Maleko 9 - Tosi Tapu

¹ Na toe pati loa Sesu kia latou : E kau pati maoki atu kia koutou, ko ni iki ia latou ala e nonofo i leinei, e leaise mamate loa kae e leikiaise lotou tio ki le puleaga o le Atua e au i lona mafimafi.

Fetogi o Sesu i le mauga

² Na sili loa ki ai ni aso e ono, na too loa e Sesu a Petelo, mo Sakopo, mo Soane, ti na taki loa e ia latou tefua ki se mauga taualuga. Na fetogi loa a ia i olatou mua ;

³ Na liliu loa ona kofu o gigila mo tetea, i se tea leia e leaise mafai ke fakatupu e se tasi i le malama nei.

⁴ Ti na sa loa kia latou a Elia mo Moisese, ti na la masau mo Sesu.

⁵ Na masau loa Petelo, o pati kia Sesu : Pule, e malie ke tou nonofo i leinei ; e motou fakatuu loa ni falela e tolu, ko se tasi mo ou, ko se tasi mo Moisese, ti ko se tasi mo Elia.

⁶ Na leaise iloa e ia se masau ke fai, talie na lotou i lasi ai.

⁷ Na au loa se ao o uufi latou, ti na sa loa se leo mei le ao : Ko ia leinei ko loku Alo alofaina : Kotou fakalogo kiate ia !

⁸ Ti fokifa, kua fetioaki le kau tisipulo, ti na leaise lotou toe tio ki se tasi, ko Sesu fai toka tasi.

⁹ I lalatou ifo mei le mauga, na fakatotonu loa e Sesu kia latou ke aua na fakamatala ki se tasi le nea leia na lotou tio ki ai, o kaku ki le toe tuuake o le Vosa o le tagata mei le kau mate.

¹⁰ Na lotou taofi loa le masau lena, o fevesiliaki ia latou pe kolea le uiga o le toe tuuake mei le kau mate.

¹¹ Na vesili loa le kau tisipulo kiate ia : Kolea e pati ai le kau sekelipa e tonu ke uluaki au mua Elia ?

¹² Na tali loa Sesu kia latou : E maoki e tonu ke uluaki au mua Elia, o toe fakatonutonu a nea fuli. Ti kolea e tosi ai ki le Vosa o le tagata, e tonu ke mamae lasi a ia ti ke nukinukii a ia ?

¹³ Kae e kau pati atu kia koutou kua au Elia, ti na lotou fai kiate ia le nea leia na lotou loto ki ai, o mulimuli ki le nea kua tosi kiate ia.

Noa o kau tisipulo ; mafimafi o Sesu-Kilisito

¹⁴ I lalatou kaku ki le kau tisipulo, na lotou tio loa ki se kakai lasi kua takatakai ia latou, ti na masau ni sekelipa mo latou.

¹⁵ I le tio a le kakai kia Sesu, na ofolele a ia, ti na makape mai loa a ia o fakafelavei kiate ia.

¹⁶ Na vesili loa Sesu kia latou : Kolea le nea e kotou masau ki ai mo latou ?

¹⁷ Ti na tali loa se tagata mei le kakai kiate ia : Pule, na kau aumai kiate koe loku vosa, leia e nofo ai se laumalie gutu mate.

¹⁸ I ganea fuli e too ai a ia e le laumalie veli, e ti e ia a ia ki le kele, ti e piau a gutu o le fanau, ti e fetati mo ona nifo, ti e liliu a ia o fefeka katoa. Na kau kole ki au tisipulo ke lotou kapu le laumalie veli, kae na leaise lotou mafai.

¹⁹ Na pati loa Sesu kia latou : Lanu tui gataa, e kaku loa kiafea laku nofo mo koutou ? E kaku loa kiafea laku katakii koutou ? Aumai le toe kiate au. Ti na aumai loa le toe kiate ia.

²⁰ I le lakaga fai leia na tio ai le toe kia Sesu, na lu fakaveliveli loa a ia e le laumalie veli ; ti na teka loa a ia, o takafiti i le kele, ti na piau loa lona gutu.

²¹ Na vesili loa Sesu ki le tamana : Pe kua fualoa le soko o le nea leinei kiate ia ? Ti na tali loa le tamana : Talu mei lona ikiiki.

²² Ti kua tua lasi lona tau ti e le laumalie veli ki le afi mo le vai ke tamate a ia. Kae kapau e ke mafai se nea kiate ia, au o saofaki maua, alofa mai kia maua.

²³ Na pati loa Sesu kiate ia : Kapau e ke mafai !… E feala a nea fuli ki leia e tui.

²⁴ I le lakaga fai lena na tagi loimata loa le tamana o le toe, o pati : E kau tui ! Au o saofaki au i loku tui gataa !

²⁵ I le tio a Sesu ki le fekapu mai a le kakai, na valoki loa e ia le laumalie veli, o pati kiate ia : Laumalie gutu mate mo tulituli, e kau fakatotonu atu kiate koe, mavae i le toe lena, ti aua na ke toe ulu kiate ia.

