Maleko 6 - Tosi Tapu

Ano fakaoki ki Nasaleti

¹ Na mavae loa Sesu mei ai, o ano ki lona fenua. Na muli loa ana tisipulo iate ia.

² I le soko mai loa o le sapato, na akonaki loa a ia i le sinakoka. Ti na ofolele le kakai toka api leia na fakalogo kiate ia, o pati : E maua e ia meifea a nea fuli ana ? Ko le poto fea lena kua tuku kiate ia, ti ko le pule feaki lena e fai ai e ia a milakulo ana ?

³ Pe se ko le tagata fau fale a ia, le tama o Malia, le taina o Sakopo, mo Sosefo, mo Suta, ti mo Simone ? Ti ko ona tuagaane, pe leaise lotou nonofo i leinei mo tatou ? Ti na leaise lotou tui kiate ia.

⁴ Kae na pati loa Sesu kia latou : E nukinukii le polofeta i lona fenua totonu, mo lona fale, ti mo lona famili.

⁵ Na leaise mafai loa ke fai e ia i ai se milakulo e tasi, kae na teki fua e ia ona lima ki ni iki masaki, o fakamauli latou.

⁶ Ti na ofolele a ia ki lolatou tui gataa. Na folii e Sesu a kolo i le takatakai, o akonaki.

Gaoi a le tino agafulu tupu lua

⁷ Na kalagai loa e Sesu le tino agafulu tupu lua, ti na kamata kakau loa e ia latou taki toka lua, ti na soli loa e ia kia latou le pule ki laumalie veli.

⁸ Na fakatotonu loa e ia kia latou : ke aua na lotou too se nea ki le fanoga, kae gato fua ki se tokotoko ; ke aua na lotou too se pane, pe ko se taga, pe ko se paaga i olatou kilipipi ;

⁹ kae ke lotou tui ni taka, ti ke aua na lotou tui ni kofu e lua.

¹⁰ Ti na pati loa a ia kia latou : I se fale leia e kotou ulu loa ki ai, kotou nofo i ai o kaku ki lakoutou mavae i le ganea lena.

¹¹ Ti kapau e i ai i se ganea ni kakai ala e leaise tali ia koutou pe leaise fia logo kia koutou, kotou mavae i ai, ti kotou tutuui le efu i okoutou vae, o tupu ke liliu le nea lena ko se fakamaoki kia latou.

¹² Na lotou ano loa, ti na lotou akonaki loa ki le fakasemala.

¹³ Na lotou kapu ni temonio toka api, ti na lotou takai lolo ni masaki toka api ti mo fakamauli latou.

Tukipo o Soane-Patita

¹⁴ Na logo loa le sau ko Elote ki le masau kia Sesu, talie na logologona lona igoa, ti na pati loa a ia : Ko Soane-Patita lena kua toe tuuake mei le kau mate, ti ko le tupuaga lena o lana fai milakulo.

¹⁵ Na pati ni iki : Ko Elia. Ti na pati ni iki : Ko se polofeta ofaipe se tasi o le kau polofeta.

¹⁶ Kae na pati Elote i lana logo ki le nea lena : Ko le Soane leia na kau fakatotonu ke tuuti lona ulu, ko ia lena kua toe tuuake mei le kau mate.

¹⁷ Talie ko Elote totonu leia na fakatotonu ia ke too Soane, ti ke sai a ia, o tuku ki le fale pilisoni, o tupu ko Elotiasi, avaga o Filipo, lona taina, leia na toe avaga mo ia,

¹⁸ kae na pati Soane kiate ia : E leaise taga ke ke nofo mo le avaga o lou taina.

¹⁹ Koia na ita ai Elotiasi kia Soane, o loto ke tamate a ia.

²⁰ Kae na leaise mafai e ia o tupu ko Elote. Ti na i Elote kia Soane, talie na iloa e ia ko se tagata agamalie a ia mo maokioki ; ti na puipui e ia Soane. I lana logo kiate ia, na tua lasi le mamae o lona loto, kae na fia logo tuumau a ia kiate ia.

²¹ Kae na soko loa ki se aso faigamalie, ko le aso fakamanatu a ia o le tupu o Elote. Na fai loa e Elote se kaitasi ki lana kau lalasi, mo le kau pule solia ti mo le kau tagata mauiga o Kalilea.

²² Na ulu ake loa le taine o Elotiasi ki le kogafale ; ti na mako loa a ia, ti na malie loa a ia kia Elote mo lana kau fakaafe. Ti na pati loa le sau ki le taine : Kole mai kiate au le nea leia e ke loto ki ai, ti e kau soli atu loa a ia kiate koe.

²³ Na toe fakapapau foki a ia kiate ia, o pati : Ko le nea leia e ke kole mai loa kiate au, tatau foki pe ko le vaelua o loku puleaga, e kau soli atu loa a ia kiate koe.

²⁴ Na ulu loa le taine mei le kogafale, o pati ki lona tinana : Kolea loa le nea leia e tonu ke kau kole ? Ti na tali loa lona tinana : Ko le fa ulu o Soane-Patita.

²⁵ Na ulu fakatavili aifai le taine ki le sau, o fai kiate ia le kole leinei : E kau loto ke ke soli mai nei kiate au, i se pa, le fa ulu o Soane-Patita.

²⁶ Na mamae lasi loa le sau ; kae o tupu ko ana fakapapau ti mo le kau fakaafe, na leaise loto loa a ia ke fakafiti.

²⁷ Na kakau aifai e ia ki le fale pilisoni se tagata leo, mo le fakatotonu ke aumai le fa ulu o Soane-Patita.

