Mateo 16 - Tosi Tapu

Valoki ki le kau faliseo kivi

¹ Na nake loa le kau faliseo mo le kau Satuseo o fakafelavei kia Sesu, ti e o tupu ke lotou asiasii a ia, na lotou kole loa kiate ia ke fakatio latou ki se milakulo leia e au mei le lagi.

² Na tali loa Sesu kia latou : I le afiafi, e kotou pati : E laofie loa talie e kula le lagi ; ti i le usu :

³ E tuu veli le aso nei talie e kula fakapouli le lagi. E kotou iloa le vakai o le anoaga o le lagi, kae e leaise kotou mafai ia le vakai o fakamailoga o temi nei.

⁴ E kole e se tautupu agaveli mo fai feauaki se milakulo ; e leaise toe tuku loa kiate ia se tasi ake milakulo i leia o Sonasi. Ti na tuku loa e ia latou, kae ano loa a ia.

⁵ Na galo loa i le kau tisipulo, i lalatou fakalaka ki leia ake fetuu, ke lotou too ni pane.

Le fakatupu a le kau faliseo mo le kau Satuseo

⁶ Na pati loa Sesu kia latou : Kotou tokaga ki le fakatupu a le kau faliseo mo le kau Satuseo.

⁷ Na manatu loa le kau tisipulo i olatou loto, o pati : E tupu talie na leaise tou too ni pane.

⁸ Na iloa loa e Sesu le nea lena, ti na pati loa a ia : Kolea e kotou manatu fenaaki ai i okoutou loto, kakai tui gaegae, o tupu ko lokoutou au noa kae na leaise kotou too ni pane ?

⁹ Pe koi kotou sala atamai aifai, pe leaise koi kotou manatui fua a fa pane e lima ki tagata e tino afe lima ti mo le lasi o polapola ala na kotou ave,

¹⁰ pe ko fa pane e fitu ki tagata e tino afe fa ti mo le lasi o polapola ala na kotou ave ?

¹¹ E feaki e leaise kotou matala ai e leaise ko ni pane ala na kau masau atu ki ai ? Kae ke kotou tokaga ki le fakatupu a le kau faliseo mo le kau Satuseo.

¹² Ti na lotou matala loa i ai na leaise masau a ia ki le fakatupu leia o le pane, kae ki le akonaki a le kau faliseo mo le kau Satuseo.

Fakasa e Petelo ko Sesu ko le Kilisito

¹³ Na kaku loa Sesu ki le fenua o Sesalea o Filipo, ti na vesili loa a ia ki ana tisipulo : Kolea le pati a le kakai kiate au, ko le Vosa o le tagata ?

¹⁴ Na lotou tali loa : E pati ni iki ko Soane-Patita a koe ; ti ko iki ko Elia ; ti ko iki ko Selemia, pe ko se tasi o le kau polofeta.

¹⁵ Na pati loa a ia kia latou : Kae ko koutou, e kotou pati ko ai au ?

¹⁶ Na tali loa Simone Petelo : Ko le Kilisito a koe, ko le Alo o le Atua mauli.

Uluaki fakasa o le Ekelesia

¹⁷ Ti na folafola loa Sesu, o pati kiate ia : E ke manuia Simone, vosa o Sonasi ; talie e leaise ko le kanofi mo le toto ala na fakasa ia atu kiate koe le nea lena, kae ko loku Tamana leia e nofo i le atu lagi.

¹⁸ Ti ko au, e kau pati atu kiate koe, ko Petelo a koe, ti e kau fakatuu loa i le utu lena loku Ekelesia, ti e leaise makeke loa a matapa o le nofoaga o le kau mate iate ia.

¹⁹ E kau tuku loa kiate koe a kalavi o le puleaga o Selo : Ko le nea leia e ke sai loa i le kele e sai loa i le atu lagi, ti ko le nea leia e ke tatala loa i le kele e tatala loa i le atu lagi.

²⁰ Ti na kole fakamakeke loa e ia ki le kau tisipulo ke aua na fakasa fua ki se tasi ko le Kilisito a ia.

Fakasa o lona mate mo lona toe tuuake

²¹ Talu loa mei ai na kamata fakasa loa e Sesu ki ana tisipulo e tonu ke ano a ia ki Selusalemi, ke mamae lasi a ia mei le kau fakamatuatua, mo le kau pule faisakilifisio ti mo le kau sekelipa, ke mate a ia, ti ke toe tuuake a ia i le tolu o aso.

²² Na too loa a ia e Petelo ki se ganea kese, o fai ni valoki kiate ia, o pati : Aliki, i mua o le Atua ! E leaise soko loa le nea lena kiate koe.

²³ Kae na mafuli loa Sesu, o pati kia Petelo : Ano ki oku muli, Satana ! E ke fakatupu siga kiate au ; talie ko au manatu e leaise ko manatu a le Atua, kae ko manatu a tagata.

Le kosekalasio o le tisipulo

²⁴ Na pati loa Sesu ki ana tisipulo : Ko leia e fia muli mai iate au, ke fakafiti a ia kiate ia totonu, ke amo e ia lona koluse, ti ke muli mai a ia iate au.

²⁵ Talie ko leia e fia saofaki ia lona mauli e fakapuli noa ia loa a ia, kae ko leia e fakapuli noa ia loa lona mauli o tupu ko au e toe maua ia loa a ia.

²⁶ Ti kolea lona aoga ki se tagata ke maua e ia le malama nei katoa, kae e puli noa lona laumalie ? pe kolea e soli loa e se tagata ke totogi ai lona laumalie ?

²⁷ Talie e tonu ke au le Vosa o le tagata i le kololia o lona Tamana, mo ana aselo ; ti e totogi loa e ia ki tagata taki toka tasi o mulimuli ki ana gaoi.

²⁸ E kau pati maoki atu kia koutou, ko ni iki ia latou ala e nonofo i leinei e leaise mamate loa, kae e leikiaise lotou tio ki le saele mai o le Vosa o le tagata i lona puleaga.