Maleko 5 - Tosi Tapu

Fakamauli o se tagata avagaia i Katala

¹ Na lotou kaku ki leia atu fetuu o le tai, ki le fenua o le kau Katala.

² I le lakaga fai leia na ifo ai loa Sesu i le vaka, na au loa se tagata ki ona mua, leia na ulu mei ni tanuma, talie na nofo iate ia se laumalie veli.

³ Na maua e le tagata lena lona nofoaga i tanuma, ti na leaise se mafai e se tasi ke sai ia a ia ki ni kaui tini.

⁴ Talie kua tua lasi le tau sai o ona vae ki ni ukamea ti mo ona lima ki ni kaui tini, kae na motumotusi e ia a kaui tini ti na fatifatii e ia a ukamea, ti na leaise mafai e se tasi lona fakalalata.

⁵ Na nofo tuumau a ia, i le pouli mo le ao, i tanuma ti mo mauga, o tagi, mo tafatafai lona kuaga ki ni fatu.

⁶ I lana tio kia Sesu mei mamao, na makape loa a ia, o tulolo i ona mua,

⁷ ti mo tagi leo lasi : Kolea au kiate koe, Sesu, Alo o le Atua taualuga ? E kau kole fakamakeke atu kiate koe i le suafa o le Atua, aua na ke fakamamae au.

⁸ Talie na pati Sesu kiate ia : Mavae i le tagata lena, laumalie veli !

⁹ Ti na vesili loa Sesu kiate ia : Ko ai lou igoa ? Na tali loa a ia kia Sesu : Ko loku igoa ko Lesio, talie e motou toka api.

¹⁰ Ti na kolekole loa a ia kia Sesu ke aua na kapu e ia latou i le fenua.

¹¹ Na i ai i le ganea lena, o ofi ki le mauga, se kau puaka lasi leia na fagai.

¹² Ti na kole loa e le kau temonio kiate ia, o pati : Kakau matou ki puaka ana, o tupu ke motou ulu kia latou.

¹³ Na fakataga loa e ia kia latou le nea lena. Ti na mavae loa a laumalie veli, o ulu ki puaka, ti na fekapu mai loa le kau puaka i le fetuu o le mauga, o maluluku ki le tai : (Na maua ni puaka e lua afe), ti na lotou malelemo fuli loa i le tai.

¹⁴ Ko latou ala na fagai ia a puaka na fesolaki loa, ti na lotou fakamafola loa le logo i le kolo ti mo kolo uta. Na ano loa le kakai o tio ki le nea kua soko.

¹⁵ Na lotou au loa kia Sesu, ti na lotou tio loa ki le tagata leia na nofo ai le lesio kua tonatona, kua teuteu, ti kua malama lona atamai ; ti na lotou i lasi loa.

¹⁶ Ko latou ala na tio ki le nea leia na soko na fakamatala ia loa a ia kia latou le nea leia na soko ki le tagata avagaia ti mo le kau puaka.

¹⁷ Ti na lotou kolekole loa kia Sesu ke mavae i lolatou fenua.

¹⁸ I lana sopo ki le vaka, na kole ake loa kiate ia e le tagata leia na avagaia ke fakataga ake kiate ia ke nofo mo ia.

¹⁹ Na leaise fakataga loa e Sesu kiate ia le nea lena, kae na pati loa a ia kiate ia : Ano ki lou fale, ki lou famili, ti ke fakamatala kia latou a nea fuli ala na fai e le Aliki kiate koe, pe na feaki lona manavaalofa kiate koe.

²⁰ Na ano loa a ia, o kamata fakasa i le Tekapole a nea fuli ala na fai e Sesu kiate ia. Ti na ofolele a kakai fuli.

Le taine o Sailusi ; mo le fafine pupuke

²¹ Na toe liliu loa Sesu i le vaka ki leia ake fetuu o le tai, ti na fakatasi loa se kakai lasi kiate ia. Na nofo a ia i le mata tai.

