Maleko 3 - Tosi Tapu

Fakamauli o le tagata lima mate

¹ Na toe ulu loa Sesu ki le sinakoka. Na nofo i ai se tagata lima mate.

² Na lotou lama loa Sesu, ke tio pe fakamauli loa e ia le tagata lena i le aso o le sapato : O tupu ke mafai ai lona fakalakasala.

³ Ti na pati loa Sesu ki le tagata lima mate : Tuu ki aluga i lena, i loto malie.

⁴ Ti na pati loa a ia kia latou : Pe taga i le aso o le sapato, ke fai se nea malie pe ko se nea veli, ke saofaki ai se tagata pe ke tamate a ia ? Kae na lotou fakalologo loa.

⁵ Ti na tio fakaita loa a ia kia latou, i le lasi o lona mamae o tupu ko le fefeka o latou loto ; ti na pati loa a ia ki le tagata : Falo lou lima. Na falo loa e le tagata lona lima, ti na mauli loa a ia.

⁶ Na ulu loa le kau faliseo ki fafo, i le lakaga fai lena, ti na lotou fono loa mo le kau Elote ke tamate Sesu.

Fakamauli lasi

⁷ Na ano loa Sesu mo ana tisipulo ki le matatai o le tai o Kalilea. Ti na muli loa se kakai toka api iate ia mei Kalilea,

⁸ mo Sutea, mo Selusalemi, mo Itumea, mo leia atu fenua o le Solotane, mo tafatafa o Tile mo Sitone. Na au loa le kakai toka api lena kiate ia, i lalatou logo ki nea fuli ala na fai e ia.

⁹ Koia na kole loa e ia ki ana tisipulo ke taofi tuumau kiate ia se ga vaka, o tupu ke aua na teke a ia e le kakai.

¹⁰ Talie, o tupu ko lana fakamauli ia ni kakai toka api, na feoso ake kiate ia latou fuli ala na maua ia ni masaki, ke fafa kiate ia.

¹¹ I le tio a laumalie veli kia Sesu, na lotou tulolo i ona mua, o tagi : Ko le Alo a koe o le Atua !

¹² Kae na fakatotonu fakamakeke e ia kia latou ke aua na lotou fakasa a ia.

Filifili o le tino agafulu tupu lua

¹³ Ti na pale loa a ia ki le mauga ; ti na kalagai loa e ia latou ala na loto a ia ki ai, ti na lotou au loa kiate ia.

¹⁴ Na fakanofo loa e ia se tino agafulu tupu lua ia latou, ke nofo mo ia,

¹⁵ ti ke kakau latou o fai akonaki mo le pule ke kapu ai a temonio.

¹⁶ Ko leinei le tino agafulu tupu lua leia na fakanofo e ia : Ko Simone, leia na fakaigoa loa e ia ko Petelo ;

¹⁷ mo Sakopo, vosa o Sepeteo, ti mo Soane, taina o Sakopo, ala na soli loa e ia ki ai le igoa ko Poanelesese, ko lona uiga ko vosa o le mana ;

¹⁸ mo Atelea ; mo Filipo ; mo Patolomeo ; mo Mateo ; mo Toma ; mo Sakopo, vosa o Alefeo ; mo Tateo ; mo Simone, le Kananito ;

¹⁹ ti mo Sutasi Isekaliote, leia na fakatau ia Sesu.

Agasala ki le Laumalie Maokioki

²⁰ Na lotou ano loa ki le fale, ti na toe fakatasi ake loa le kakai, ti na leaise koi mafai ke lotou kai.

²¹ I le logo a matua o Sesu ki le nea kua soko, na lotou ano loa ko lona too ; talie na lotou pati : Kua valea a ia.

²² Ti na pati loa le kau sekelipa ala na ifo mei Selusalemi : E iate ia Pelesepu ; ti e kapu e ia le kau temonio i le makeke o le pule o le kau temonio.

²³ Na kalagai loa latou e Sesu, o pati kia latou i se folafola fakatata : Pe mafai feaki ke kapu Satana e Satana ?

²⁴ Kapau e mavetevete se puleaga o tau kiate ia totonu, e leaise mafai ke tuu makeke le puleaga lena ;

²⁵ ti kapau e mavetevete se fale o tau kiate ia totonu, e leaise mafai ke tuu makeke le fale lena.

²⁶ Kapau e agatuu Satana kiate ia totonu, e mavetevete a ia, ti e leaise mafai ke tuu makeke a ia, kae e maumau loa a ia.

²⁷ E leaise mafai ke ulu se tasi ki le fale o se tagata makeke o kaia ona koloa, kae e leikiaise sai mua e ia le tagata makeke lena ; ti o kaia loa e ia lona fale.

²⁸ E kau pati maoki atu kia koutou, e fakamolemole loa a agasala fuli ki vosa o tagata, ti mo fatituu ala ka lotou fai loa ;

²⁹ kae ko leia e fatituu loa ki le Laumalie Maokioki, e leaise toe fakamolemole loa kiate ia : Kua fai e ia se agasala lee gato.

³⁰ Na masau fenaaki loa Sesu talie na lotou pati : E iate ia se laumalie veli.

Le tinana mo fetaina o Sesu

³¹ Ti na kaku ake loa lona tinana mo ona fetaina, o tutuu i fafo, kae lotou kakau loa se tasi ke ano o fakasa kiate ia.

³² Na tonatona le kakai o takatakai a ia, ti na pati ake loa kiate ia : Ko leinei, e tutuu lou tinana mo ou fetaina i fafo, ti e lotou afa a koe.

³³ Ti na tali loa a ia : Ko ai loku tinana, ti ko ai oku fetaina ?

³⁴ Ti na tagaki loa a ia kia latou na tonatona o takatakai a ia, o pati : Ko leinei loku tinana ti ko nei oku fetaina.

³⁵ Talie, ko leia e fai ia le finegalo o le Atua, ko ia lena ko loku taina, mo loku tuagaane, ti mo loku tinana.