²⁶ Ti na mavae loa le laumalie veli, o taukalaga, ti mo lu fakaveliveli ia le toe. Na liliu loa le toe ofaipe se tasi kua mate, o pati ai le toka api kua mate a ia.

²⁷ Kae na too loa e Sesu le lima o le toe, o fakatuu a ia ki aluga. Ti na tuu ake loa le toe ki aluga.

²⁸ I le ulu a Sesu ki le fale, na vesili loa ana tisipulo kiate ia : Kolea na leaise mafai ai ke motou kapu le laumalie lena ?

²⁹ Na pati loa Sesu kia latou : Koi mafai ke mavae le tau temonio lena i le faikole.

³⁰ Na lotou mavae loa i ai, ti na lotou fakalaka loa i Kalilea. Na leaise loto Sesu ke iloa a ia.

Fakasa o lona mate mo lona toe tuuake

³¹ Talie na akonaki a ia ki ana tisipulo, o pati kia latou : E tuku loa le Vosa o le tagata ki lima o tagata ; ti e lotou tamate loa a ia. Ti ka oki loa ni aso e tolu ki lona mate, e toe tuuake loa a ia.

³² Kae na leaise matala le kau tisipulo ki le masau lena, ti na lotou i i le vesili kiate ia.

Le fakataulalo, ko le lasi maoki a ia

³³ Na lotou kaku loa ki Kafanaume. I lana nofo i le fale, na vesili loa Sesu kia latou : Kolea le nea leia na kotou masau ki ai i le ala ?

³⁴ Kae na lotou fakalologo, talie i le ala na lotou masau ke iloa pe ko ai leia e lasi ake ia latou.

³⁵ Ti na tonatona loa Sesu, ti na kalagai e ia le tino agafulu tupu lua, o pati kia latou : Kapau e loto se tasi ke uluaki, ke liliu a ia ko le muli oki ia koutou fuli, ti ko le fakasausau a koutou fuli.

³⁶ Ti na too loa e ia se ga toe ikiiki, o fakatuu a ia i loto malie o latou : ti na luluku loa e ia a ia i ona lima, o pati kia latou :

³⁷ Ko leia e tali ia i loku suafa se tasi o toe liliki anei, e tali e ia a au totonu ; ti ko leia e tali ia a au, e leaise ko au fua leia e tali e ia, kae ko leia foki na kakau ia mai au.

Valoki o le fia nealasi fakalotu

³⁸ Na pati loa Soane kiate ia : Pule, na motou tio ki se tagata leia e kapu ia ni temonio i lou suafa ; ti na motou taofi a ia, talie e leaise muli mai a ia ia tatou.

³⁹ Na tali loa Sesu : Aua na kotou taofi a ia ; talie e leaise tasi leia e fai ia se milakulo i loku suafa e mafai ke masau veli kiate au.

⁴⁰ Ko leia e leaise agatuu mai kia tatou e kau mo tatou.

⁴¹ Ti ko leia e soli ia loa kia koutou i loku suafa se ipu vai ke inu, talie e kotou kau kia Kilisito, e kau pati maoki atu kia koutou, e leaise toe puli loa lona fakapale.

Valoki o nea fakatupu siga

⁴² Kae kapau e fakasalai e se tasi se tasi i ga toe liliki ala e tui kiate au, e malie ake loa kiate ia ke nonoa ki lona ua se fatufuaga lasi, ti ke ti a ia ki le tai.

⁴³ Kapau e fakasalai a koe e lou lima, tuuti a ia ; e malie ake lau ulu lima mutu ki le mauli, i lau maua ni lima e lua kae ti loa a koe ki Ifeli, ki le afi leia e leaise toe mate ;

⁴⁴ I le ganea lena e leaise toe mate ai loa le ilo ti e leaise toe tamate ai loa le afi.

⁴⁵ Kapau e fakasalai a koe e lou vae, tuuti a ia ; e malie ake lau ulu kito ki le mauli, i lau maua ni vae e lua kae ti loa a koe ki Ifeli ki le afi leia e leaise toe mate.

⁴⁶ I le ganea lena e leaise toe mate ai loa le ilo ti e leaise toe tamate ai loa le afi.

⁴⁷ Ti kapau e fakasalai a koe e lou fa mata, kapei a ia ; e malie ake lau ulu fa mata tasi ki le puleaga o le Atua, i lau maua ni fa mata e lua kae ti loa a koe ki Ifeli.

⁴⁸ I le ganea lena e leaise toe mate ai loa le ilo ti e leaise toe tamate ai loa le afi.

⁴⁹ Talie e fakakonakona loa a tagata fuli e le afi.

⁵⁰ Ko se nea malie le patai ; kae kapau e puli loa lona konakona, e kotou fakakonakona feaki loa a ia ?

⁵¹ Ke kotou maua se patai ia koutou totonu, ti ke kotou nonofo i le tokamalie.