Malakia 3 - Tosi Tapu

Leia e saele i mua o le mesia

¹ Ko leinei, e kau kakau loa laku tagata avelogo ; E teuteu loa e ia le ala i oku mua. Ti fokifa e ulu loa ki lona fale tapu le Aliki leia e kotou afa ; Ti ko le tagata avelogo o le sai leia e kotou oli ki ai, ko leinei, e au a ia, E pati le Eteleno o kau tau.

² Ko ai e mafai loa ke tuu i le aso o lana saele mai ? Ko ai e tuu loa i aluga mo ka sa mai loa a ia ? Talie e fai loa a ia pe le afi a le tagata saka ukamea, Pe le topa a le tagata faifo.

³ E tonatona loa a ia ki lalo, e saka loa e ia, ti e fakamea loa e ia le siliva ; E fakamea loa e ia a vosa o Levi, E fakamea loa e ia latou ofaipe le fakamea o le aulo mo le siliva, Ti e lotou fai loa ki le Eteleno ni moliga i le faitotonu.

⁴ Ti e malie loa le moliga a Suta mo Selusalemi ki le Eteleno, Ofaipe aso mago, ofaipe fetuu o le temi afea.

⁵ E kau fakafeofi loa kia koutou ki le fakamaau, Ti e kau fakatavili loa o fakamaoki ki le kau faikikite loi mo le kau tono fafine, Kia latou ala e fakapapau loi, Kia latou ala e taofi ia le totogi o le tagata gaoi, Latou ala e fakamamae ia le fafine sala avaga mo le toe sala matua, Mo latou ala e agaveli ki le matapule, ti mo latou ala e leaise i kiate au, E pati le Eteleno o kau tau.

⁶ Talie ko au ko le Eteleno, e leaise kau fetogi. Ti ko koutou, fanau a Sakopo, na leaise kotou fetogi foki.

Moliga mo tapuakina

⁷ Talu mei le temi o okoutou tamana, na kotou mavae i aku fakatotonu, Na leaise kotou tausi latou. Kotou toe liliu mai kiate au, ti e kau toe liliu mai loa kia koutou, E pati le Eteleno o kau tau. Kae kotou pati : Kolea le nea leia e tonu ke motou toe liliu mai ai ?

⁸ Pe kakaai e se tagata le Atua ? Talie e kotou kakaai au, Ti e kotou pati : Kolea le nea leia na motou kakaai ai a koe ? I vaega kau agafulu mo moliga.

⁹ Kua taai koutou e le malaia, Kae e kotou kakaai au, E le puleaga katoa !

¹⁰ Kotou aumai ki le fale tanaki koloa a vaega kau agafulu fuli, O tupu ke i ai se nea kai i loku fale ; Kotou asiasii au i le nea aia, E pati le Eteleno o kau tau, Ti e kotou tio loa pe leaise kau fakamavaa loa kia koutou a matapa o atu lagi, Pe leaise kau liligi loa kia koutou le tapuakina o lasi ai.

¹¹ Kia koutou e kau valoki loa leia e kai, Ti e leaise maumaui loa e ia a fua o le kele, Ti e leaise paa loa le vite i okoutou ulu fenua, E pati le Eteleno o kau tau.

¹² E pati loa a puleaga fuli kia koutou, manuia, Talie e kotou liliu loa ko se fenua o nea malilie, E pati le Eteleno o kau tau.

Le kesekese o le tagata agatonu mo le tagata agatuu i le aso o le Eteleno

¹³ E fia nealasi akoutou masau kiate au, e pati le Eteleno, Ti e kotou pati : Kolea na motou lau kiate koe ?

¹⁴ Na kotou pati : E leaise aoga o le tausi ki le Atua ; Kolea na tou maua i le tausi o ana pelesepeto, Ti mo le saele i le mamae, O tupu ko le Eteleno o kau tau ?

¹⁵ I le temi nei e motou pati : e manuia ake latou ala e fia taualuga ; Io, e mou koloa ake latou ala e agaveli. Io, e lotou asiasii le Atua, ti e lotou saosaoa !

¹⁶ Ti na masau loa latou ala e i ki le Eteleno ia latou ; Na tokaga loa le Eteleno, ti na fakalogo loa a ia. Ti na tosi loa se tosi fakamanatu i ona mua Kia latou ala e i ki le Eteleno Ti e fakaapaapa ki lona suafa.

¹⁷ E lotou liliu loa ko loku kakai, e pati le Eteleno o kau tau, E lotou liliu loa ko loku koloa mauiga, i le aso leia e kau teuteui. E kau alofa loa kia latou, Ofaipe se tagata e alofa ki lona vosa leia e tausi kiate ia.

¹⁸ Ti e kotou toe tio loa ki le kesekese O le tagata agatonu mo le tagata agaveli, O leia e tausi ki le Atua Ti mo leia e leaise tausi kiate ia.