Maleko 12 - Tosi Tapu

Folafola o tagata faivite

¹ Na toe masau loa Sesu kia latou i ni folafola fakatata. Na to loa e se tagata se vite. Ti na takatakai loa e ia a ia ki se a, ti na kenu loa e ia se tatauaga vino, ti na fakatuu loa e ia se tule ; ti na lue loa e ia le vite ki ni tagata faivite, ti na mavae loa a ia i le fenua.

² I le temi tau o le vite, na kakau loa e ia se tagata fakasausau ki le kau tagata faivite, o tupu ke maua e ia meia latou sona vaega i le fua o le vite.

³ Ti na lotou too loa a ia, o sasa, ti na lotou kakau loa a ia ke ano ata.

⁴ Na toe kakau loa e ia se tasi ake tagata fakasausau kia latou ; ti na lotou tuki loa a ia ki fatu, o mafaa ai lona ulu, ti na lotou fakavelivelii a ia, o kakau ke ano.

⁵ Na toe kakau loa e ia se tasi ake tagata fakasausau, leia na lotou tamate loa ; ti mo ni iki ake o toka api, kae na lotou sasa ni iki, ti tamate ni iki.

⁶ Ti na koi maua e ia se vosa alofaina ; na kakau fakamuli loa e ia a ia kia latou, o pati : E lotou fakaapaapa loa ki loku vosa.

⁷ Kae na pati loa a tagata faivite ana : Ko leinei le vosa leia e maua tofiga ; kotou au, tou tamate a ia, ti tou maua loa le tofiga.

⁸ Ti na lotou too loa a ia, o tamate, ti na lotou ti loa a ia ki le tua vite.

⁹ Kolea loa ka fai e le pule o le vite ? E au loa a ia o tamate le kau tagata faivite, kae e soli loa e ia le vite ki ni iki ake.

¹⁰ Pe na leaise kotou lau le folafola leinei o le Tosi : Ko le fatu leia na tiaki e le kau tufuga Na liliu ko le fatu tafito o le agele ;

¹¹ Ko le nea lena na au mei le Aliki, Ti ko se nea fakaofolele ki omatou mata ?

¹² Na lotou afa ke too a ia, kae na lotou tuania ia le kakai. Na lotou matala loa na fakasa e Sesu le folafola fakatata lena kia latou. Ti na lotou mavae loa iate ia, o ano.

Tukusau kia Sesale

¹³ Na lotou kakau loa kia Sesu ni iki o le kau faliseo mo le kau Elote, o tupu ke fakamauatoka a ia i ana folafola totonu.

¹⁴ Ti na lotou au loa, o pati kia Sesu : Pule, e motou iloa e ke maoki, ti e leaise ke tuania ia fua se tasi ; talie e leaise ke tio ki le tagata, ti e ke akonaki ki le ala o le Atua o mulimuli ki le maoki. Pe taga pe leai ke soli le tukusau kia Sesale ? Pe tonu ke motou soli a ia pe leaise tonu ke motou soli a ia ?

¹⁵ Na iloa loa e Sesu lolatou malualoi, ti na tali loa a ia kia latou : Kolea e kotou asiasii ai au ? Kotou aumai ake se fa tenalio, ke kau tio ki ai.

¹⁶ Na lotou avake loa se fa tenalio ; ti na vesili loa Sesu kia latou : Ko le paaki mo le fakamailoga o ai leia e tuu i ai ? Na lotou tali loa : o Sesale.

¹⁷ Ti na pati loa a ia kia latou : Kotou liufaki kia Sesale le nea a Sesale, ti kotou liufaki ki le Atua le nea a le Atua. Ti na lotou ofolele ai kiate ia.

Ko le kau Satuseo mo le toe tuuake

¹⁸ Ko le kau Satuseo, ala na pati e leaise toe tuuake, na au loa kia Sesu o fai kiate ia le vesili leinei :

¹⁹ Pule, ko leinei le nea leia na fakatotonu mai e Moisese kia matou : Kapau e mate le taina o se tagata, kae tuku e ia lona avaga sala fanau, e toe avaga loa lona taina mo le fafine lena, ke tupu ai se sakoga ki lona taina.

²⁰ Kae na i ai ni fetaina e toka fitu. Na avaga loa le uluaki, ti na mate loa a ia kae na leaise tupu sona sakoga.

²¹ Na avaga loa le lua mo le fafine lena, ti mate loa a ia kae na leai sona sakoga. Ti na toe fenaaki ki le tolu,

²² ti na leaise tuku e se tasi fua i le toka fitu lena se sakoga. I le oki o latou fuli, na mate loa le fafine.

²³ I le toe tuuake, ko ai ia latou ka avaga loa mo le fafine ? Talie na avaga fuli le toka fitu mo ia.

