Mateo 10 - Tosi Tapu

Gaoi a le tino agafulu tupu lua

¹ Ti na kalagai loa e ia ana tisipulo e tino agafulu tupu lua, ti na tuku loa e ia kia latou le pule ke kapu ia a laumalie veli, ti mo fakamauli ia a masaki mo maimoa fuli.

² Ko nei igoa o le kau apositolo e tino agafulu tupu lua. Ko le uluaki, ko Simone, na igoa ko Petelo, ti mo Atelea, lona taina ; mo Sakopo, vosa o Sepeteo, ti mo Soane, lona taina ;

³ mo Filipo, ti mo Patolomeo ; mo Toma, ti mo Mateo, ko le popelikano ; mo Sakopo, vosa o Alefeo, ti mo Tateo ;

⁴ mo Simone, le Kananito, ti mo Sutasi le Isekaliote, leia na fakatau ia Sesu.

⁵ Ko lena loa le tino agafulu tupu lua leia na kakau e Sesu, i le oki o le tuku kia latou o fakailoilo anei : Aua na kotou ano ki le kakai pagani, ti aua na kotou ulu ki kolo o le kau Samalitana.

⁶ Kae kotou ano tafito ki ovi pulinoa o le fale o Iselaele.

⁷ Kotou ano, kotou fakasa, o kotou pati : Kua ofi le Puleaga o le atu lagi.

⁸ Kotou fakamauli le kau masaki, kotou fakatuuake le kau mate, kotou fakamea le kau kilia, kotou kapu a temonio. Na kotou tali sala totogi, ti kotou soli sala totogi.

⁹ Aua na kotou too se aulo, pe ko se paaga, pe ko ni piesi i okoutou kilipipi ;

¹⁰ pe ko se taga ki le folau, pe ko ni kofu e lua, pe ko ni taka, pe ko se tokotoko ; talie e tonu ke maua e le tagata gaoi lana nea kai.

¹¹ I kolo lalasi ti mo kolo liliki ala e kotou ulu ki ai, kotou vesili pe i ai se tagata leia e loto malie ke fakatalitali ia koutou, ti kotou nonofo i lona fale o kaku ki lakoutou toe mavae.

¹² I le ulu ki le loto fale, kotou pati : Ke nofo le tokamalie mo koutou !

¹³ ti kapau e tali a ia e le loto fale lena, ti ke ifo lokoutou tokamalie ki le loto fale lena ; kae kapau e leaise tali a ia e le loto fale lena, ti ke toe liliu mai lokoutou tokamalie kia koutou.

¹⁴ Kapau e leaise fakatalitali loa koutou ti e leaise fakalogo loa ki akoutou folafola, kotou mavae i le fale lena pe i le kolo lena, ti kotou tutuui le efu i okoutou vae.

¹⁵ E kau pati maoki atu kia koutou : I le aso o le fakamaau, e tautea loa le fenua o Sotoma mo Komola o maamaa ake i le kolo lena.

Fakaveliveli ka au

¹⁶ Ko leinei, e kau kakau koutou ofaipe ni ovi ki loto malie o ni lupo. Kotou poto ofaipe ni gata, ti kotou agamalie ofaipe ni lupe tea.

¹⁷ Kotou tokaga ki tagata ; talie e lotou ave loa koutou ki telepinale, ti e lotou sasa loa koutou ki ni laakau i olatou sinakoka ;

¹⁸ e taki loa koutou, o tupu ko au, ki mua o ni kovana, ti mo ni sau, ke kotou liliu ko ni fakamaoki kia latou ti mo le kau pagani.

¹⁹ Kae ka fakatau loa koutou, aua na kotou tuania ia pe feaki loa lakoutou masau, ti kolea loa lakoutou masau : E tuku atu loa kia koutou le nea leia e tonu ke kotou fakasa i lona ola totonu ;

²⁰ talie e leaise ko koutou ala e masau loa, kae ko le Laumalie Maokioki o lokoutou Tamana leia e masau loa ia koutou.

