Maleko 7 - Tosi Tapu

Le kau faliseo mo le talatisio

¹ Ti na fakatasi loa kiate ia le kau faliseo, ti mo ni iki o le kau Sekelipa, na au mei Selusalemi.

² Na lotou tio loa ki ni iki o ana tisipulo e kai mo ni lima kelekele, ko lona uiga, na leaise fanofano.

³ Talie e leaise kai le kau faliseo mo le kau Sutea fuli kae e leikiaise fanofano fakamalielie mua olatou lima, o mulimuli ki le talatisio a le kau matua mago ;

⁴ ti ka lotou toe liliu mei le lapalasi fakafenua, koi lotou kai mo ka kua lotou fakamea. E lotou maua foki ni iki ake maua fakatalatisio, ofaipe le fufulu o ipu, mo fagu asu vai, ti mo ipu ukamea.

⁵ Ti na vesili loa le kau faliseo mo le kau sekelipa kia Sesu : Kolea e leaise mulimuli ai au tisipulo ki le talatisio a le kau matua mago, kae lotou kai mo ni lima kelekele ?

⁶ Na tali loa Sesu kia latou : Kau malualoi, na tonu ai le folafola a le polofeta ko Esaia kia koutou, leia e tuu i le tosi : E fakavikiviki le kakai leinei kiate au i laugutu, Kae e mamao lona loto iate au.

⁷ E leaise uiga o lakotou su kiate au, Otuku ni pelesepeto ala ko ni fakatotonu a tagata.

⁸ Kua kotou tiaki a fakatotonu a le Atua, kae kotou tausi le talatisio a tagata.

⁹ Na toe pati foki a ia kia latou : E kotou poto i le tiaki o fakatotonu a le Atua, o tupu ke tausi lakotou talatisio.

¹⁰ Talie na pati Moisese : Fakaapaapa ki lou tamana mo lou tinana ; ti : Ko leia e lauveli loa ki lona tamana pe ki lona tinana e fakatuaa loa a ia ki le mate.

¹¹ Kae ko koutou, e kotou pati : Kapau e pati se tagata ki lona tamana pe ki lona tinana : Ko le nea leia e tonu ke kau soli kiate koe, kua Kopano a ia, kua tuku a ia ko se moliga ki le Atua,

¹² e leaise koi kotou tuku ke fai e ia se nea ki lona tamana pe ki lona tinana ;

¹³ o kotou fakanoai i ai le folafola a le Atua o tupu ko lakoutou talatisio leia na kotou fakatupu. Ti e kotou fai mo ni iki ake a nea mauke e tatau mo nea ana.

Le loto o le tagata

¹⁴ Na toe kalagai loa e ia le kakai kiate ia, o pati : Kotou fakalogo fuli mai kiate au, ti kotou matala.

¹⁵ E leaise nea fua i tafa o le tagata, e ulu ki le tagata, e mafai ke fakakelekele ia a ia ; kae ko le nea leia e ulu mei le tagata, ko ia leia e fakakelekele ia a ia.

¹⁶ Ko leia e maua ia ni taliga mo fakalogo, ke logo a ia.

¹⁷ I lana ulu ki fale, o mamao mei le kakai, na vesili loa ana tisipulo kiate ia ki le folafola fakatata lena.

¹⁸ Na pati loa a ia kia latou : Mo koutou foki, pe kotou sala atamai ? Pe leaise kotou matala e leaise nea fua i tafa e ulu ki loto o le tagata, e mafai ke fakakelekele ia a ia ?

¹⁹ Talie e leaise ulu le nea lena ki lona loto, kae ki lona manava, leia e fakamea ai a nea kai fuli, kae ano ki tafa le nea leia e leaise aoga.

²⁰ Na toe pati loa a ia : Ko le nea leia e ulu mei le tagata, ko ia leia e fakakelekele ia le tagata.

²¹ Talie mei loto, mei le loto o tagata, e au mei ai a manatu veveli, mo tono, mo feauaki, mo tukipo,

²² mo kaia, mo fulupipiki, mo agaveli, mo kaka, mo maveuveu, mo manumanu, mo fatituu, mo fia nealasi, mo valea.

²³ E au a nea veveli fuli ana mei loto, ti e lotou fakakelekele ia le tagata.

Le fafine Kanaane

²⁴ I le mavae i lena, na ano loa Sesu ki le fenua o Tile mo Sitone. Ti na ulu loa a ia ki se fale, ti na loto a ia ke aua na iloa e se tasi ; kae na leaise mafai ke nofo fakapulipuli a ia.

²⁵ Talie ko se fafine, leia na ulu tino i lona taine se laumalie veli, na logo loa ki le masau kiate ia, ti na au loa a ia o punou i vae o Sesu.

²⁶ Na Keleka le fafine lena, mo afekasi Silia mo Fenisia i ona tupuaga. Na kole loa e le fafine kia Sesu ke kapu le temonio i lona taine. Kae na pati loa Sesu kiate ia :

²⁷ Tuku mua ke kai fanau ke makokona ; talie e leaise malie ke too le pane a fanau, o laku ki uviki kuli.

²⁸ Ti na tali loa le fafine kiate ia : Io, Aliki, kae e kai e uviki kuli a momo a fanau, i lalo o le laupapa.

²⁹ Ti na pati loa a ia ki le fafine : O tupu ko le masau lena, ano, kua mavae le temonio i lou taine.

³⁰ Na toe liliu loa le fafine ki lona fale, ti na maua atu loa e ia lona taine e moemoe i le palepale, kua mavae le temonio iate ia.

Fakamauli o se tagata tuli ti gutu mate

³¹ Na mavae loa Sesu i le fenua o Tile, o toe au i Sitone, i le tai o Kalilea, o fakalaka mai i le fenua o Tekapole.

³² Na aumai loa kiate ia se tuli, na faigataa lana masau, ti na kole loa kiate ia ke teki ona lima kiate ia.

³³ Na too kese loa e ia a ia mei le kakai, ti na velo loa e ia ona maikao ki taliga, ti na fakalave loa e ia lona savale totonu ki le alelo o le tagata ;

³⁴ ti na tagaki loa ona mata ki lagi, ti na tukumanava loa a ia, o pati : Efata, ko lona uiga, ke ke mavaa !…

³⁵ I le lakaga fai lena, na mavaa loa ona taliga, ti na matala loa mo lona alelo, ti na masau malie loa a ia.

³⁶ Na fakatotonu loa e Sesu kia latou ke aua na masaui fua le nea lena ki se tasi ; kae na lasi lana fakatotonu kia latou, ti na toe asilisili lalatou fakamafola a ia.

³⁷ Na lotou ofolele lasi ai, o pati : E malilie a nea fuli e fai e ia ; e fakamavaa foki e ia a taliga o le kau tuli, ti e fakamasau e ia le kau gutu mate.