Maleko 1 - Tosi Tapu

Gaoi a Soane-Patita

¹ Kamataaga o le Evaselio o Sesu-Kilisito, Alo o le Atua.

² O mulimuli ki le nea leia e tuu i le tosi a le polofeta ko Esaia : Ko leinei, e kau kakau laku tagata avelogo i ou mua, Leia e teuteu ia loa lou ala ;

³ Ko le leo o leia e kalaga i le toafa : Kotou teuteu le ala o le Aliki, Kotou fakatokatoka ona ala liliki,

⁴ Na sa loa Soane, o fai papitema i le toafa, ti mo akonaki ki le papitema o le fakasemala ki le fakamolemole o agasala.

⁵ Na ano kiate ia le fenua katoa o Sutea ti mo le kakai fuli o Selusalemi, o kofesio alatou agasala, ti mo papitema latou e Soane i le vaitafe o le Solotane.

⁶ Na kofu Soane ki se kofu fului kamelo, ti na toi e ia se kilipipi i ona vakavaka. Na kai a ia ki seseivaka ti mo le meli vao.

⁷ Na akonaki a ia, o pati : E au i oku muli leia e lasi ake iate au, ti e leaise kau gali i le punou o tatala le sai o lona taka.

⁸ Ko au, na kau papitema koutou ki le vai ; kae e papitema loa e ia koutou ki le Laumalie Maokioki.

Papitema o Sesu-Kilisito

⁹ I le temi a ia, na au loa Sesu mei Nasaleti ki Kalilea, ti na papitema loa a ia e Soane i le Solotane.

¹⁰ I le lakaga leia na mavae ai a ia mei le vai, na tio loa a ia ki le mavaa o le lagi, ti mo le Laumalie Maokioki e ifo kiate ia ofaipe se lupe.

¹¹ Ti na fakasa loa e se leo mei le lagi a folafola anei : Ko loku Alo alofaina a koe, leia kua kau tuku ki ai loku alofa katoa.

Fakasalai o Sesu-Kilisito

¹² I le lakaga fai lena, na taki loa Sesu e le Laumalie Maokioki ki le toafa,

¹³ ti na nofo loa a ia i ai i ni aso e kau fa, o fakasalai e Satana. Na nofo a ia mo manu kaikivao, ti na tausi a ia e le kau aselo.

Kamata o le gaoi a Sesu i Kalilea

¹⁴ I le oki o le fakaulu o Soane ki le fale pilisoni, na ano loa Sesu ki Kalilea, o fakasa le Evaselio o le Atua.

¹⁵ Na pati a ia : Kua soko le temi, ti kua ofi mai le puleaga o le Atua. Kotou fakasemala, ti kotou tui ki le logo malie.

Uluaki tisipulo a Sesu-Kilisito

¹⁶ I lana saele i le mata tai o Kalilea, na tio loa a ia kia Simone, mo Atelea, taina o Simone, ala na ti ia se kupega ki le tai ; talie na la tautai.

¹⁷ Na pati loa Sesu kia laua : Kolua muli mai iate au, ti e kau fakaliliu loa koulua ko ni tautai tagata.

¹⁸ I le lakaga fai lena, na la tuku loa ola kupega, kae na la mulimuli loa iate ia.

¹⁹ Ti na fakamamao fakaikiiki atu a ia, ti na tio loa a ia kia Sakopo, vosa o Sepeteo, mo Soane, lona taina, ala na nonofo foki i se vaka ti na onoono ia ola kupega.

²⁰ I le lakaga fai lena, na kalagai loa e ia laua ; ti na la tuku loa lola tamana ko Sepeteo i le vaka mo le kau gaoi, kae na la muli loa iate ia.

Kapu o ni temonio i Kafanaume

²¹ Na lotou ano loa ki Kafanaume. Ti na ulu loa Sesu ki le sinakoka o akonaki, i le aso o le sapato.

²² Na lotou ofolele i lana akonaki ; talie na akonaki a ia ofaipe se tasi leia e nofo mo se pule, kae na leaise akonaki a ia ofaipe le kau sekelipa.