²² Ti na au loa se tasi o le kau pule o le sinakoka, ko Sailusi lona igoa : i lana tio kia Sesu, na fakapulou loa a ia ki ona vae,

²³ o fai kiate ia le kole makeke leinei : Kua vave mate fua loku taine ; au, o teki kiate ia ou lima, o tupu ke ke fakamauli a ia, ti e mauli loa a ia.

²⁴ Na ano loa Sesu mo ia. Ti na muli loa iate ia se kakai toka api, leia na teke ia a ia mei potu fuli.

²⁵ Ti na i ai se fafine leia na pupuke talu mei fetuu e kau agafulu tupu lua.

²⁶ Na mamae lasi ai le fafine lena i lima o ni toketa toka api, ti na puli lasi a ia i lolatou totogi, kae na leaise maua fua e ia se ga fimalie, ti na asilisili ake lona veli.

²⁷ I lana logo ki le masau kia Sesu, na au loa a ia i loto malie o le kakai mei muli, o lave ki lona kofu :

²⁸ Talie na pati a ia : Kapau e mafai fua ke kau lave ki lona kofu, ti e kau mauli loa.

²⁹ I le lakaga fai lena na gato loa lona pupuke, ti na logoi loa e ia i lona tino kua mauli a ia i lona masaki.

³⁰ Na iloa loa e Sesu iate ia i le lakaga fai lena na mavae se makeke meiate ia ; ti na mafuli loa a ia ki le kakai, o pati : Ko ai leia na lave mai ki loku kofu ?

³¹ Na pati loa ana tisipulo kiate ia : E ke tio ki le kakai leia e feteke ia a koe, ti e ke pati : Ko ai leia na lave mai kiate au ?

³² Ti na tio saele a ia ki ona tafatafa ke tio ki leia na fai ia le nea lena.

³³ Na i lasi ai le fafine ti na lulu loa a ia i lana iloa le nea leia kua soko kiate ia, ti na au loa a ia o punou i vae o Sesu, o fakasa kiate ia le maoki katoa.

³⁴ Kae na pati loa Sesu kiate ia : Ei loku taine, kua saofaki a koe e lau tui ; ano i le tokamalie, talie kua ke mauli i lou masaki.

³⁵ I lana lolotoga masau, na kaku ake loa ni kakai mei le fale o le pule o le sinakoka, o pati : Kua mate lou taine ; kolea e ke toe fakapakia ai ki le pule ?

³⁶ Kae na leaise tokaga Sesu ki masau ana, ti na pati a ia ki le pule o le sinakoka : Aua na ke i, kae ke ke tui fua.

³⁷ Ti na leaise fakataga loa e ia ki se tasi ke ano mo ia, gato fai kia Petelo, mo Sakopo, ti mo Soane, taina o Sakopo.

³⁸ Na lotou kaku loa ki le fale o le pule o le sinakoka, ti na tio loa Sesu ki se kakai logoa mo ni iki e tagilaulau.

³⁹ Na ulu loa Sesu o pati kia latou : Kolea e kotou logoa ai, ti kolea e kotou fetagisi ai ? E leaise mate le toe, kae e moe a ia.

⁴⁰ Ti na lotou gologolo loa kiate ia. Ti na fakamavae loa e Sesu ki fafo le kakai katoa, ti na too loa e ia mo ia le tamana mo le tinana o le toe, ti mo latou ala na kau fanoga mai mo ia, ti na ulu loa a ia ki le ganea leia na tuku ai le toe.

⁴¹ Na too loa e Sesu le lima o le toe, o pati kiate ia : Talitha koumi, ko lona uiga : E kau pati atu, taine, tuu ki aluga !

⁴² I le lakaga fai lena na tuu ake loa le taine ki aluga, o kamata saele ; talie na fetuu kau agafulu tupu lua a ia. Ti na lotou ofolele lasi loa.

⁴³ Na tuku loa e Sesu kia latou ni fakatotonu fakamakeke, ke aua na iloa e se tasi le nea ; ti na pati loa a ia ke soli se nea kai ki le taine.