Mateo 13 - Tosi Tapu

Folafola o le tagata muluki fakaili

¹ I le aso lena, na mavae loa Sesu i le fale, o tonatona i le mata tai.

² I le fakatasi ake a se kakai toka api ki ona tafa, na sopo loa a ia ki se vaka, ti na ekeeke loa a ia. Na tutuu loa le kakai katoa i le mata tai.

³ Na masau loa a ia kia latou ki ni nea mauke ai, i ni folafola fakatata, o pati :

⁴ Na ano se tagata muluki fakaili o muluki lana fakaili. I lana muluki, na maluku loa se potu o le fakaili i le tafatafa o le ala : Na au loa a manu lele o kai a ia.

⁵ Na maluku loa se tasi a potu i ni ganea fatufatua, ala na leaise maua e ia i ai se kele loloto : na somo vave loa a ia, talie na leaise maua e ia se kele loloto ;

⁶ kae i le sa ake o le laa, na masunu loa a ia, o malo talie na leai ni ona aka.

⁷ Na maluku loa se tasi a potu i ni vao talatala : Na sosomo ake a vao talatala, o taotao a ia o mate.

⁸ Na maluku loa se tasi a potu ki le kele malie : Na fua a ia, o taki kau lelau a iki, ti taki kau ono a iki, ti taki kau tolu a iki.

⁹ Ko leia e maua ni taliga mo fakalogo, ke logo a ia.

¹⁰ Na fakafeofi ake loa le kau tisipulo kiate ia, o pati : Kolea e ke masau ai kia latou i ni folafola fakatata ?

¹¹ Na tali loa Sesu kia latou : Talie kua tuku kia koutou ke kotou iloa a misitelio o le Puleaga o le atu lagi, kae na leaise tuku le nea lena kia latou.

¹² Talie e tuku loa ki leia e maua ia, ti e nofo loa a ia i le mou, kae ki leia e leaise maua ia e toe too loa meiate le nea leia e maua e ia.

¹³ Koia e kau masau ai kia latou i ni folafola fakatata, talie i lalatou tio mata e leaise lotou tio fua, ti e i lalatou fakalogo taliga e leaise lotou logo fua pe matala fua.

¹⁴ Ti kua fakasoko kia latou le folafola kikite a Esaia : E kotou logo loa ki okoutou taliga, kae e leaise kotou matala loa ; E kotou tio loa ki okoutou mata, kae e leaise kotou malama loa.

¹⁵ Talie kua liliu o mate noa le mafu o le kakai leinei ; Kua lotou fakatulituli olatou taliga, ti kua lotou tapono olatou mata, O tupu ke aua na lotou tio ki olatou mata, Ke aua na lotou logo ki olatou taliga, Ke aua na lotou matala i olatou loto, Ke aua na lotou tafoki, ti ke aua na kau fakamauli latou.

¹⁶ Kae manuia okoutou mata, talie e lotou tio, ti mo okoutou taliga, talie e lotou logo !

¹⁷ E kau pati maoki atu kia koutou, e toka api le kau polofeta mo le kau agatonu ala na oli ke tio ki le nea leia e kotou tio ki ai, kae na leaise lotou tio ki ai, ke logo ki le nea leia e kotou logo ki ai, kae na leaise lotou logo ki ai.

¹⁸ Ko koutou loa, kotou fakalogo mai ki le uiga o le folafola fakatata o le tagata muluki fakaili.

¹⁹ Ka logo se tagata ki le folafola o le Puleaga kae e leaise matala a ia ki ai, e au le pule veli o too le nea leia na muluki i lona loto : Ko le tagata lena leia na tali ia le fakaili i tafatafa o le ala.

²⁰ Ko leia na tali ia le fakaili i ganea fatufatua, ko leia e logo ki le folafola, ti e tali fakafiafia ia a ia.