²³ Na nofo loa i lolatou sinakoka se tagata leia na maua ia se laumalie veli, ti na kalaga loa a ia :

²⁴ Kolea e ke loto kia matou, Sesu mei Nasaleti ? Pe na ke au o maumaui matou ? E kau iloa pe ko ai a koe : Ko le Sagato a koe o le Atua.

²⁵ Na lolomi loa a ia e Sesu, o pati : Fakalologo, ti ke mavae i le tagata lena.

²⁶ Ti na mavae loa le laumalie veli i le tagata lena, i le oki o lana lu fakaveliveli a ia, ti mo lana tagi leo lasi.

²⁷ Na lotou ofolele fuli i le nea lena, o pati : Kolea le nea leinei ? Ko se akonaki foou ! E masau a ia mo se pule ki laumalie veli foki, ti e lotou fakalogo kiate ia !

²⁸ Ti na mafola loa lona logologona i le lakaga fai lena i potu fuli o Kalilea.

Fakamauli o le tinana o le avaga a Petelo

²⁹ I le mavae i le sinakoka, na lotou ano loa mo Sakopo mo Soane ki le fale o Simone mo Atelea.

³⁰ Na moemoe le tinana o le avaga o Simone, talie na fiva a ia ; ti na fakasa loa a ia kia Sesu i le lakaga fai lena.

³¹ Ti na fakafeofi ake loa Sesu kiate ia, ti na too loa e ia lona lima o fakatuu a ia ki aluga, ti na puli loa le vela i le lakaga fai lena. Ti na tausi loa le fafine kia latou.

Fakamauli o masaki

³² I le afiafi, i le galo o le laa, na aumai loa kia Sesu le kau masaki fuli ti mo le kau avagaia.

³³ Ti na fakatasi le kolo katoa i lona mua matapa.

³⁴ Na fakamauli loa e ia ni kakai toka api ai ala na maua ia ni masaki kesekese ; na kapu foki e ia ni temonio mauke ai, ti na leaise fakataga e ia ki temonio ke masau, talie na lotou iloa a ia.

³⁵ I le usu, koi fakapouli ai, na tuu ake loa a ia, o ano ki se ganea lavaki, leia na faikole ai loa a ia.

³⁶ Ko Simone mo latou ala na nonofo mo ia, na ano loa o afa a ia.

³⁷ Ti na lotou maua loa a ia, ti na lotou pati loa kiate ia : E afa a koe e le kakai katoa.

³⁸ Na tali loa Sesu kia latou : Tou ano ki se ganea kese, ki kolo liliki ala e feofi mai, ke kau akonaki foki i ai ; talie ko ia leia na kau au ai.

³⁹ Ti na ano loa a ia o akonaki i sinakoka, i Kalilea katoa, ti na kapu loa e ia le kau temonio.

Fakamauli o se tagata kilia

⁴⁰ Na au loa se tagata kilia kiate ia ; ti na tutuli loa a ia, o kolekole kia Sesu : Kapau e ke loto ki ai, ti e mafai ke ke fakaliliu au o mea.

⁴¹ Na aloalofa loa Sesu kiate ia, ti na falo loa e ia lona lima, o fafa ki le tagata, o pati : E kau loto ki ai, ke ke mea.

⁴² I le lakaga fai lena, na mavae loa le kilia iate ia, ti na mea loa a ia.

⁴³ Ti na kakau aifai a ia e Sesu ke ano, mo ni fakatotonu mamafa,

⁴⁴ o pati kiate ia : aua na ke fakasa fua se nea ki se tasi ; kae ke ano o fakasa a koe ki le tagata faisakilifisio, ti ke momoli o uiga mo lou fakamea le nea leia na fakatotonu e Moisese, o tupu ke fakamaoki kia latou.

⁴⁵ Kae na ano loa le tagata lena, ti na kamata fakasa loa e ia mo fakamafola i ganea fuli le nea leia na soko kiate ia. Koia na leaise toe mafai ai le ulu fakalauatea a Sesu ki se kolo. Na nofo a ia i tua kolo, i ni ganea lavaki, ti na au kiate ia mei potu fuli.