²¹ E fakatau loa e le taina lona taina ki le mate, ti ko le tamana lana fanau ; e malaga loa a fanau ki olatou matua, o tamate latou.

²² E vesiainai loa koutou e le kakai fuli, o tupu ko loku suafa ; kae ko leia e kataki fualoa loa o kaku ki le fakaoki e saofaki loa.

²³ Ka fakavelivelii loa koutou i se kolo, kotou sosola ki se tasi ake a kolo. E kau pati maoki atu kia koutou, e leikiaise oki lakotou folii a kolo o Iselaele, kae kua au le Vosa o le tagata.

²⁴ E leaise lasi ake le tisipulo i le pule, pe ko le tagata fakasausau i lona aliki.

²⁵ E feauga fai ki le tisipulo ke tatau mo lona pule, ti mo le tagata fakasausau ke tatau mo lona aliki. Kapau na lotou pati ki le pule o le fale ko Pelesepu a ia, ti e lotou toe pati fenaaki loa ki kakai o lona fale !

²⁶ Aua na kotou i kia latou, talie e leaise nea fua leia e munia e leaise tonu ke sa, ti e leaise nea fua leia e lilo e leaise tonu ke iloa.

²⁷ Ko le nea leia e kau fakasa atu kia koutou i le fakapouli, kotou fakasa a ia i le lauatea ; ti ko le nea leia e fakamusumusui atu ki okoutou taliga, kotou fakasa a ia i le taufufu.

²⁸ Aua na kotou i kia latou ala e tamate ia le tino kae e leaise mafai ke lotou tamate ia le laumalie ; kotou i tafito ki leia e tamate ia le laumalie ti mo le tino i Ifeli.

²⁹ Pe leaise fakatau koia ni ga miti e lua ki se fa piesi e tasi ? Kae e leaise vilo fua se ga miti e tasi ki le kele, sala mo le finegalo o lokoutou Tamana.

³⁰ Ti kua lau fuli okoutou fului ulu.

³¹ Aua na kotou i fua : E mauiga lasi ake koutou i ni miti mauke ai.

³² Koia, ko leia e fakasa ia au i mua o le kaugamalie, e kau fakasa loa a ia i mua o loku Tamana leia e nofo i le lagi.

³³ Kae ko leia e fakafiti loa kiate au i mua o tagata, e kau toe fakafiti loa kiate ia i mua o loku Tamana leia e nofo i le lagi.

³⁴ Aua na kotou pati na kau au o aumai le tokamalie ki le malama nei ; na leaise kau au o aumai le tokamalie, kae na kau au o aumai le seleta.

³⁵ Talie na kau au o fakamavetevete le tagata mo lona tamana, le taine mo lona tinana, le fugao fafine mo lona tinana ;

³⁶ ti e maua loa e le tagata ona fili i le kakai o lona fale.

³⁷ Ko leia e alofa ki lona tamana pe ki lona tinana o lasi ake iate au, e leaise gali a ia mo au, ti ko leia e alofa ki lona vosa pe ki lona taine o lasi ake iate au, e leaise gali a ia mo au ;

³⁸ ko leia e leaise too ia lona koluse, ti e leaise muli mai iate au, e leaise gali a ia mo au.

³⁹ Ko leia e taupau ia loa lona mauli e fakapuli noa ia loa a ia, ti ko leia e fakapuli noa ia loa lona mauli o tupu ko au e toe maua ia loa a ia.

⁴⁰ Ko leia e tali ia koutou e tali ia au, ti ko leia e tali ia au, e tali ia loa leia na kakau ia mai au.

⁴¹ Ko leia e tali ia se polofeta i lona uiga polofeta e tali ia loa se fakapale o le polofeta, ti ko leia e tali ia se tagata faitotonu i lona uiga faitotonu e tali ia loa se fakapale o le tagata faitotonu.

⁴² Ti ko leia e soli ia loa se ipu vai momoko e tasi ki se tasi i toe liliki anei talie ko laku tisipulo a ia, e kau pati maoki atu kia koutou, e leaise puli loa lona fakapale.