²¹ Kae e leaise maua e ia ni aka iate ia totonu, ti e leaise kataki fualoa a ia, ti ka soko mai fai se fakafesagai pe ko se fakaveliveli o tupu ko le folafola, e maua e ia i ai se faigamalie ke siga.

²² Ko leia na tali ia le fakaili i vao talatala, ko leia e logo ki le folafola, kae ko tuania o le mauli ti mo olioli noa ki koloa fakamalama e tapono ia le folafola iate ia ke aua na fua iate ia.

²³ Ko leia na tali ia le fakaili i le kele malie, ko leia e logo ki le folafola ti e matala ki ai ; e fua a ia, ti e fua se fa fuai fakaili e tasi o kau lelau, ti ko se tasi o kau ono, ti ko se tasi o kau tolu.

Le sisania mo le fakaili malie

²⁴ Na toe tuku loa e Sesu kia latou se tasi folafola fakatata, o pati : E fakatatau le Puleaga o le atu lagi ki se tagata leia na muluki ia se fakaili malie i lana faigasaga.

²⁵ Kae i le lolotoga o le moe a le kakai, na au loa lona fili o muluki se sisania i lotolotoga o le fulumeto, ti ano loa a ia.

²⁶ I le somo ake loa o le fulumeto o fua, na toe sa ake loa i ai mo le sisania.

²⁷ Na au loa a tagata fakasausau a le pule o le fale, o pati kiate ia : Aliki, pe na leaise ke muluki se fakaili malie i lau faigasaga ? E au loa meifea le sisania ?

²⁸ Na tali loa le pule o le fale kia latou : Ko se fili lena na fai ia le nea lena. Ti na pati loa le kau tagata fakasausau kiate ia : Pe ke loto ke motou ano o taaki le sisania ?

²⁹ Na pati loa a ia : Leai, talie ke aua na kotou taaki le sisania o fakatasi mo le fulumeto.

³⁰ Kotou tuku ke la sosomo fakatasi o kaku ki le temi leia e la matutua ai, ti, i le temi tuuti o le fulumeto, e kau pati loa ki le kau tagata gaoi : Kotou taaki mua le sisania, o fui a ia ke tutu, kae kotou tanaki le fulumeto ki loku fata.

Le fuai sinapi

³¹ Na tuku loa e Sesu kia latou se tasi folafola fakatata, o pati : E fakatatau le Puleaga o le atu lagi ki se fa fuai sinapi leia e ave e se tagata, o to i lana faigasaga.

³² Ko le fa fakaili ikiiki oki a ia i fakaili fuli ; kae ka somo ake a ia, e lasi ake a ia i magiti fuli ti e liliu a ia ko se laakau, ti e au a manu lele o le lagi o fai ofaga i ona laa.

Le fakatupu

³³ Na toe fakasa loa e ia kia latou se tasi folafola fakatata : E fakatatau le Puleaga o le atu lagi ki se fakatupu leia na too e se fafine, o lusi fakatasi mo ni ipu falina e tolu, ti tuku loa e ia ke tupu.

³⁴ Na fakasa e Sesu a nea ana ki le kakai i ni folafola fakatata, ti na leaise toe masau a ia kia latou o sala folafola fakatata,

³⁵ o tupu ke fakasoko le nea leia na fakailo fakatomua e le polofeta : E kau fakamavaa loa loku gutu i ni folafola fakatata, E kau fakasa loa ni nea ala na munia talu mei le fakatupu o le malama nei.

Fakamatala o le misitelio

³⁶ Na kakau loa e ia le kakai, kae ulu loa a ia ki fale. Ti na fakafeofi ake loa ana tisipulo kiate ia, o pati : Fakamatala mai kia matou le folafola fakatata o le sisania i le faisaga.

³⁷ Na tali loa a ia kia latou : Ko leia e muluki ia le fakaili malie, ko le Vosa o le tagata ;

³⁸ ko le faigasaga ko le malama nei ; ko le fakaili malie ko vosa o le Puleaga ; ko le sisania ko vosa o le pule veli ;

³⁹ Ko le fili leia na muluki ia le sisania ko le Tiapolo ; ko le temi tuuti o le fulumeto ko le fakaoki o le malama nei ; ko le kau tagata gaoi ko le kau aselo.