²⁸ Na ano loa le tagata leo o tuuti le fa ulu o Soane i le fale pilisoni, o aumai i se pa. Na soli loa e ia a ia ki le taine, ti na soli loa a ia e le taine ki lona tinana.

²⁹ I le logo a tisipulo a Soane ki le nea lena, na lotou au loa o too le tino o Soane-Patita, o tuku ki se tanuma.

Liuga o pane ki tagata e tino lima afe

³⁰ Na fakatasi mai loa le kau apositolo kia Sesu, ti na lotou fakamatala loa kiate ia a nea fuli ala na lotou fai ti mo nea fuli ala na lotou akonaki ki ai.

³¹ Na pati loa Sesu kia latou : Kotou au ki se ganea lavaki, o malolo fakaikiiki. Talie na toka api latou na ano mo latou na au, ti na leaise lotou maua fua se ga temi ke kai ai.

³² Na lotou ano loa i se vaka ki se ganea lavaki.

³³ Ti na tio loa se kakai ki lalatou ano, ti na lotou iloa ia loa latou, ti na lotou fai makape mai loa i uta mei kolo fuli, o muamua ia latou ki le ganea leia na lotou ano ki ai.

³⁴ I lana ifo i le vaka, na tio loa Sesu ki se kakai lasi, ti na aloalofa loa a ia kia latou, talie kua lotou faipe ni ovi ala e leaise maua ia se tagata tausi ovi ; ti na kamata ako loa e ia kia latou ni nea mauke.

³⁵ Ti kua teitei oki le aso, na fakafeofi ake loa ana tisipulo kiate ia, o pati : E lavaki le ganea leinei, ti kua teitei oki le aso ;

³⁶ kakau le kakai ke ano ki nofoaga uta mo kolo liliki i le takatakai, o totogi se nea ke kai.

³⁷ Na tali loa Sesu kia latou : Kotou soli e koutou totonu kia latou se nea ke kai. Kae na lotou pati loa kiate ia : Pe motou ano loa o totogi mai ni pane ki ni fa tenalio e kau lelau lua, ti motou soli loa kia latou ke kai ?

³⁸ Ti na pati loa Sesu kia latou : Pe fia a fa pane ala e kotou maua ? Kotou ano o tioi. Na lotou afaafa totonu loa, ti na lotou tali loa : E lima, mo ika e lua.

³⁹ Ti na fakatotonu loa e Sesu kia latou ke fakanofo ki lalo le kakai katoa o fakamuimuiga i le mutie sesega,

⁴⁰ ti na lotou tonatona loa, i ni atu e taki tino lelau mo tino lima.

⁴¹ Na too loa e Sesu a fa pane e lima mo ga ika e lua, ti na tagaki loa ona mata ki le lagi, o fakafetai. Ti na tofitofi loa e ia a fa pane, o soli ki le kau tisipulo, ke lotou tufa ki le kakai. Na toe vae foki e ia a ga ika e lua kia latou fuli.

⁴² Na lotou kai fuli loa ti na lotou makokona loa,

⁴³ ti na ave loa ni polapola e kau agafulu tupu lua kua apele i potu pane mo toei ika.

⁴⁴ Ko latou ala na kai ia a pane ko tagata e tino lima afe.

Saele a Sesu i le tai

⁴⁵ I le oki fai o le nea lena, na fakamaua loa e Sesu ana tisipulo ke sopo ki le vaka, o muamua iate ia ki leia ake fetuu, ki Petesaita, kae kakau e ia totonu le kakai.

⁴⁶ I le oki o lana kakau le kakai, na ano loa a ia ki le mauga, o faikole.

⁴⁷ Ti kua soko le afiafi, ti kua kaku le vaka ki loto malie o le tai, ti na nofo toka tasi Sesu i uta.

⁴⁸ Na tio loa a ia kua lotou pakia ai i le foe ; talie na fakatau le matagi kia latou. I le vae ola tolu mafoata, na ano loa a ia kia latou, o saele i aluga o le tai, ti na fia fakalaka loa a ia ia latou.

⁴⁹ I lalatou tio ki le saele a Sesu i le tai, na lotou pati loa : Ko se tuuola, ti na lotou kalaga ;

⁵⁰ talie na lotou tio fuli kiate ia, ti na lotou i. I le lakaga fai lena na masau loa Sesu kia latou, o pati : Kotou fimalie, ko au, aua na kotou i !

⁵¹ Ti na ano loa a ia kia latou, o sopo ki le vaka, ti na malu loa le matagi. Na lotou ofolele fuli loa i olatou loto mo apele i le i.

⁵² Talie na leaise lotou matala ki le milakulo o pane, o tupu na fefeka ai olatou loto.

Fakamauli o kau masaki i Senesaleti

⁵³ I le oki o lalatou fakalaka i le tai, na lotou tau loa ki le fenua ko Senesaleti, ti na lotou pale loa i ai.

⁵⁴ I lalatou ifo i le vaka, na iloa aifai Sesu e le kakai,

⁵⁵ ti na lotou ano loa i le fenua katoa lena, ti na kamata aumai loa a masaki i ni palepale, ki ganea fuli ala na logo kua i ai Sesu.

⁵⁶ I ganea fuli na kaku a ia ki ai, i kolo liliki, mo kolo lalasi, ti mo nofoaga uta, na tuku a masaki i lapalasi fakafenua, ti na kole kia Sesu ke fakataga ake fua ke lotou lave ki le tapatapa o lona kofu. Ti na mauli loa latou fuli ala na lave kiate ia.