Maleko 2 - Tosi Tapu

Fakamauli o se tagata palalisia

¹ Na sili ki ai ni aso, ti na toe liliu loa Sesu ki Kafanaume. Na iloa loa kua nofo a ia i le fale,

² ti na fakatasi ki ai se kakai toka api ai, o leaise koi o i fale ti mo le mua matapa. Na fakasa e ia kia latou le folafola.

³ Na au loa ni kakai kiate ia mo se tagata palalisia, leia na amo e ni tagata e toka fa.

⁴ Ti na leaise mafai ke lotou kaku kiate ia o tupu ko le api o le kakai ; ti na lotou fakamavaa loa se pu i le taufufu o le fale i le ganea leia na tautonu mo Sesu, ti na lotou fakaifo loa i le mavaa lena le palepale leia na moe ai le tagata palalisia.

⁵ I le tio a Sesu ki lalatou tui, na pati loa a ia ki le tagata palalisia : Ei laku fanau, kua fakamolemole au agasala.

⁶ Na nofo i ai ni sekelipa, ala na tonatona, ti na pati i olatou loto :

⁷ Kolea e masau fenaaki ai le tagata lena ? E fatituu lasi a ia ki le Atua. Ko ai e mafai ke fakamolemole ia a agasala, pe se ko le Atua toka tasi ?

⁸ Na iloa loa e Sesu i le lakaga fai lena a nea ala na lotou manatu ki ai i olatou loto, ti na pati loa a ia kia latou : Kolea e kotou maua ai ni manatu fenaaki i okoutou loto ?

⁹ Kofea e faigaofie ake, i le pati ki le tagata palalisia : Kua fakamolemole au agasala, pe ko le pati : Tuu ki aluga, o too lou palepale, ti ke saele ?

¹⁰ Kae o tupu ke kotou iloa e maua e le Vosa o le tagata i le malama nei le pule ke fakamolemole ai a agasala :

¹¹ Na pati loa a ia ki le tagata palalisia : E kau fakatotonu atu kiate koe, tuu ki aluga, o too lou palepale, ti ke ano ki lou kaiga.

¹² I le lakaga fai lena, na tuu ake loa le tagata palalisia ki aluga, o too lona palepale, ti na ulu loa a ia ki fafo kae nofoaki le kakai fuli : Ti na lotou ofolele fuli ai, ti na lotou fakakololia loa ki le Atua, o pati : Na leikiaise motou tio ki se nea feneeki i se aso !

Kalagai o Levi

¹³ Na toe ano loa Sesu ki le mata tai. Ti na au loa le kakai fuli kiate ia, ti na akonaki loa a ia kia latou.

¹⁴ I lana natu, na tio loa a ia kia Levi, vosa o Alefeo, leia na tonatona i le pilo tukusau. Na pati loa a ia kiate ia : Muli mai iate au. Ti na tuu ake loa a Levi ki aluga, o muli iate ia.

E kalagai e Sesu ni kakai agasala, kae leai ni kakai agatonu

¹⁵ Na nofo Sesu i le fale o Levi, o kai mo ana tisipulo ; ti na nonofo foki mo ia ni popelikano mo ni tagata agasala toka api ai ; talie na toka api ai latou ala na mulimuli iate ia.

¹⁶ I le tio a le kau sekelipa mo le kau faliseo e kai Sesu mo le kau agasala ti mo le kau popelikano, na lotou pati loa ki ana tisipulo : Kolea e kai ai mo inu ai a ia mo le kau popelikano mo le kau agasala ?

¹⁷ I le logo a Sesu ki le nea lena, na pati loa a ia kia latou : E leaise ko latou ala e saosaoa e aoga ki ai se toketa, kae ko le kau masaki. Na leaise kau au o kalagai le kau agatonu, kae na kau au o kalagai le kau agasala.

Sesunio ; le kie foou mo utele foou

¹⁸ Na sesunio a tisipulo a Soane mo le kau faliseo. Ti na lotou au loa o pati kia Sesu : Kolea e sesunio ai a tisipulo a Soane ti mo tisipulo a le kau faliseo, kae e leaise sesunio au tisipulo ?

¹⁹ Na tali loa Sesu kia latou : Pe mafai ke sesunio a kaukau nea o le tagata avaga kae koi lotou nonofo mo le tagata avaga ? I le temi katoa leia e lotou nonofo ai mo le tagata avaga, e leaise mafai ke lotou sesunio.

²⁰ E soko mai loa a aso ala e too ai loa ia latou le tagata avaga, ti e lotou sesunio loa i le aso lena.

²¹ E leaise tasi fua leia e tui ia se kie foou ki se teu mago ; talie e saei loa e le kie foou le teu mago, ti e veli oki loa le masae.

²² Ti e leaise tuku e se tasi se vino foou ki ni utele afea ; talie e maumaui loa e le vino foou a utele, ti e puli noa loa le vino mo utele ; kae e tonu ke tuku le vino foou ki ni utele foou.

E pule Sesu ki le sapato

²³ I se aso sapato, na fakalaka a Sesu i ni faigasaga fulumeto. I lalatou saele, na muto loa e ana tisipulo ni kaui fulumeto.

²⁴ Na pati loa le kau faliseo kia Sesu : Kolea e lotou fai ai le nea leia e leaise taga i le aso o le sapato ?

²⁵ Na tali loa Sesu kia latou : Pe na leaise kotou lau le nea leia na fai e Tavite, i le aso leia na tutamaki ai ti na fia kai ai, a ia mo latou ala na nonofo mo ia ;

²⁶ pe na feaki lana ulu ki le fale o le Atua, i le temi o le tagata faisakilifisio ko Apiatale, o kai a pane o moliga, ala na leaise taga ke kai e se tagata, gato fai ki le kau tagata faisakilifisio, ti na toe soli foki e ia kia latou ala na nonofo mo ia !

²⁷ Ti na pati loa a ia kia latou : Na fai le sapato ki le tagata, kae na leaise fai le tagata ki le sapato :

²⁸ Koia e pule ai le Vosa o le tagata ki le sapato foki.