⁴⁰ Ti e tatau mo le tanaki o le sisania o ti ki le afi, e toe fenaaki loa i le fakaoki o le malama nei.

⁴¹ E kakau loa e le Vosa o le tagata ana aselo, ke lotou taaki i lona Puleaga a nea fuli ala e fakatupu veli ti mo latou ala e fai ia a aga fakalialia :

⁴² ti e lotou laku loa latou ki le afi kaka, leia e logo ai loa ki ni tagi mo ni fetati o nifo.

⁴³ Kae e gigila malipolipo loa le kau agatonu ofaipe le laa i le Puleaga o lolatou Tamana. Ko leia e maua ia ni taliga mo fakalogo, ke logo a ia.

Le koloa fufu

⁴⁴ E toe fakatatau foki le Puleaga o le atu lagi ki se koloa leia na fufu i se faigasaga. Ko le tagata leia na maua ia a ia e toe fufu ia a ia ; ti e i lona fiafia, e ano loa a ia o fakatau ana nea fuli ala na maua e ia, ke totogi ai le faigasaga lena.

Le fuai kasoa totogi veli

⁴⁵ E toe fakatatau foki le Puleaga o le atu lagi ki se tagata faikoloa leia e afa ia ni fuai kasoa fulumalilie.

⁴⁶ Na maua e ia se fa fuai kasoa totogi veli ai ; ti na ano a ia o fakatau ana nea fuli, ke totogi ai le fa fuai kasoa lena.

Le kupega

⁴⁷ E toe fakatatau foki le Puleaga o le atu lagi ki se kupega leia na ti ki le tai o tae mai ni ika i faasiga kesekese.

⁴⁸ I le apele o le kupega, e toso ake a ia e tagata tautai ki le one, ti e lotou tonatona loa ki lalo o fafao a ika malilie ki ni polapola, kae e lotou tiaki loa a ika veveli.

⁴⁹ E toe fenaaki loa i le fakaoki o le malama nei. E au loa le kau aselo o vaei kese le kau agaveli mei le kau agatonu,

⁵⁰ ti e lotou laku loa le kau agaveli ki le afi kaka, leia e logo ai loa ki ni tagi mo ni fetati o nifo.

⁵¹ Pe kua kotou matala ki nea fuli ana ? Na lotou tali loa : E io.

Le pule kaiga

⁵² Ti na pati loa a ia kia latou : Koia ko sekelipa fuli kua ako o uiga mo le Puleaga o le atu lagi, e tatau mo se pule kaiga leia e too ia mei lona koloa ni nea foou mo ni nea afea.

Sesu i Nasaleti

⁵³ I le oki o folafola fakatata ana, na mavae loa Sesu mei lena.

⁵⁴ Na ano loa a ia ki lona fenua, ti na akonaki loa a ia i le sinakoka, ti ko latou ala na fakalogo kiate ia na ofolele ai, o pati : Pe maua e ia meifea le poto lena ti mo milakulo ana ?

⁵⁵ Pe se ko le vosa a ia o le tagata fai papa ? Pe leaise ko Malia leia ko lona tinana ? Pe leaise ko ona fetaina ala ko Sakopo, mo Sosefo, mo Simone ti mo Suta ?

⁵⁶ Pe leaise nonofo fuli ona tuagaane i lotolotoga o tatou ? Pe maua loa e ia meifea a nea fuli ana ?

⁵⁷ Ti na lotou tukia i le nea lena. Kae na pati loa Sesu kia latou : E vesiainai le polofeta i lona fenua totonu ti mo lona fale totonu.

⁵⁸ Ti na leaise fai loa e ia ni milakulo mauke i le ganea lena, o tupu ko lolatou tui gataa.