Maleko 16 - Tosi Tapu

Toe tuuake o Sesu

¹ I le sili o le sapato, ko Malia mei Maketala, mo Malia tinana o Sakopo, ti mo Salome, na totogi ia loa ni nea fakamanogi, ke lotou ano o fakamanogi Sesu.

² I le uluaki aso o le vasaa, na lotou ano loa ki le tanuma, koi usu, i le sopo o le laa.

³ Na lotou pati ia latou : Ko ai ka tulei ia loa kia tatou le fatu mei le matapa o le tanuma ?

⁴ Ti i le siki ake o olatou mata, na lotou tio loa kua tulei le fatu, leia na lasi ai.

⁵ Na lotou ulu loa ki le tanuma, o tio loa ki se tagata tupulaga e tonatona i le fetuu atamai, ti na kofu ki se kofu tea ; ti na lotou i lasi ai.

⁶ Kae na pati loa a ia kia latou : Aua na kotou i ; e kotou afa Sesu mei Nasaleti, leia na tutuki ki le koluse ; kua toe tuuake a ia, ti e leaise koi nofo a ia i leinei ; kotou tio ki le ganea leia na tuku ai a ia.

⁷ Kae kotou ano o fakasa ki ana tisipulo ti mo Petelo e muamua a ia ia koutou ki Kalilea : I ai e kotou tio loa kiate ia, ofaipe lana fakasa atu kia koutou.

⁸ Na lotou ulu loa ki fafo mei le tanuma o fesolaki. Talie na maua latou e le i mo le sevaia ; ti na leaise lotou fakasa fua se nea ki se tasi, o tupu ko le lasi o lolatou i.

⁹ Na toe tuuake Sesu i le usu o le uluaki aso o le vasaa, ti na uluaki sa loa a ia kia Malia mei Maketala, leia na kapu ai e ia ni temonio e fitu.

¹⁰ Ti na ano loa a ia o ave le logo kia latou ala na nonofo mo Sesu, ti na mamae mo tagi.

¹¹ I lalatou logo loa kua mauli a ia, ti kua tio ki ai a Malia mei Maketala, na leaise lotou tui fua.

¹² Ti na sili a ia, na sa loa Sesu i se tasi ake faasiga ki tisipulo e toka lua ala na fanoga i le ala ke ano ki le potu uta.

¹³ Ti na la toe liliu loa o fakasa le nea lena kia latou ake ala, kae na leaise lotou tui foki kia laua.

¹⁴ Ti na sili a ia, na toe sa loa Sesu ki le tino agafulu tupu tasi, kae lotou lolotoga kai ; ti na valoki loa e ia kia latou lolatou tui gataa mo le fefeka o olatou loto, talie na leaise lotou tui kia latou ala na tio kiate ia kua toe tuuake.

Gaoi foou a le tino agafulu tupu tasi

¹⁵ Ti na pati loa a ia kia latou : Kotou ano i le malama nei katoa, ti kotou fakamafola le logo malie ki tagata fuli.

¹⁶ Ko leia e tui loa ti e papitema loa e mauli loa a ia, kae ko leia e leaise tui loa e malaia loa a ia.

¹⁷ Ti ko nei a milakulo ala e soko loa kia latou ala e tui loa : E lotou kapu loa a temonio i loku suafa ; e lotou masau loa i ni masau foou ;

¹⁸ e lotou too loa ni gata ; ti kapau e lotou inu ni nea inu mateia, e leaise soko loa se veli kia latou ; e lotou teki loa olatou lima ki le kau masaki, ti e mauli loa le kau masaki.

Asesione

¹⁹ I le oki o le masau a le Aliki kia latou, na ave loa a ia ki Selo, ti na ekeeke loa a ia i le lima atamai o le Atua.

²⁰ Ti na ano loa ana tisipulo o akonaki i potu fuli. Na gaoi le Aliki mo latou, ti na fakamaoki e ia le folafola ki ni milakulo na soko.