Mateo 11 - Tosi Tapu

Viki o Soane-Patita e Sesu

¹ I le oki o le tuku e Sesu o ana akonaki ki ana tisipulo e tino agafulu tupu lua, na mavae loa a ia i lena, o akonaki ti mo fakasa le folafola i kolo o le fenua.

² Ko Soane, i lana logo i lona fale pilisoni ki gaoi fakatalatupua a Kilisito, na kakau ia loa ana tisipulo ke ano, o vesili kia Sesu :

³ Pe ko koe leia e tonu ke au, pe tonu ke motou talitali ki se tasi ake ?

⁴ Na tali loa Sesu kia latou : kotou ano o fakasa kia Soane a nea ala kua kotou logo ki ai ti mo tio ki ai :

⁵ Kua tio a kivi, kua saele a vae kito, kua mauli a kilia, kua logo a tuli, kua tuu ake a mate, ti kua fakasa le logo malie ki le kau mativa.

⁶ Manuia leia e leaise siga loa o tupu ko au !

⁷ I lalatou ano, na masau loa Sesu ki le kakai, o kupu kia Soane : Kolea le nea leia na kotou ano o tioi i le toafa ? pe ko se fa u leia e viligia i le matagi ?

⁸ Kae kolea foki leia na kotou ano o tioi ? pe ko se tagata kua kofu ki ni kofu gigila ? Ko leinei, ko latou ala e kofu ki kofu gigila e nonofo i fale o sau.

⁹ Ka kolea na kotou ano o tioi ? Pe ko se polofeta ? Io, ti e kau fakailo atu kia koutou, e toe lasi ake a ia i le polofeta.

¹⁰ So ko ia leia e kupu ki ai le tosi : Ko leinei, e kau kakau laku tagata avelogo i ou mua, Ke teuteu lou ala i ou mua.

¹¹ E kau pati maoki atu kia koutou, ia latou ala kua tupu mei fafine, na leikiaise sa se tasi leia e lasi ake ia Soane-Patita. Kae, ko leia e ikiiki oki i le Puleaga o le atu lagi e lasi ake iate ia.

¹² Talu mei le temi o Soane-Patita o kaku mai ki le lakaga nei, e fakalogo le Puleaga o le atu lagi ki le makeke, ti e ulu ki ai le kau makeke.

¹³ Talie na masau le kau polofeta fuli mo le lao ki le puleaga o kaku mai kia Soane ;

¹⁴ ti kapau e kotou fia matala ki ai, ko ia ko le Elia leia na tonu ke au.

¹⁵ Ko leia e maua ni taliga ke fakalogo ke logo a ia.

¹⁶ E kau fakatatau loa kiate ai le tautupu leinei ? E tatau a ia mo ni toe ala e nonofo i ni malae fakafenua, ti e lotou kalaga ki olatou kaukau nea,

¹⁷ o pati : Na motou pupusi atu kia koutou le fakatagi, ti na leaise kotou mako ; na motou sua atu ni laumate, ti na leaise kotou tagilaulau.

¹⁸ Talie na au Soane, na leaise kai a ia ti na leaise inu a ia, ti na lotou pati : E nofo a ia mo se temonio.

¹⁹ Na au le Vosa o le tagata, o kai mo inu, ti na lotou pati : Ko se tagata kai fakavale a ia ti ko se tagata inu kava a ia, ko se kaukau nea a ia o le kau popelikano mo le kakai mauli veli. Kae na fakasa le poto o le Atua e ana gaoi.

Valoki o le kau loto noa

²⁰ Na fai e Sesu ni valoki fakamakeke ki kolo ala na soko ai le lasiga o ana milakulo, talie na leaise lotou fakasemala.

²¹ Malaia kiate koe, Kolasini ! Malaia kiate koe, Petesaita ! Talie, kanapau na fai a milakulo ala na fai i loto malie o koutou i Tile mo Sitone, kua fualoa ake lolatou fakasemala, o too le taga mo le mugalafu.

²² Koia, e kau pati atu ai kia koutou : I le aso o le fakamaau e tautea loa a Tile mo Sitone, o maamaa ake ia koutou.

²³ Ti ko koe, Kafanaume, pe ke malaga loa o kaku ki lagi ? E leai, e tuku loa a koe ki lalo, o kaku ki le nofoaga o le kau mate ; talie kanapau na fai i Sotoma a milakulo ala na fai i loto malie o ou, koi tuu nei a ia i le aso nei.

²⁴ Koia, e kau pati atu ai kia koutou : I le aso o le fakamaau, e tautea loa le fenua o Sotoma, o maamaa ake iate koe.

Fakatasi a le tisipulo mo lona Aliki

²⁵ I le temi lena, na masau loa Sesu, o pati : E kau fakafetai kiate koe, Tamana, Aliki o le lagi mo le kele, i lau fufu a nea anei ki le kau poto mo le kau atamai, kae na ke fakasa latou ki toe liliki.

²⁶ Io, Tamana, e kau fakafetai kiate koe talie ko lou loto ke fenaaki.

²⁷ Kua soli mai a nea fuli kiate au e loku Tamana, ti e leaise tasi e iloa ia le Alo, gato fai ki le Tamana ; e leaise tasi e iloa ia le Tamana, gato fai ki le Alo ti mo leia e fakasa ki ai e le Alo.

²⁸ Kotou au kiate au, koutou fuli ala e gagae mo mafaia, ti e kau soli atu loa kia koutou se malolo.

²⁹ Kotou amo laku laakau taki, ti kotou tali aku akonaki, talie e kau agamalu mo loto fakataulalo ; ti e kotou maua loa le malolo ki okoutou laumalie.

³⁰ Talie e malulu laku laakau taki, ti e maamaa laku kavega.