Maleko 4 - Tosi Tapu

Le tagata muluki fakaili mo kele

¹ Na toe akonaki loa Sesu i le mata tai. Ti na fakatasi loa se kakai lasi kiate ia, ti na sopo loa a ia o tonatona i se vaka, i le tai. Na nofo le kakai katoa mei le kele i le mata tai.

² Na ako loa e ia kia latou ni nea mauke ai i ni folafola fakatata, ti na pati loa a ia kia latou i lana akonaki :

³ Kotou fakalogo mai. Na ano loa se tagata muluki fakaili o muluki lana fakaili.

⁴ I lana muluki le fakaili, na maluku loa se potu o le fakaili i le tafatafa o le ala : Na au loa a manu lele o kai a ia.

⁵ Na maluku loa se tasi a potu ki se ganea fatufatua, leia na leaise lasi ai se kele : Na somo aifai a ia, talie na leaise maua e ia se kele loloto ;

⁶ kae, i le sopo mai loa o le laa, na masunu loa a ia o malo, talie na leaise maua e ia ni aka.

⁷ Na maluku loa se tasi a potu ki le vao talatala : Na somo ake loa le vao talatala o taotao a ia, ti na leaise fua loa a ia.

⁸ Na maluku loa se tasi a potu ki le kele malie : Na fua loa a ia o lasi ai, o kau tolu, mo kau ono, mo kau lelau ki le fa fakaili e tasi.

⁹ Ti na pati loa a ia : Ko leia e maua ia ni taliga mo fakalogo, ke logo.

¹⁰ I lana to toka tasi mo latou, na vesili loa kiate ia latou ala na takatakai ia a ia ti mo le tino agafulu tupu lua ki le uiga o le folafola fakatata lena.

¹¹ Ti na pati loa a ia kia latou : Kua tuku atu kia koutou ke kotou iloa le misitelio o le puleaga o le Atua ; kae kia latou ala i tafa e fai a nea fuli anei i ni folafola fakatata,

¹² o tupu ke lotou tio mata, kae aua na lotou iloa ; ke lotou logo taliga, kae aua na lotou matala, talie ke aua na lotou tafoki, ti ke aua na fakamolemole alatou agasala.

¹³ Ti na toe pati loa a ia kia latou : Pe leaise kotou matala ki le folafola fakatata leinei ? Ti e feaki loa ke kotou matala ki la ake folafola fakatata fuli ?

¹⁴ Ko le tagata muluki fakaili e muluki ia le folafola.

¹⁵ Ko iki ko tafatafa latou o le ala, ala na muluki ki ai le folafola : i lalatou logo ki le folafola, e au Satana i le lakaga fai lena, o too le folafola leia na muluki ia latou.

¹⁶ Ti ko iki foki na tali ia le fakaili i ni ganea fatufatua : I lalatou logo ki le folafola, na lotou tali a ia mo le fiafia.

¹⁷ Kae e leai ni olotou aka ia latou totonu, talie e puli ia latou le kataki fualoa, ti ka soko mai fai se mamae pe ko se fakaveliveli o tupu ko le folafola, e lotou maua loa i ai se faigamalie ke lotou siga ai

¹⁸ Ko ni iki e tali ia le pulapula i le vao talatala ; ko latou ala e logo ki le folafola,

¹⁹ kae ko le tokaga ki nea o le sekulo, mo le kaka o koloa, ti mo le ulu o la ake manumanu fuli, e taotao ia le folafola ke aua na fua.

²⁰ Ko ni iki na tali ia le folafola i le kele malie ; ko latou ala e logo ki le folafola, ti e lotou tali a ia, ti e lotou fua, o kau tolu, mo kau ono, ti mo kau lelau ki le tasi.

Le malama i aluga o le tekiaga malama

²¹ Na toe pati loa a ia kia latou : Pe aumai le malama ke tuku i lalo o le fa kisi, pe i lalo o le palepale ? Pe se teki loa a ia ki aluga o le tekiaga malama ?

²² Talie e leaise nea e ufiufi, e leaise tonu ke fakasa, ti e leaise nea e fakapulipuli, e leaise se tonu ke iloa.

²³ Kapau e maua e se tasi ni taliga ke fakalogo, ke logo a ia.

²⁴ Na toe pati loa a ia kia latou : Kotou tokaga ki le nea leia e kotou logo ki ai. E fuafua loa koutou ki le fua leia na kotou fakaaoga, ti e toe fakalasi atu loa kia koutou.

²⁵ Talie e soli loa ki leia e maua ia ; kae ki leia e nofo noa e toe too loa mo le nea foki leia e maua e ia.

Fakatata o le mauli fakalaumalie

²⁶ Na toe pati loa a ia : E toe fakatatau foki le puleaga o le Atua ki se pulapula leia e muluki e se tagata ki le kele ;

²⁷ pe moe a ia pe alaala a ia, i le pouli mo le ao, e somo le pulapula ti mo tutupu, kae e leaise iloa e ia pe feaki.

²⁸ E fakatupu toka tasi e le kele lona fua, uluaki le muko, ti soko mo le taulu fulumeto, ti soko mo le fatui fulumeto kua katoa i le fui fulumeto ;

²⁹ Ti ka matua loa le fua, e tuku loa ki ai le sele tuuti, talie kua soko le temi tuuti o le fulumeto.

Folafola o le fa sinapi

³⁰ Na toe pati loa a ia : E tou fakatatau loa kilea le puleaga o le Atua ? Kofea loa le folafola fakatata leia e tonu ke tou fakamatala ai a ia ?

³¹ E tatau a ia mo se fa sinapi ; ka to a ia ki le kele, e ikiiki oki a ia i fuai fakaili fuli o le kele ;

³² kae, i le oki o lona to, e somo a ia, ti e liliu a ia o lasi ake i laakau liliki fuli o le oloto, ti e somo ona laa o lalasi, ti e au a manu lele o le lagi o fai ofaga i lona malumalu.

³³ Na fakasa e ia kia latou le folafola i ni fakatata mauke ai ofaipe le fakatata leinei, o mulimuli ki le mafai o lalatou fakalogo.

³⁴ Na leaise masau fua a ia kia latou o sala fakatata ; kae ka lotou tefua, na fakamatala e ia a nea fuli ki ana tisipulo.

Taofi o le afa e Sesu

³⁵ I le aso fai lena, i le afiafi, na pati loa Sesu kia latou : Tou fakalaka ki leia atu fetuu o le tai.

³⁶ I le oki o le kakau o le kakai, na lotou ave loa a ia i le vaka leia na nofo ai a ia ; na i ai foki mo ni iki ake a vaka mo ia.

³⁷ Na to loa se asesio lasi, ti na sopo a galu ki loto o le vaka, ti kua apele foki a ia i le vai.

³⁸ Kae ko ia, na moe a ia i le taumuli i se fa pila. Na lotou fafagu loa a ia, o pati kiate ia : Pule, pe nea noa kiate koe ke tou mamate ?

³⁹ I lana ala ake, na valoki loa e ia le matagi, mo pati ki le tai : Fakalologo ! Manava oki ! Ti na mate loa le matagi, ti na momole oki loa le tai.

⁴⁰ Ti na pati loa a ia kia latou : Kolea na kotou i lasi ai ? Kolea na leaise kotou maua ai se tui ?

⁴¹ Na lotou i lasi ai, ti na lotou fepatiaki ia latou : Ko ai loa a ia leinei, leia e fakalogo foki ki ai le matagi mo le tai ?