²⁴ Na tali loa Sesu kia latou : Ko leinei le tupuaga o lakotou fai sala : E leaise kotou matala ki le Tosi ti mo le mafimafi o le Atua.

²⁵ Talie i le toe tuuake o le kau mate, e leaise too loa e tagata ni fafine, pe ko fafine ni tagata, kae e lotou liliu loa ofaipe le kau aselo i le lagi.

²⁶ Ki le toe tuuake o le kau mate, pe na leaise kotou lau i le tosi a Moisese, le nea leia na fakasa e le Atua kiate ia i le ga ulu vao : Ko au ko le Atua o Apalaamo, ko le Atua o Isaake, ti ko le Atua o Saakopo ?

²⁷ Ko le Atua e leaise ko le Atua o le kau mate, kae ko le Atua o le kau mauuli. E kotou fai sala lasi ai.

Le fakatotonu lasi toka tasi

²⁸ Ko se tasi o le kau sekelipa, leia na fakalogo ki lalatou masau, ti na tio ki le malie o le tali a Sesu ki le kau Satuseo, na fakafeofi ake loa, o vesili kiate ia : Ko le fakatotonu fea e lasi oki i fakatotonu fuli ?

²⁹ Na tali loa Sesu : Ko leinei le uluaki : Fakalogo, Iselaele : ko le Aliki, lotatou Atua, ko le Aliki a ia e tasi ;

³⁰ ti : E ke alofa loa ki le Aliki, lou Atua, i lou loto katoa, mo lou laumalie katoa, mo lou atamai katoa, ti mo lou makeke katoa.

³¹ Ko leinei lona lua : E ke alofa loa ki lou oloi ofaipe koe totonu. E leaise tasi ake fakatotonu e lasi ake i fakatotonu ana.

³² Na pati loa le sekelipa kiate ia : E malie, ei pule ; kua ke fakasa ia le maoki ko le Atua e tasi, ti e leaise tasi ake Atua iate ia,

³³ ti ko le alofa kiate ia i le loto katoa, mo le atamai katoa, mo le laumalie katoa, mo le makeke katoa, ti mo le alofa ki le oloi ofaipe kiate kita totonu, e lasi ake i failaulau fuli mo sakilifisio fuli.

³⁴ I le iloa e Sesu lana tali poto, na pati loa a ia kiate ia : E leaise ke mamao i le puleaga o le Atua. Ti na leaise tasi fua na mafai ke toe fai ia ni vesili kiate ia.

Kilisito ko le vosa o Tavite

³⁵ Na soko atu le akonaki a Sesu i le fale tapu, o pati : Kolea e pati ai le kau sekelipa ko le Kilisito ko le vosa o Tavite ?

³⁶ Talie na pati foki Tavite i le Laumalie Maokioki : Na pati le Aliki ki loku Aliki : Eke a koe i loku fetuu atamai, Okaku ke kau fakaliliu ou fili ko lou tekiaga vae.

³⁷ Na fakaigoa a ia e Tavite totonu ko le Aliki ; pe feaki loa ke liliu a ia ko lona vosa ? Ti na fakalogo se kakai lasi kiate ia i le fiafia.

Valoki o le kau sekelipa

³⁸ Na pati loa Sesu kia latou i lana akonaki : Kotou tokaga ai ki le kau sekelipa, ala e manako ke taka mo kofu loloa, ti ke fakamalo ake kia latou i ganea apiapi ;

³⁹ ala e afa ia a ekeekeaga malilie i sinakoka, mo nofoaga malilie i kaitasi ;

⁴⁰ ala e tafi ia a fale o fafine lokonui, mo fai ia ni kole loloa ke fakamatamalie. E fakamaaui loa latou o mamafa ai.

Moliga o le fafine lokonui

⁴¹ Na tonatona loa Sesu o tautonu mo le fa pusa tanaki koloa o le fale tapu, o tio ki le tuku e le kakai alatou paaga ki ai. Ko se kau mou koloa toka lasi na laku ia ki ai se paaga lasi ai.

⁴² Na au foki mo se fafine lokonui mativa, ti na tuku loa e ia ki ai ni fa piesi liliki fua e lua, ko lona tatau ko se sagatimi e tasi.

⁴³ Ti na kalagai loa e Sesu ana tisipulo, o pati kia latou : E kau pati maoki atu kia koutou, kua soli e le fafine lokonui mativa leinei, o lasi ake ia latou fuli ala na tuku paaga ki le fa pusa tanaki koloa ;

⁴⁴ talie na lotou soli fuli le nea leia e leaise aoga kia latou, kae ko le fafine lokonui, i lona mativa, na soli ia le nea katoa leia na maua e ia, le nea katoa leia na tonu ke mauli ai.