Maleko 15 - Tosi Tapu

Tuku o Sesu kia Pilato

¹ I le usu ake fai, na fono loa le kau pule faisakilifisio, mo le kau matua fau, mo le kau sekelipa, ti mo le fono lasi katoa ki se tonu kia Sesu. Ti na lotou fakatotonu loa ke sai a ia, o ave kia Pilato.

² Ti na vesili loa Pilato kia Sesu : Pe ko le sau a koe o le kau Sutea ? Ti na tali loa Sesu kiate ia : Kua ke pati ki ai.

³ Ti na tuku loa e le kau pule faisakilifisio kiate ia ni sala lasi.

⁴ Na toe vesili loa Pilato kiate ia : Pe leaise ke tali ki se nea ? E ke tio ki le lasi o nea ala kua lotou tuku kiate koe.

⁵ Ti na leaise toe tali fua Sesu kiate ia, ti na ofolele ai Pilato i le nea lena.

Sesu pe ko Palepasi

⁶ I Pasikate fuli, na fakamauli e Pilato se tagata pilisoni e tasi, leia na kole ake e le kakai kiate ia.

⁷ Na i ai i le fale pilisoni se tagata na igoa ko Palapasi ti mo lana kau tagata tukipo, o tupu ko se tukipo leia na lotou fai i le lolotoga o se maveuveu.

⁸ Na pale loa le kakai ki le fale o Pilato o kole kiate ia le nea leia na fai masani e ia kia latou.

⁹ Ti na pati loa Pilato kia latou : Pe kotou loto ke kau fakamauli le sau o le kau Sutea ?

¹⁰ Talie na iloa e ia na tuku Sesu e le kau pule faisakilifisio o tupu ko lolatou finenonofo.

¹¹ Kae na soka loa le kakai e le kau pule o le kau tagata faisakilifisio, o tupu ke fakamauli e Pilato a Palapasi.

¹² Ti na masau loa Pilato, o pati kia latou : Kolea e kotou loto ke kau fai ki leia e kotou fakaigoa ko le sau o le kau Sutea ?

¹³ Na lotou toe kalaga loa : Kulusifikoi a ia !

¹⁴ Na pati loa Pilato kia latou : Kolea le nea veli na fai e ia ? Ti na lotou toe kalaga loa o toe leo lasi ake : Kulusifikoi a ia !

¹⁵ Ko Pilato, i lona fia mata malie ki le kakai, na tuku ia loa Palapasi kia latou ; kae fakatotonu loa e ia ke sasa Sesu ki ni laakau, ti ke tutuki loa a ia ki se koluse.

Le pala talatala

¹⁶ Na taki loa Sesu e le kau solia ki le malae ko le peletolio, ti na lotou fakatasii loa le fa solia katoa.

¹⁷ Ti na lotou fakakofu loa a ia ki se taupulupulu kula malie, ti na lotou teki loa ki lona ulu se pala talatala leia na lotou fili.

¹⁸ Ti na lotou fakaalofa loa kiate ia : Alofa atu, sau o le kau Sutea !

¹⁹ Ti na lotou sasa lona ulu ki se fa u, ti na lotou anuanu kiate ia, ti na lotou peluki olatou tuli o tulolo i ona mua.

²⁰ Ti na oki loa lalatou gologolo lena kiate ia, na lotou too loa iate ia le taupulupulu, kae na lotou toe fakatui loa kiate ia ona kofu, ti na lotou ave loa a ia ke tutuki ki se koluse.

Tutuki o Sesu ki le koluse

²¹ Ti na lotou fakamakeke loa se tagata leia na ifo mei faisaga, ko Simone mei Silene, ko le tamana o Alesatelo mo Lufusi, ke amo ia le koluse o Sesu.

²² Ti na lotou taki loa Sesu ki le ganea na igoa ko Kolokota, ko lona uiga ko le ganea o le ulupoko.

²³ Ti na lotou fakainu loa kiate ia se vinika kua sui ki le mila, kae na leaise inu loa e ia a ia.

²⁴ Na lotou tutuki loa a ia ki le koluse, ti na lotou vae loa ona kofu, o toso ke iloa le nea leia e maua e le tagata taki toka tasi.

