loto. E toe mamae fenaaki foki le Vosa o le tagata meia latou.

¹³ Na matala loa le kau tisipulo na masau a ia kia latou o uiga mo Soane-Patita.

Noa o tisipulo ; mafimafi o Sesu

¹⁴ I lalatou kaku mai ki le kakai, na au loa se tagata o tutuli i mua o Sesu, o pati :

¹⁵ Aliki, alofa mai ki loku vosa, leia e galigalivale, ti e mamae lasi ai ; e tau vilo a ia ki le afi mo le vai.

¹⁶ Na kau aumai a ia ki au tisipulo, ti na leaise mafai ke lotou fakamauli a ia.

¹⁷ Na tali loa Sesu : Lanu tui gataa mo aga fakalialia, e kaku loa kiafea laku nofo mo koutou ? E kaku loa kiafea laku kataki kia koutou ? Aumai a ia ki leinei.

¹⁸ Na valoki loa e Sesu le temonio, ti na mavae loa a ia iate ia, ti na mauli loa le toe i le ola lena.

¹⁹ Ti na fakafeofi ake loa le kau tisipulo kia Sesu, ti na lotou pati loa kiate ia i le temi leia na lotou tefua ai : Kolea na leaise mafai ai ke motou kapu le temonio lena ?

²⁰ Na pati loa Sesu kia latou : E tupu ko lokoutou tui gataa. E kau pati maoki atu kia koutou, kapau e kotou maua se tui ofaipe se fuai sinapi ; e kotou pati loa ki le mauga lena : Mataaki i leinei ki leia, ti e mataaki loa a ia ; e leaise toe faigataa loa se nea kia koutou.

²¹ Ti koi mavae le faasiga temonio lena i le faikole mo le sesunio.

²² I le lolotoga o lalatou feanoaki i Kalilea, na pati loa Sesu kia latou : E tonu ke tuku le Vosa o le tagata ki lima o tagata ;

²³ E lotou tamate loa a ia, ti e toe tuuake loa a ia i le tolu o aso. Na lotou loto mamae lasi ai.

Le fa piesi i le gutu o se ika

²⁴ I lalatou kaku ki Kafanaume, ko latou ala na tae ia a fa talame e lua na masau loa kia Petelo, o pati kiate ia : Pe se ui e lokoutou pule a fa talame e lua ?

²⁵ Na pati loa a ia : E io. Ti e i lana ulu ki le fale, na taofi loa a ia e Sesu, o pati kiate ia : Kolea lau manatu, Simone ? Ko sau o le malama nei, e lotou tae a maua mo tukusau meifea ? Mei olatou vosa, pe mei ni matapule ?

²⁶ Na pati loa Petelo kiate ia : Mei ni matapule. Na tali loa Sesu kiate ia : E sao loa a vosa i le tukusau.

²⁷ Kae, o tupu ke aua na lotou siga, ano ki le tai, o ti le matau, ti ke toso mai le uluaki ika leia ka au loa ; fakamavaa lona gutu, ti e ke maua loa se fa setatele. Too a ia, ti ke soli a ia kia latou ma aku mo koe.