Maleko 13 - Tosi Tapu

mai o le Vosa o le tagata

¹ I le mavae a Sesu mei le fale tapu, na pati loa se tasi o ana tisipulo kiate ia : Pule, tio ki le fulumalilie o fatu, ti mo fale !

² Na tali loa Sesu kiate ia : E ke tio ki fale lalasi ana ? E leaise toe teki loa se fa fatu i aluga o se tasi fa fatu, talie e laku fuli loa latou ki lalo.

³ Na tonatona loa a ia i le mauga o Oliveto, i mua o le fale tapu. Ti ko Petelo, mo Sakopo, mo Soane, ti mo Atelea, na fai ia loa kiate ia le vesili leinei, i lolatou tefua mo Sesu :

⁴ Fakasa mai kia matou, pe koafea e soko ai loa le nea lena, ti kolea le fakamailoga e iloa ai loa ka soko loa a nea fuli ana ?

Temi fakamuli

⁵ Na pati loa Sesu kia latou : Kotou tokaga na kakaai koutou e se tasi.

⁶ Talie e au loa le toka api i loku suafa, o pati : Ko au. Ti e lotou kakaai loa se kakai toka api.

⁷ Ka kotou logo loa ki le masau ki ni tau kua soko, ti mo ni tau e teuteui, aua na kotou i, talie e tonu ke soko a nea ana. Kae e leaise ko le aso fakamuli loa lena.

⁸ E tau loa se kakai ki se tasi kakai, ti mo se puleaga ki se tasi puleaga ; e i ai loa ni mafuike i potu kesekese, ti e i ai loa mo ni oge. Ko le kamataaga loa a ia o mamae o le fanauga.

⁹ Kotou tokaga kia koutou totonu. E ave loa koutou ki telepinale, ti e sasa loa koutou ki ni laakau i sinakoka ; e kotou tutuu loa i mua o ni kovana ti mo ni sau, o tupu ko au, talie ke kotou fakasa le maoki kia latou.

¹⁰ E tonu mua ke fakasa le logo malie ki puleaga fuli.

¹¹ Ka ave loa koutou ke fakamaaui, aua na kotou tuania le nea leia ka kotou masau loa ki ai i mua, kae kotou fakasa le nea leia e tuku atu loa kia koutou i le ola totonu lena ; talie e leaise ko koutou ala e masau loa, kae ko le Laumalie Maokioki.

¹² E tuku loa e le taina lona taina ki le mate, ti ko le tamana lana fanau ; e tuu ake loa a fanau ki olatou matua, o tuku latou ke tamate.

¹³ E vesiainai loa koutou e kakai fuli, o tupu ko loku suafa, kae ko leia e kataki fualoa loa o kaku ki le fakaoki e saofaki loa.

Le fakalialia o le maumau

¹⁴ Ka kotou tio loa ki le tagata leia e igoa ko le Fakalialia o le veli, kua fakanofo i le ganea leia e leaise tonu ke nofo ai, ko leia e lautosi ke matala ! Ti ko latou ala e nonofo loa i Sutea ke fesolaki ki mauga ;

¹⁵ ko leia e nofo loa i le taufufu o lona fale ke aua na ifo loa a ia ki lona loto fale, o too se nea ke ano mo ia ;

¹⁶ ti ko leia e nofo loa i faisaga ke aua na toe liliu a ia ki lona fale, o too lona taupulupulu.

¹⁷ Malaia ki fafine ala e tinanae loa ti mo latou ala e fakau ia ni toe i aso ana !

¹⁸ Kotou faikole ke aua na soko a nea ana i le temi momoko.

Le mamae lasi

¹⁹ Talie e lasi ake loa le mamae i aso ana i mamae fuli ala kua sa talu mei le fakatupu o le malama nei e le Atua o kaku mai ki le temi lena, ti e leaise toe loa i ai ni iki o tatau mo latou ki muli.

²⁰ Ti kanapau na leaise fakatoetoe e le Aliki a aso ana, e leaise saofaki loa se tasi ; kae na fakatotoe e ia a aso ana o tupu ko lana kau filifiliia.

²¹ Ka pati atu loa se tasi kia koutou : E nofo Kilisito i leinei, pe : E nofo a ia i leia, aua na kotou tui ki ai.

²² Talie e malaga loa ni Kilisito loi mo ni polofeta loi ; ti e lotou fai loa ni nea fakaofolele, mo ni milakulo ke kakaai ai le kau filifiliia, mo ka na feala a ia.

Le toe liliu mai o Sesu-Kilisito

²³ Ke kotou tokaga : Kua kau fakasa fakatomua atu kia koutou a nea fuli.

²⁴ Kae i aso ana, i le oki o le mamae lena, e fakapouli loa le laa, ti e leaise toe tuku mai loa e le masina lona malama,

²⁵ Ti e maluluku loa a fetuu mei le lagi, ti e galulu loa a makeke fuli o le lagi.

²⁶ Ti fokifa e tio loa ki le Vosa o le tagata e ifo mai i le ao mo le makeke lasi ti mo le kololia.

²⁷ Ti e kakau loa e ia le kau aselo, ti e tanaki fakatasi loa e ia le kau filifiliia mei fetuu matagi e fa, mei le gatoaga o le kele ki le gatoaga o le lagi.

Folafola o le fiki

²⁸ Kotou ako mei se folafola fakatata kua too mei le fiki. Ka kamata malulu ona laa, ti mo sosomo ona lau, e kotou iloa kua ofi mai le temi vevela.

²⁹ Ti e fenaaki foki, peka kotou tio loa kua soko mai a nea ana, ke kotou iloa kua ofi le Vosa o le tagata, i le matapa.

³⁰ E kau pati maoki atu kia koutou, e leaise puli le tautupu leinei, kae e leikiaise se soko a nea fuli ana.

³¹ E puli loa le lagi mo le kele, kae e leaise puli loa aku folafola.

Fakalotomakeke ki le mauli alaala

³² Kae ki le aso pe ko le ola, e leaise iloa a ia e se tasi fua, pe ko le kau aselo i le lagi, pe ko le Alo, kae ko le Tamana toka tasi.

³³ Kotou tokaga, kotou alaala, ti kotou faikole ; talie e leaise kotou iloa pe au fakaa loa le aso lena.

³⁴ E fai loa pe se tagata leia ka folau e tuku ia lona fale. E tuku e ia le pule ki ana tagata fakasausau, o fakailoilo ki le tagata taki toka tasi lana gaoi, ti fakatotonu ki le tagata taupau matapa ke leo.

³⁵ Koia kotou alaala, talie e leaise kotou iloa le lakaga leia e au ai loa le pule o le fale, pe ko le afiafi, pe ko le vaeluapo, pe ko le koukoua o moa, pe ko le usu.

³⁶ Kotou i na au fakafokifa a ia, o maua mai koutou e kotou momoe.

³⁷ Ko le nea leia e kau fakasa kia koutou, e kau fakasa a ia ki tagata fuli : Kotou alaala.