Mateo 14 - Tosi Tapu

Tukipo o Soane-Patita

¹ I le temi a ia, na logo loa le sau ko Elote ki le masaui o Sesu, ti na pati loa a ia ki ana tagata fakasausau : Ko Soane-Patita !

² Kua tuu ake a ia mei le kau mate, ti ko le tupuaga lena o lana fai milakulo.

³ Talie na kakau e Elote ke too Soane, ti ke sai a ia, ti ke tuku a ia ki le pilisoni, o tupu ko Elotiasi, avaga o Filipo, lona taina,

⁴ talie na pati Soane kiate ia : E leaise taga kiate koe ke ke nofo fakataumatua mo ia.

⁵ Na loto Elote ke tamate Soane, kae na tuania ia e ia le kakai, talie na latou tuku ko Soane ko se polofeta.

⁶ Kae i le fakamanatu o le aso tupu o Elote, na mako loa le taine o Elotiasi i loto malie o le kau fakaafe, ti na malie a ia kia Elote.

⁷ Koia na fai ai loa e Elote se fakapapau i mua o le kaugamalie ke soli kiate ia a nea fuli ala e kole ake loa e le taine kiate ia.

⁸ I lona ekenaki e lona tinana, na pati loa le taine : Soli mai kiate au i leinei, i se pa, le fa ulu o Soane-Patita.

⁹ Na mamae ai le sau, kae o tupu ko lana fakapapau leia kua fai, ti mo le kau fakaafe, na fakatotonu loa e ia ke soli ki le taine le fa ulu o Soane,

¹⁰ ti na fakatotonu loa e ia ke ano, o tuuti mai le fa ulu o Soane i le fale pilisoni.

¹¹ Na aumai loa lona fa ulu i se pa, o soli ki le taine, ti na ave loa a ia e le taine ki lona tinana.

¹² Na au loa a tisipulo a Soane, o ave lona tino o tanu. Ti na lotou ano loa o fakailo a ia kia Sesu.

¹³ I le logo lena, na mavae loa Sesu i le ganea lena i se vaka, ke ano ki se ganea lavaki ; kae na iloa loa e le kakai le nea lena, ti na lotou mavae loa mei kolo o mulimuli iate ia, o saele i le mata tai.

¹⁴ I le sopo a Sesu mei le vaka, na tio loa a ia ki se kakai toka api, ti na aloalofa loa a ia kia latou, ti na fakamauli loa e ia le kau masaki.

Liuga o pane ki tagata e tino afe lima

¹⁵ I le malu o le afiafi, na fakafeofi ake loa le kau tisipulo kiate ia, o pati : E lavaki le ganea leinei ti kua tausala, kakau le kakai ke ano ki kolo o totogi ni nea ke lotou kai.

¹⁶ Na tali loa Sesu kia latou : E leaise aoga ke lotou ano ; kotou soli e koutou totonu kia latou se nea ke kai.

¹⁷ Kae na lotou pati loa kiate ia : E motou maua fai i leinei ni fa pane e lima ti mo ni ga ika e lua.

¹⁸ Ti na pati loa a ia : Aumai latou kiate au.

¹⁹ Na fakanonofo loa e ia le kakai ki lalo i le mutie, ti na too loa e ia a fa pane liliki e lima mo ga ika e lua, ti na tagaki loa ona mata ki le lagi, o fakafetai. Ti na tofitofi loa e ia a fa pane, o soli ki ana tisipulo, ke lotou tufa ki le kakai.

²⁰ Na lotou kakai fuli loa ti na lotou makokona loa, ti na lotou ave loa ni polapola e kau agafulu tupu lua kua apele i toei kaiga.

²¹ Ko latou ala na kai na fakaano ki tagata e tino afe lima tagata, kae na leaise lau a fafine mo toe.

Saele a Sesu i le tai

²² I le oki fai o le nea lena, na fakamaua loa e ia le kau tisipulo ke sopo ki le vaka o muamua ki leia ake fetuu tai, kae kakau mua e ia le kakai.

²³ I le oki o lana kakau le kakai, na pale loa a ia toka tasi ki le mauga, o faikole ; ti e i le malu o le afiafi, na nofo toka tasi loa a ia i ai.

²⁴ Kua kaku foki le vaka ki loto malie o le tai, ti na lagai mo fakavilo a ia e galu ; talie na tuu le matagi mei mua.

²⁵ I le vaega fa o le pouli, na ano loa Sesu kia latou, o saele i aluga o le tai.

²⁶ I le tio a le kau tisipulo kiate ia e saele i aluga o le tai, na lotou i loa, o pati : Ko se tuuola ! Ti na lotou taukalaga loa, i le lasi o lolatou i.

²⁷ Kae na pati loa Sesu kia latou i le temi fai lena : Kotou fimalie, ko au, aua na kotou i !

²⁸ Na tali loa Petelo kiate ia : Aliki, kapau ko koe, fakatotonu mai ke kau natu kiate koe i aluga o le tai.

²⁹ Ti na pati loa a ia : Au ! Na sopo loa Petelo mei le vaka, ti na saele loa a ia i aluga o le tai, o ano kia Sesu.

³⁰ Kae, i lana tio ki le makeke o le matagi, na i loa a ia ; ti i lona kamata ogo, na kalaga loa a ia : Aliki saofaki au !

³¹ I le temi fai lena na falo loa e Sesu lona lima o too a ia, ti na pati loa a ia kiate ia : Tagata tui gaegae, kolea na ke lotolotolua ai ?

³² Na la sopo loa ki le vaka, ti na mate loa le matagi.

³³ Ko latou ala na nonofo i le vaka na au loa o su kia Sesu, o pati : Ko le Alo maoki a koe o le Atua.

Fakamauli o ni masaki i Senesaleti

³⁴ Na lotou fakalaka loa i le tai, ti na lotou kaku loa ki le fenua ko Senesaleti.

³⁵ Ko kakai o le ganea lena, i lalatou iloa Sesu, na kakau ia loa ni tagata avelogo ki potu fuli i olatou tafatafa, ti na aumai loa kia Sesu a masaki fuli.

³⁶ Na lotou kolekole loa kiate ia ke fakataga ake fua kia latou ke fafa ki le tapatapa o lona kofu. Ti ko latou fuli ala na fafa ki ai na mauli loa.