Maleko 8 - Tosi Tapu

Le liuga o pane ki tagata e tino fa afe

¹ I aso ana, na toe fakatasi se kakai toka api, ti na leaise maua se nea ke kai, ti na kalagai loa e Sesu ana tisipulo, o pati kia latou :

² E kau aloalofa ai ki le kakai leinei ; talie kua aso tolu lana nofo i oku tafa, ti e leaise nea fua ke kai.

³ Kapau e kau kakau latou ke ano pakupaku ki olatou kaiga, e lotou mata fakapouli loa i le ala ; talie na au ni iki mei mamao.

⁴ Na tali loa ana tisipulo kiate ia : Pe feaki loa lolatou fagai ki ni pane ke makokona i se ganea lavaki feneeki ?

⁵ Na vesili loa Sesu kia latou : Ko akoutou fa pane e fia ? Na lotou tali loa : E fitu.

⁶ Na fakaafe loa e ia le kakai ke nofo ki lalo, ti na too loa e ia a fa pane e fitu, ti na fakafetai loa a ia, ti na tofitofi loa e ia latou, o soli ki ana tisipulo ke lotou tufa ; ti na lotou tufa loa latou ki le kakai.

⁷ Na lotou maua foki ni ga ika liliki, ti na fakafetai loa Sesu, ti na pati loa a ia ke tufa a ika kia latou.

⁸ Na lotou kai loa ti na lotou makokona loa, ti na ave loa ni polapola e fitu kua apele i toei kaiga.

⁹ Na lotou tino fa afe. Ti na kakau loa latou e Sesu ke ano.

¹⁰ Ti na sopo loa Sesu ki le vaka mo ana tisipulo, o ano ki le fenua o Talamanuta.

Kole o se milakulo e le kau faliseo

¹¹ Na kaku ake loa le kau faliseo o kamata fakavesilii Sesu, ti mo kole kiate ia se fakamailoga mei le lagi, ke asiasii ai a ia.

¹² Na tuku manava lasi loa Sesu i lona laumalie, o pati : Kolea e kole ai e le tautupu nei se fakamailoga ? E kau pati maoki atu kia koutou, e leaise toe soli loa se fakamailoga ki le tautupu nei.

¹³ Ti na mavae loa a ia ia latou, o toe sopo ki le vaka, o fakalaka ki leia ake fetuu o le vai.

¹⁴ Na galo loa i le kau tisipulo ke lotou too ni pane ; ko le fa pane fai e tasi na nofo mo latou i le vaka.

¹⁵ Na fai loa e Sesu kia latou le fakatotonu leinei : Kotou tokaga ki le fakatupu a le kau faliseo ti mo le fakatupu a Elote.

¹⁶ Na femasauaki loa le kau tisipulo, o pati : E tupu na leaise tou too ni pane.

¹⁷ Na iloa loa e Sesu alatou manatu, ti na pati loa a ia kia latou : Kolea e kotou masau ai ki pane ? pe koi kotou sala atamai aifai ? Pe leaise kotou matala aifai ?

¹⁸ Pe kua fefeka okoutou loto ? E kotou maua ni mata, kae e leaise kotou tio. E kotou maua ni taliga, kae e leaise kotou logo ? Pe leaise koi kotou manatui ?

¹⁹ I laku tofitofi a fa pane e lima ki tagata e tino afe e lima, pe ko kete e fia na apele i toei kaiga ala na kotou ave ? Na lotou tali loa kiate ia, e kau agafulu tupu lua.

²⁰ I laku tofitofi a fa pane e fitu ki tagata e tino afe e fa, pe ko kete e fia na apele i toei kaiga ala na kotou ave ? Na lotou tali loa, e fitu.

²¹ Ti na pati loa Sesu kia latou : Pe se kotou matala aifai ?

Fakamauli o se tagata kivi

²² Na lotou ano loa ki Petesaita ; ti na aumai loa kia Sesu se kivi, ti na kole loa kia Sesu ke fafa kiate ia.

²³ Na too loa e Sesu le kivi i lona lima, o taki a ia ki le tua kolo ; ti na takai loa e ia a mata o le kivi ki lona savale, ti na teki loa e ia ona lima kiate ia, ti na vesili loa a ia ki le kivi. Pe ke tio ki se nea ?

²⁴ Na vavakai loa a ia, o pati : E kau tio ki ni tagata, kae e kau tio kia latou ofaipe ni laakau, ti e lotou saele.

²⁵ Na toe teki loa e Sesu ona lima ki ona mata ; ti na tio fakamaumau loa le kivi, ti na mauli loa a ia, o tio malie ki nea fuli.

²⁶ Ti na kakau loa e Sesu le tagata ki lona fale, o pati : Aua na ke ulu ki le kolo.

Fakasa e Petelo ko Sesu ko le Kilisito

²⁷ Na ano loa Sesu mo ana tisipulo ki kolo liliki o Sesalea o Filipo, ti na vesili loa a ia kia latou i le ala : E pati le kakai koai au ?

²⁸ Na lotou tali loa : Ko Soane-Patita ; ko iki, ko Elia ; ti ko iki, ko se tasi o le kau polofeta.

²⁹ Ti na vesili loa Sesu kia latou : Ti ko koutou, e kotou pati ko ai au ? Na tali loa Petelo kiate ia : Ko koe, ko le Kilisito.

³⁰ Na fakatotonu loa e Sesu kia latou ke aua na lotou fakasa le nea lena ki se tasi.

Totogi o le muli ia Sesu

³¹ Na kamata fakasa loa e Sesu kia latou e tonu ke mamae lasi le Vosa o le tagata, ke tiaki a ia e le kau fakamatuatua o le kakai, mo le kau pule faisakilifisio, mo le kau sekelipa, ti ke tamate a ia, ti ke toe tuuake a ia i le sili o aso e tolu.

³² Na fakasa fakalauatea loa e ia kia latou a nea ana. Ti na too kese loa a ia e Petelo, o kamata valoki a ia.

³³ Kae na mafuli loa Sesu ki muli, o tio ki ana tisipulo, ti na valoki e ia Petelo, o pati : Ano ki muli, Satana ! Talie ko au manatu e leaise ko manatu a le Atua, kae ko manatu a tagata.

³⁴ Ti na kalagai loa e Sesu le kakai mo ana tisipulo, o pati kia latou : Ko leia e loto ke muli mai iate au, ke fakafiti a ia kiate ia totonu, ke amo e ia lona koluse, ti ke muli mai a ia iate au.

³⁵ Talie ko leia e loto loa ke saofaki e ia lona mauli e maumaui loa e ia a ia, kae ko leia e maumaui ia loa lona mauli o tupu ko au ti mo le logo malie e saofaki loa e ia a ia.

³⁶ Ti kolea lona aoga ki se tagata lana maua le malama nei katoa, kae pulinoa lona laumalie ?

³⁷ Kolea le nea e soli loa e se tagata ke fetogi ai lona laumalie ?

³⁸ Talie ko leia e luma loa kiate au mo aku folafola i loto malie o le tautupu fai feauaki mo agasala leinei, e luma loa le Vosa o le tagata kiate ia, mo ka au loa a ia i le kololia o lona Tamana, mo le kau aselo maokioki.