Mateo 15 - Tosi Tapu

Ko le kau faliseo mo le talatisio

¹ Ti na au loa ni faliseo mo ni sekelipa mei Selusalemi kia Sesu, ti na lotou pati loa :

² Kolea e maumaui ai e au tisipulo le talatisio a le kau matua mago ? Talie e leaise fufulu olatou lima mo ka lotou kai.

³ Na tali loa Sesu kia latou : Ti ko koutou, kolea e kotou maumaui ai le fakatotonu a le Atua, o tupu ko lakoutou talatisio ?

⁴ Talie na pati le Atua : Fakaapaapa ki lou tamana mo lou tinana ; ti : Ko leia loa ka lauveli ki lona tamana pe ki lona tinana e tua loa a ia ki le mate.

⁵ Kae ko koutou, e kotou pati : Ko leia e pati loa ki lona tamana pe ki lona tinana : Ko le nea leia na tonu ke kau taupau ai a koe ko se moliga ki le Atua, e leaise toe maua loa a ia ki lona tamana pe ki lona tinana.

⁶ E kotou fakanoai i ai le folafola a le Atua, o tupu ko lakoutou talatisio.

⁷ Kau malualoi, na tonu ai Esaia i lana folafola kikite kia koutou, o pati :

⁸ E fakaapaapa le kakai nei kiate au i olatou laugutu, Kae e mamao olatou loto iate au.

⁹ E maumau noa lalatou fakavikiviki kiate au, Talie e lotou tuku ni lekula fakatagata ofaipe ni pelesepeto meiate au.

Le anoaga maoki o le loto o le tagata

¹⁰ Ti na kalagai loa e ia le kakai, o pati kia latou : Kotou fakalogo, ti kotou matala.

¹¹ E leaise ko le nea leia e ulu ki le gutu e fakakelekele ia le tagata ; kae ko le nea leia e mavae mei le gutu e fakakelekele ia le tagata.

¹² Na fakafeofi ake loa ana tisipulo, o pati kiate ia : Pe ke iloa na tukia le kau faliseo i lalatou logo ki le folafola lena ?

¹³ Na tali loa Sesu : Ko ga laakau fuli ala na leaise to e loku Tamana i Selo e taaki loa.

¹⁴ Tuku noa latou : Ko ni kivi latou ala e taki ia ni kivi ; kapau e taki e se kivi se tasi a kivi, e la vivilo toka lua loa ki se popoko.

¹⁵ Na masau loa Petelo, o pati kiate ia : Fakamatala mai kia matou le folafola fakatata lena.

¹⁶ Ti na pati loa Sesu kiate ia : Mo koutou foki, pe koi kotou sala atamai aifai ?

¹⁷ Pe leaise kotou matala ko nea fuli ala e ulu ki le gutu e ano ki le manava, ti e tiaki ki ganea fakapulipuli ?

¹⁸ Kae ko le nea leia e mavae mei le gutu e au mei le loto, ti ko le nea lena e fakakelekele ia le tagata.

¹⁹ Talie e au mei le loto a manatu veveli, mo tukipo, mo tono, mo oli veli, mo kaia, mo fakamaoki loi, ti mo fatituu.

²⁰ Ko nea ana ala e fakakelekele ia le tagata ; kae ki le kai kae leaise fufulu a lima, e leaise fakakelekele e ia le tagata.

Sesu mo le fafine Kanaane

²¹ I lana mavae i lena, na ano loa Sesu ki le fenua o Tile mo Sitone.

²² Ti na au loa se fafine Kanaane mei fenua ana, o kalaga kiate ia : Alofa mai kiate au, Aliki, Vosa o Tavite ! Kua veli ai loku taine i le fakavelivelii e temonio.

²³ Na leaise tali fua Sesu kiate ia, ti na fakafeofi ake loa ana tisipulo, o kole fakamakeke kiate ia : Kakau le fafine ke ano, talie e taukalaga a ia i otou muli.

²⁴ Na tali loa Sesu : Na kakau mai au ki ovi sese o le fale o Iselaele.

²⁵ Kae na au loa le fafine o tulolo i ona mua, o pati : Aliki, fakamauli au !

²⁶ Na tali loa Sesu : E leaise malie ke too le pane a fanau, o ti ki ni uviki kuli.

²⁷ Na tali loa le fafine : Io, Aliki, kae e kai e uviki kuli a momo ala e maluluku mei le laupapa o olatou pule.

²⁸ Ti na pati loa Sesu kiate ia : Fafine, e lasi ai lau tui, ke fai ki le nea leia e ke loto ki ai. Ti na mauli loa lona taine i le ola fai lena.

Fakamauli o masaki kesekese

²⁹ Na mavae loa Sesu i ganea ana, ti na ano loa a ia o ofi ki le tai o Kalilea. Na pale loa a ia ki le mauga, o tonatona i ai.

³⁰ Ti na fakafeofi ake loa kiate ia se kakai toka api, o aumai ni kito, mo ni kivi, mo ni gutu mate, mo ni maimoa, ti mo ni iki ake masaki mauke ai. Na tuku loa latou ki vae o Sesu, ti na fakamauli loa e ia latou ;

³¹ ti na ofolele le kakai i le tio kua masau a gutu mate, kua mauli a maimoa, kua saele a kito, kua tio a kivi ; ti na fakakololia loa le kakai ki le Atua o Iselaele.

Liuga o pane ki tagata e tino afe fa

³² Na kalagai loa e Sesu ana tisipulo, o pati : E kau aloalofa ki le kakai leinei ; talie kua aso tolu loa lalatou nonofo i oku tafa, ti e leaise lotou maua se nea ke kai. E leaise kau fia kakau latou ke ano pakupaku, talie na lotou ninimo loa i le ala.

³³ Na pati loa le kau tisipulo kiate ia : E feaki ke lotou maua i le ganea lavaki leinei ni pane feauga ke makona ai se kakai toka api feneeki ?

³⁴ Na vesili loa Sesu kia latou : Ko fa pane e fia ala e kotou maua ? Na lotou tali loa : E fitu ti mo ni ga ika liliki.

³⁵ Na fakanonofo loa e Sesu le kakai ki le kele,

³⁶ ti na too loa e ia a fa pane e fitu mo ga ika, ti i le oki o lana fakafetai, na tofitofi loa e ia latou, o soli ki ana tisipulo, ke lotou tufa ki le kakai.

³⁷ Na kai loa le kakai katoa, ti na lotou makona loa, ti na ave loa ni polapola e fitu kua apele i toei kaiga.

³⁸ Ko latou ala na kai ko tagata e tino afe fa, kae na leaise lau a fafine mo toe.

³⁹ Ti oki na kakau loa e Sesu le kakai ke ano, ti na sopo loa a ia ki le vaka, o ano ki le fenua o Makatane.