²⁵ Ko le ola iva a ia o le usu leia na lotou tutuki ai Sesu ki se koluse.

²⁶ Ti na lotou tosi loa le tupuaga o lona tua : ko le Sau o le kau Sutea.

²⁷ Na lotou tutuki loa i ni koluse, o fakatasi mo ia, ni tagata agaveveli e toka lua, ko le tasi i lona fetuu atamai, ti ko le tasi i lona fetuu sema.

²⁸ Ti na fakasoko ai le nea leia e fakasa e le Tosi : Na lau a ia mo le kau agaveli.

²⁹ Na nukinuki loa kiate ia latou ala na fakalaka i ai, mo kalokalo olatou ulu, o pati : A koe leia e maumaui ia le fale tapu, ti toe fakatuu ia a ia i aso e tolu,

³⁰ saofaki a koe totonu, o ifo mei le koluse !

³¹ Na toe nukinuki foki kiate ia le kau pule faisakilifisio mo le kau sekelipa, o pati : Na saofaki e ia le kakai, kae e leaise mafai ke saofaki e ia a ia totonu !

³² Ke ifo mai nei Kilisito, ko le sau o Iselaele, mei le koluse, o tupu ke motou tio ti ke motou tui ! Na lauveli foki kiate ia laua ala na kulusifiko fakatasi mo ia.

³³ I le ola kau agafulu tupu lua lalatea, na fakapouli loa le malama nei katoa, o kaku ki le ola tolu sili lalatea.

³⁴ I le ola tolu sili lalatea, na kalaga loa Sesu o leo lasi : Eloi, Eloi, lama sapakatani ? Ko lona uiga : Ei loku Atua, ei loku Atua, kolea kua ke tiaki ai au ?

³⁵ Ko ni iki ia latou na nonofo i ai, i lalatou logo kiate ia, na pati loa : Ko leinei, e kalaga a ia kia Elia.

³⁶ Ti na makape loa se tasi o latou, o fakasusu se fa unu ki le vinika, o fakapiki ki se fa u, o fakaali kia Sesu ke inu, o pati : Tuku mua, kae tou tio pe au loa Elia o fakaifo a ia mei le koluse.

³⁷ Kae na kalaga leo lasi loa Sesu, ti na mate loa a ia.

³⁸ Na masae lua loa le kie o le fale tapu, mei aluga o kaku ki lalo.

³⁹ Ko le setulio leia na tuu i mua o Sesu, i lana tio ki lona mate fenaaki, na pati loa : E maoki ai, ko le tagata leinei ko le Alo o le Atua.

⁴⁰ Na i ai foki ni fafine ala na tio mei mamao. Ti na kau ia latou a Malia mei Maketala, mo Malia tinana o Sakopo le mulimuli, mo Sosefo, ti mo Salome.

⁴¹ Na lotou mulimuli ia Sesu i le temi leia na nofo ai a ia i Kalilea, o tausi kiate ia. Na i ai foki ni iki ake fafine toka api ala na pale mo ia ki Selusalemi.

Tanu o Sesu

⁴² Ti kua afiafi ai, ti tupu ko le aso lena o le teuteu, ko lona uiga, ko le aso tokonaki o le sapato,

⁴³ na kaku mai loa Sosefo mei Alimatea, ko se tagata fono mauiga, leia na talitali foki ki le puleaga o le Atua. Na toa loa a ia o ano kia Pilato, o kole le tino o Sesu.

⁴⁴ Ti na ofolele loa Pilato ki le mate vave o Sesu ; ti na kalagai loa e ia le setulio, o vesili kiate ia : Pe kua fualoa lona mate.

⁴⁵ I lana iloa papau a ia mei le setulio, na soli loa e ia le tino kia Sosefo.

⁴⁶ Ti na totogi loa e Sosefo se kie tea, ti na sau loa e ia le tino o Sesu mei le koluse, o kofu ki le kie, ti na tuku loa e ia a ia ki se tanuma kua kenu i le utu. Ti na tekai loa e ia se fa fatu lasi ki le matapa o le tanuma.

⁴⁷ Ko Malia mei Maketala, mo Malia, tinana o Sosefo, na tio ki le ganea leia na tuku ki ai le tino o Sesu.